Duteronome 10:1-22
10 “Ka yone nako eo Jehofa a nthaya a re, ‘Itshetele dikwalelo tse pedi tsa leje tse di tshwanang le tsa ntlha,+ mme o tle kwa go nna mo thabeng, mme o itirele letlole la logong.+
2 Mme ke tla kwala mo dikwalelong tseno mafoko a a neng a le mo dikwalelong tsa ntlha, tse o neng wa di tšhwetlakanya, mme o di beye mo letloleng.’
3 Ka jalo ke ne ka dira letlole la logong lwa mokala mme ka seta dikwalelo tse pedi tsa leje tse di tshwanang le tsa ntlha+ ke bo ke tlhatlogela mo thabeng, mme dikwalelo tse pedi di ne di le mo seatleng sa me.
4 Foo a kwala mo dikwalelong tseno mokwalo o o tshwanang le wa ntlha,+ Mafoko a a Lesome,+ a Jehofa a neng a a buile le lona mo thabeng go tswa mo gare ga molelo+ mo letsatsing la phuthego;+ morago ga moo Jehofa a di nnaya.
5 Foo ka retologa ka fologa mo thabeng+ mme ka baya dikwalelo tseno mo letloleng le ke neng ke le dirile, gore di nne mo go lone, fela jaaka Jehofa a ne a ntaetse.+
6 “Mme bomorwa Iseraele ba bolola mo Beerothe Bene-jaakane+ ba ya Mosera. Arone a swela gone, mme a fitlhwa gone;+ mme Eliasare morwawe a simolola go dira e le moperesiti mo boemong jwa gagwe.+
7 Go tswa koo ba bolola ba ya kwa Gudegoda, go tswa Gudegoda ba ya Jotebatha,+ lefatshe la mekgatšha e e phothoselang e e elang metsi.
8 “Ka yone nako eo Jehofa a lomolola lotso lwa ga Lefi+ gore lo sikare letlole la kgolagano+ ya ga Jehofa, gore lo eme fa pele ga ga Jehofa lo mo direle+ le go baka mo leineng la gagwe go fitlha mo letsatsing leno.+
9 Ke gone ka moo Lefi a se kileng a nna le kabelo le boswa+ le bomorwarraagwe. Jehofa ke boswa jwa gagwe, fela jaaka Jehofa Modimo wa gago a ne a mmoleletse.+
10 Mme nna—ke ne ka nna mo thabeng fela jaaka mo malatsing a ntlha, malatsi a le masome a manè le masigo a le masome a manè,+ mme Jehofa a ntheetsa le mo lobakeng loo.+ Jehofa o ne a sa batle go go senya.+
11 Foo Jehofa a nthaya a re, ‘Nanoga, ya fa pele ga batho gore go bololwe, gore ba tsene ba rue lefatshe le ke ikanetseng borraabonemogologolwane gore ke tla le ba naya.’+
12 “Jaanong wena Iseraele, ke eng se Jehofa Modimo wa gago a se kopang mo go wena+ fa e se go boifa+ Jehofa Modimo wa gago, gore o tsamaye mo ditseleng tsotlhe tsa gagwe+ le go mo rata+ le go direla Jehofa Modimo wa gago ka pelo yotlhe ya gago le ka moya otlhe wa gago;+
13 go boloka ditaelo tsa ga Jehofa le melao+ ya gagwe e ke e go laolelang gompieno, gore o solegelwe molemo?+
14 Bona, magodimo ke a ga Jehofa Modimo wa gago,+ le eleng magodimo a magodimo, lefatshe+ le tsotlhe tse di mo go lone.
15 Jehofa o ne a ikgolaganya le borragomogologolwane fela gore a ba rate, mo a neng a tlhopha bana ba bone morago ga bone,+ e leng lona, mo ditšhabeng tsotlhe, jaaka mo letsatsing leno.
16 Mme lo rupise letlalo la bonna la dipelo+ tsa lona mme lo se ka lwa tlhola lo thatafatsa dithamo tsa lona.+
17 Gonne Jehofa Modimo wa lona ke Modimo wa medimo+ le Morena wa barena,+ Modimo yo mogolo, yo o thata le yo o boitshegang,+ yo o sa tshwareng ope ka go mo tlhaola+ e bile a sa amogele pipamolomo,+
18 yo o atlholelang mosimane yo o se nang rre le motlholagadi+ le yo o ratang moagi wa moeng+ gore a mo neye senkgwe le seaparo.
19 Le lona lo rate moagi wa moeng, gonne lo ne lwa nna baagi ba baeng+ kwa lefatsheng la Egepeto.+
20 “O boife Jehofa Modimo wa gago.+ O mo direle,+ o mo ngaparele,+ mme o dire maikano ka leina la gagwe.+
21 Ke Ene yo o tshwanetseng go mmaka,+ e bile ke Modimo wa gago, yo o go diretseng dilo tseno tse dikgolo tse di boitshegang tse matlho a gago a di boneng.+
22 Borragomogologolwane ba ne ba fologela kwa Egepeto+ ka meya e le masome a supa, jaanong Jehofa Modimo wa gago o go dirile gore o nne jaaka dinaledi tsa magodimo ka bontsi.+
