Duteronome 1:1-46
1 Ano ke mafoko a Moshe a neng a a bua le Iseraele yotlhe mo kgaolong ya Joredane mo nageng, mo mabaleng a a sekaka fa pele ga Sufe, fa gare ga Parana+ le Tofele le Labane le Haserothe+ le Disahabe,
2 e le malatsi a le lesome le bongwe ka tsela ya Thaba ya Seire go tswa Horebe go ya Kadeshe-barenea.+
3 Mme ga diragala gore mo ngwageng wa bomasome a manè,+ mo kgweding ya bolesome le bongwe, mo letsatsing la ntlha la kgwedi, Moshe a bua le bomorwa Iseraele kafa go sotlhe se Jehofa a neng a se mo laetse ka bone,
4 fa a sena go fenya Sihone+ kgosi ya Baamore, yo o neng a nna kwa Heshebone, le Oge+ kgosi ya Bashana, yo o neng a nna kwa Ashetarothe, kwa Ederei.
5 Moshe o ne a simolola go tlhalosa molao+ ono mo kgaolong ya Joredane mo lefatsheng la Moabe, a re:
6 “Jehofa Modimo wa rona o ne a bua le rona kwa Horeba,+ a re, ‘Lo ntse nako e telele ka mo go lekaneng mo kgaolong eno e e dithaba. +
7 Retologang lo bolole lo tsene mo kgaolong e e dithaba ya Baamore+ le mo baagelaning botlhe ba bone mo Areba,+ kgaolo e e dithaba+ le Shefela le Negebe+ le losi lwa lewatle, lefatshe la Bakanana,+ le Lebanona,+ go fitlha kwa nokeng e kgolo, noka ya Euferatese.+
8 Bonang, ke baya lefatshe fa pele ga lona. Tsenang lo rue lefatshe le Jehofa a neng a ikanela borraalona kaga lone, e leng Aborahame, Isake+ le Jakobe,+ go le naya bone le losika lwa bone morago ga bone.’+
9 “Mme mo nakong eo ke ne ka lo raya ka re, ‘Ga ke kgone go lo tshola ke le nosi.+
10 Jehofa Modimo wa lona o lo ntsifaditse, mme bonang, gompieno lo tshwana le dinaledi tsa magodimo ka bontsintsi+ jwa lona.
11 E kete Jehofa Modimo wa borraalonamogologolwane a ka lo oketsa+ makgetlo a le sekete go feta kafa lo leng bantsi ka gone, mme e kete a ka lo segofatsa+ fela jaaka a lo solofeditse.+
12 Nka kgona jang go tshola mokgweleo wa lona le morwalo wa lona le komano+ ya lona ke le nosi?
13 Batlang banna ba ba botlhale le ba ba nang le temogo+ le ba ba nang le maitemogelo+ ba ditso tsa lona, gore ke ba tlhome go nna ditlhogo mo go lona.’+
14 Foo lo ne lwa nkaraba lwa re, ‘Selo se o se buileng gore re se dire se molemo.’
15 Ka jalo ke ne ka tsaya ditlhogo tsa ditso tsa lona, banna ba ba botlhale le ba ba nang le maitemogelo, ka ba tlhoma go nna ditlhogo mo go lona, dikgosana tsa dikete le dikgosana tsa makgolo le dikgosana tsa ditlhopha tsa masome a matlhano le dikgosana tsa masome le badiredi ba ditso+ tsa lona.
16 “Mme ka tswelela go laela baatlhodi ba lona ka nako eo ka re, ‘Fa lo reetsa kgang fa gare ga bomorwaalona, lo atlhole ka tshiamo+ fa gare ga motho le morwarraagwe kgotsa moagi wa gagwe wa moeng.+
17 Lo se ka lwa tlhaola fa lo atlhola.+ Lo utlwe yo monnye fela jaaka yo mogolo.+ Lo se ka lwa tshosiwa ke motho,+ gonne katlholo ke ya Modimo;+ mme kgang e e bokete thata mo go lona, lo e tlise kwa go nna, mme ke e utlwe.’+
18 Mme ka nako eo ke ne ka lo laela ka ga dilo tsotlhe tse lo tshwanetseng go di dira.
19 “Foo ra bolola ra tswa mo Horeba ra gwanta go ralala naga e kgolo eo yotlhe le e e boitshegang,+ e lo e boneng, re feta ka tsela ya kgaolo e e dithaba ya Baamore,+ fela jaaka Jehofa Modimo wa rona a ne a re laetse; kgabagare ra tla mo Kadeshe-barenea.+
20 Jaanong ke ne ka lo raya ka re, ‘Lo tlile mo kgaolong e e dithaba ya Baamore, e Jehofa Modimo wa rona a e re nayang.+
21 Bonang, Jehofa Modimo wa lona o lo tlogeletse lefatshe leno.+ Tlhatlogang, le rueng, fela jaaka Jehofa Modimo wa borraalonamogologolwane a buile le lona.+ Lo se ka lwa boifa, le fa e le go tshoga.’+
22 “Le fa go ntse jalo, lotlhe lo ne lwa nkatamela mme lwa re, ‘Mma re romele banna kwa pele ga rona gore ba re tlhatlhobele lefatshe mme ba busetse phetolo kwa go rona kaga tsela e re tshwanetseng go tlhatloga ka yone le metse e re tla tlang kwa go yone.’+
23 Selo seno se ne sa itshupa se le molemo mo matlhong a me, mo ke neng ka tsaya banna ba le lesome le bobedi ba lona, a le mongwe mo lotsong+ longwe le longwe.
