Ditiro 8:1-40
8 Mme Saulo, o ne a dumelela go bolawa ga gagwe.+
Mo letsatsing leo pogiso e kgolo+ ya tsogela phuthego e e mo Jerusalema; botlhe kwantle ga baaposetoloi ba ne ba gasamela+ mo dikgaolong tsotlhe tsa Judea le Samarea.
2 Mme banna ba ba nang le poifo ya bomodimo ba isa Setefane kwa phupung,+ ba mo lelela ka khutsafalo e kgolo.+
3 Mme Saulo, a simolola go tshwara phuthego makgwakgwa. A tlhasela matlo ka go latelana, a gogagogela banna le basadi kwa ntle, a ba isa kgolegelong.+
4 Le fa go ntse jalo, ba ba neng ba gasame ba ya le lefatshe leo lotlhe ba bolela dikgang tse di molemo tsa lefoko.+
5 Filipo, ene, a fologela kwa motseng wa Samarea+ mme a simolola go ba rerela Keresete.
6 Boidiidi bo ne bo le seoposengwe bo tlhwaetse tsebe dilo tse di neng di buiwa ke Filipo fa ba ne ba ntse ba reeditse e bile ba lebile ditshupo tse a neng a di dira.
7 Gonne go ne go na le ba le bantsi ba ba neng ba na le meya e e seng phepa,+ mme e ne e tle e goe ka lentswe le le kwa godimo mme e tswe. Mo godimo ga moo, ba le bantsi ba ba neng ba sule ditokololo+ le ba ba tlhotsang ba ne ba alafiwa.
8 Jalo ga nna le boipelo jo bogolo fela thata mo motseng oo.+
9 Jaanong mo motseng ono go ne go na le monna mongwe a bidiwa Simone, yo pele ga moo, a neng a ntse a dira ditiro tsa maselamose+ e bile a gakgamatsa setšhaba sa Samarea, a re ene ka boene e ne e le motho mongwe yo mogolo.+
10 Mme botlhe, go simolola ka yo mmotlana go fitlha ka yo mogolo, ba ne ba tle ba mo tlhwaele tsebe mme ba re: “Monna yono ke Maatla a Modimo, a a ka bidiwang Mogolo.”
11 Jalo ba ne ba tle ba mo tlhwaele tsebe ka go bo a ba gakgamaditse ka lobaka lo loleele thata ka ditiro tsa gagwe tsa maselamose.
12 Mme e rile ba dumela Filipo, yo o neng a bolela dikgang tse di molemo tsa bogosi jwa Modimo+ le tsa leina la ga Jesu Keresete, ba kolobediwa, banna mmogo le basadi.+
13 Le Simone ka boene a nna modumedi, mme, fa a sena go kolobediwa, a nna a ntse a na le Filipo ka metlha;+ mme o ne a gakgametse fa a ne a bona go dirwa ditshupo le ditiro tse dikgolo tse di maatla.
14 E rile baaposetoloi kwa Jerusalema ba utlwa gore Samarea e ne e amogetse lefoko la Modimo,+ ba romela Petere le Johane kwa go bone;
15 mme ba ya ba ba rapelela gore ba amogele moya o o boitshepo.+
16 Ka gonne o ne o ise o wele mo go ope wa bone, mme ba ne ba kolobeditswe fela mo leineng la Morena Jesu.+
17 Go tswa foo ba ba baya diatla,+ mme ba simolola go amogela moya o o boitshepo.
18 Jaanong e rile Simone a bona gore moya o ne o newa ka go bewa diatla ke baaposetoloi, a ba naya madi,+
19 a re: “Le nna nneyeng taolo eno, gore motho yo ke mmayang diatla a amogele moya o o boitshepo.”
20 Mme Petere a mo raya a re: “A selefera ya gago e nyelele le wena, ka gonne o akantse gore o ka bona mpho ya mahala ya Modimo+ ka madi.
21 Ga o na karolo le fa e le seabe mo kgannyeng eno, gonne pelo ya gago ga e a tlhamalala mo ponong ya Modimo.+
22 Jalo, ikwatlhaele bosula jono jwa gago, mme o kokotlele Jehofa+ gore, fa go kgonega, o itshwarelwe leano la pelo ya gago;
23 gonne ke a bona gore o santlhoko e e nang le botlhole+ le kgole ya tshiamololo.”+
24 Fa Simone a araba a re: “Bathong, ntirelang mokokotlelo+ mo go Jehofa gore sepe sa dilo tse lo di buileng se se ka sa ntlela.”
25 Jalo, e rile ba neetse bosupi ka botlalo e bile ba buile lefoko la ga Jehofa, ba boela Jerusalema, mme ba tsamaya ba bolela dikgang tse di molemo mo metsaneng e le mentsi ya Basamarea.+
26 Le fa go ntse jalo, moengele+ wa ga Jehofa a bua le Filipo, a re: “Nanoga o ye kwa borwa kwa tseleng e e fologang go tswa Jerusalema e ya Gasa.” (Eno ke tsela ya sekaka.)
27 Foo a nanoga a tsamaya, mme, bona! moopafadiwa+ wa Moethiopia,+ monna yo o nang le taolo tlase ga Kandase kgosigadi ya Baethiopia, le yo o neng a okametse letlotlo lotlhe la gagwe. O ne a ile Jerusalema go ya go obamela,+
28 mme o ne a boa a ntse mo kareng ya gagwe a balela moporofeti Isaia kwa godimo.+
29 Jalo moya wa raya+ Filipo wa re: “Atamela mme o ikopanye le kara eno.”
30 Filipo a taboga go bapa le yone mme a mo utlwa a balela moporofeti Isaia kwa godimo, mme a re: “A tota o itse se o se balang?”
31 A re: “Tota, nka tlhaloganya jang, fa mongwe a sa nkaele?” Mme a rapela Filipo gore a palame a nne le ene.
32 Jaanong tema ya Lokwalo e a neng a e balela kwa godimo e ne e le eno: “Jaaka nku o ne a tlisiwa tlhabong, le jaaka kwanyana e e se nang lentswe fa pele ga mmeodi wa yone, jalo ga a bule molomo.+
33 Mo go kokobediweng ga gagwe katlholo e ne ya tsewa mo go ene.+ Ke mang yo o tla bolelang dintlha tsotlhe tsa kokomana ya gagwe? Ka gonne botshelo jwa gagwe bo tlositswe mo lefatsheng.”+
34 Fa moopafadiwa a araba a raya Filipo a re: “Ke a go lopa, Moporofeti o bua seno kaga mang? Kaga gagwe kgotsa kaga motho mongwe o sele?”
35 Filipo a bula molomo+ mme, a simolola ka Lokwalo+ lono, a mmolelela dikgang tse di molemo kaga Jesu.
36 Jaanong fa ba ne ba tsamaya mo tseleng, ba tla mo bodibeng bongwe jwa metsi, mme moopafadiwa a re: “Bona! Bodiba jwa metsi; ke eng se se nthibelang go kolobediwa?”+
37 ——
38 Foo a laela gore kara e eme, mme ka bobedi ba fologela mo teng ga metsi, Filipo le moopafadiwa yono; mme a mo kolobetsa.
39 E rile ba sena go tswa mo metsing, moya wa ga Jehofa wa tlosa Filipo+ ka bofefo, mme moopafadiwa a se ka a tlhola a mmona, gonne o ne a nna a itsamaela a ipela thata.
40 Mme Filipo a fitlhelwa a le kwa Ashedoda, mme a ralala karolo ya naga eo a ba a nna a bolela+ dikgang tse di molemo mo metseng yotlhe go fitlha a fitlha kwa Kaesarea.+