24 Foo ba retologa ba tlhatlogela mo kgaolong e e dithaba+ mme ba fitlha kwa mokgatšheng o o phothoselang wa Eshekole+ mme ba e tlhola.
25 Mme ba tsaya mangwe a maungo a lefatshe+ ka seatla ba a tlisa kwa go rona, mme ba busetsa lefoko kwa go rona ba re, ‘Lefatshe le Jehofa Modimo wa rona a le re nayang le molemo.’+
26 Mme lo ne lo sa rate go tlhatloga,+ lwa ba lwa simolola go itshwara ka go tsuologela taelo ya ga Jehofa Modimo+ wa lona.
27 Lo ne lwa nna lwa ngongorega mo megopeng ya lona lo re, ‘Jehofa o ne a re ntsha kwa lefatsheng la Egepeto+ ka gonne a ne a re tlhoile+ mme a re tsenya mo seatleng sa Baamore, gore ba re nyeletse.+
28 Re tlhatlogela kae? Bomorwarraarona ba dirile gore pelo ya rona e nyere,+ ba re: “Re bone batho ba bagolo le ba baleele go re feta+ koo, metse e megolo e e sireletsegileng go fitlha kwa magodimong+ le bomorwa Baanake.”’+
29 “Ka jalo ke ne ka lo raya ka re, ‘Lo se ka lwa garoga pelo kgotsa lwa boifa ka ntlha ya bone.+
30 Jehofa Modimo wa lona ke ene yo o tsamayang fa pele ga lona. O tla lo tlhabanela+ kafa go sotlhe se a neng a se lo direla kwa Egepeto mo matlhong a lona,+
31 le kwa nageng,+ kwa o neng wa bona kafa Jehofa Modimo wa gago a neng a go tshola+ ka gone fela jaaka motho a tshola morwawe, mo tseleng yotlhe e lo e tsamaileng go fitlha lo tla mo lefelong leno.’+
32 Mme go sa kgathalesege lefoko leno, lo ne lo sa dumele mo go Jehofa Modimo+ wa lona,
33 yo o neng a tsamaya fa pele ga lona mo tseleng gore a lo senkele lefelo gore lo thibelele+ mo go lone, ka molelo bosigo gore lo bone tsela e lo tshwanetseng go tsamaya ka yone le ka leru mo nakong ya motshegare.+
34 “Mo nakong eno yotlhe Jehofa o ne a utlwa lentswe la mafoko a lona. Ka jalo o ne a galefa a ba a ikana,+ a re,
35 ‘Ga go na le fa a le mongwe mo bathong bano ba kokomana e e bosula eno yo o tla bonang lefatshe le le molemo le ke neng ka ikanela go le naya borraalona,+
36 fa e se Kalebe morwa Jefune.+ O tla le bona, mme ke tla naya ene le bomorwawe lefatshe le a neng a le gata, ka lebaka la gore o setse Jehofa morago ka botlalo.+
37 (Le nna Jehofa o ne a ntukela bogale ka ntlha ya lona, a re, ‘Le wena ga o kitla o tsena gone.+
38 Joshua morwa Nune, yo o emeng fa pele ga gago, ke ene yo o tla tsenang gone.’+ O mo nonotshitse,+ ka gonne o tla dira gore Iseraele e le rue.)
39 Fa e le bana ba lona ba bannye ba lo neng lwa bua ka bone lwa re: “Ba tla nna kgapo!”+ le bomorwaalona ba gompieno ba sa itseng molemo kgotsa bosula, bano ba tla tsena gone, mme ke tla le ba naya, mme ba tla le rua.
40 Fa e le lona ka bolona, tsayang tsela e sele lo bololele kwa nageng ka tsela ya Lewatle le Lehibidu.’+
41 “Foo lo ne lwa araba lwa nthaya lwa re, ‘Re leofetse Jehofa.+ Rona—re tla tlhatloga re ya go tlhabana tumalanong le sotlhe se Jehofa Modimo wa rona a se re laetseng!’ Ka jalo mongwe le mongwe wa lona o ne a itlhomela ka dibetsa tsa gagwe tsa ntwa mme lwa go tsaya go le motlhofo go tlhatlogela mo thabeng.+
42 Mme Jehofa a nthaya a re, ‘Ba reye o re: “Lo se ka lwa tlhatloga lo ya go tlhabana, ka gonne ga ke mo gare ga lona;+ gore lo se ka lwa fenngwa fa pele ga baba ba lona.”’+
43 Ka jalo ke ne ka bua le lona, mme lwa se ka lwa reetsa mme lwa simolola go itshwara ka go tsuologela+ taelo ya ga Jehofa lwa ba lwa galefa thata, mme lwa leka go tlhatlogela mo thabeng.+
44 Foo Baamore ba ba neng ba nna mo thabeng eo ba tswa ba tla go lo kgatlhantsha+ mme ba lo leleka, fela jaaka dinotshe di dira, ba lo gasamisa mo Seire go ya go fitlha kwa Horema.+
45 Morago ga moo lo ne lwa boa mme lwa simolola go lela fa pele ga ga Jehofa, mme Jehofa o ne a se ka a reetsa lentswe la lona,+ le fa e le go lo sekegela tsebe.+
46 Ka jalo lo ne lwa tswelela lo nna kwa Kadeshe malatsi a le mantsi, malatsi a lo neng lwa a nna gone.+
