Esekiele 12:1-28
12 Mme lefoko la ga Jehofa la tswelela go tla mo go nna, le re:
2 “Morwa motho, o nna mo gare ga ba ntlo ya botsuolodi,+ ba ba nang le matlho a go bona mme tota ba sa bone,+ ba ba nang le ditsebe tsa go utlwa mme tota ba sa utlwe,+ gonne ke ba ntlo ya botsuolodi.+
3 Fa e le wena, morwa motho, ipaakanyetse thoto ya go ya botshwarwa mme o ye botshwarwa motshegare fa pele ga matlho a bone, mme o ye botshwarwa go tswa mo lefelong la gago go ya kwa lefelong le lengwe fa pele ga matlho a bone. Gongwe ba tla bona, le fa e le ba ntlo ya botsuolodi.+
4 Mme o ntshe thoto ya gago jaaka thoto ya botshwarwa motshegare fa pele ga matlho a bone, mme o tswe go le maitseboa fa pele ga matlho a bone jaaka ba ba isiwang botshwarwa.+
5 “Phunyeletsa lobota fa pele ga matlho a bone, mme o ntshe ka lone.+
6 O e sikare ka legetla fa pele ga matlho a bone. O e ntshe go le lefifi. O bipe sefatlhego sa gago gore o se ka wa bona lefatshe, ka gonne ke go dirile kgakgamatso+ mo ntlong ya Iseraele.”+
7 Mme ka dira fela jaaka ke ne ke laetswe.+ Ka ntsha thoto ya me, fela jaaka thoto ya botshwarwa, go le motshegare; mme maitseboa ka phunyeletsa lobota ka seatla. Ka e ntsha go le lefifi. Ka e sikara ka legetla, fa pele ga matlho a bone.
8 Mme lefoko la ga Jehofa la tswelela pele go tla mo go nna mo mosong, le re:
9 “Morwa motho, a ba ntlo ya Iseraele, ntlo ya botsuolodi,+ ga ba a go raya ba re, ‘O dirang?’
10 Ba reye o re, ‘Morena Molaodimogolo Jehofa o buile jaana: “Fa e le kgosana+ yone, polelo ke eno kgatlhanong le Jerusalema le botlhe ba ntlo ya Iseraele ba ba mo gare ga bone.”’
11 “O re, ‘Ke nna kgakgamatso+ mo go lona. Ba tla dirwa ka yone tsela e ke dirileng ka yone. Ba tla faladiwa, ba tla ya botshwarwa.+
12 Mme fa e le kgosana e e mo gare ga bone, e tla sikara ka legetla go le lefifi e bo e tswa; ba tla phunyeletsa lobota gore ba ntshe ka lone.+ E tla bipa sefatlhego sa yone gore e se ka ya bona lefatshe ka leitlho la yone.’
13 Ruri ke tla tsharolola letlowa la me mo godimo ga yone, mme e tla tshwarwa mo letloweng la me la go tsoma;+ foo ke tla e tlisa Babelona, kwa lefatsheng la Bakaladia,+ mme ga e kitla e le bona; e tla swela kwa go lone.+
14 Mme botlhe ba ba e dikologileng gore ba e thuse, le mephato ya yone yotlhe ya sesole, ke tla e gasamisetsa kwa phefong nngwe le nngwe;+ mme ke tla somola tšhaka kwa morago ga bone.+
15 Mme ba tla itse gore ke nna Jehofa fa ke ba phatlalatsa mo ditšhabeng ke bo ke ba gasamisa mo mafatsheng.+
16 Mme mo go bone ke tla tlogela banna ba le mmalwa ba falotse tšhaka,+ leuba le bolwetse jwa leroborobo, gore ba tle ba anele dilo tsotlhe tsa bone tse di makgapha+ mo ditšhabeng tse ba tla tsenang mo go tsone;+ mme ba tla itse gore ke nna Jehofa.”
17 Mme lefoko la ga Jehofa la tswelela pele go tla mo go nna, le re:
18 “Morwa motho, o je senkgwe sa gago ka go roroma, mme o nwe metsi a gago ka khuduego le ka go tshwenyega ka tlhobaelo.+
19 Mme o reye batho ba lefatshe o re, ‘Morena Molaodimogolo Jehofa o reile banni ba Jerusalema ba ba mo godimo ga lefatshe la Iseraele+ a re: “Ba tla ja senkgwe sa bone ba tshwenyega ka tlhobaelo, e bile ba tla nwa metsi a bone ka letshogo, gore lefatshe la yone le kgakgabadiwe ka botlalo+ ka ntlha ya thubakanyo ya botlhe ba ba nnang mo go lone.+
20 Mme metse e e nniwang e tla swafadiwa,+ le lefatshe le tla nna kgakgabalo+ fela; mme lo tla itse gore ke nna Jehofa.”’”+
21 Mme lefoko la ga Jehofa la tswelela go tla mo go nna, le re:
22 “Morwa motho, polelo eno ya seane e lo nang le yone mo lefatsheng la Iseraele+ ke eng, e e reng, ‘Malatsi a lelefaditswe,+ mme ponatshegelo nngwe le nngwe e nyeletse’?
23 Ka jalo ba reye o re, ‘Morena Molaodimogolo Jehofa o buile jaana: “Ruri ke tla khutlisa polelo eno ya seane, mme ga ba kitla ba tlhola ba e bua jaaka seane mo Iseraele.”’+ Mme o bue le bone o re, ‘Malatsi a atametse,+ le kgang ya ponatshegelo nngwe le nngwe.’
24 Gonne ga go kitla go tlhola go nna le ponatshegelo epe e e se nang mosola+ le fa e le boitseanape jwa boitimokanyo mo gare ga ntlo ya Iseraele.+
25 ‘“Gonne nna, Jehofa, ke tla bua lefoko le ke tla le buang, mme le tla dirwa.+ Ga go kitla go tlhola go busediwa morago,+ gonne mo malatsing a lona,+ lona ntlo ya botsuolodi, ke tla bua lefoko mme ruri ke le dire,” go bua Morena Molaodimogolo Jehofa.’”
26 Mme lefoko la ga Jehofa la tswelela go tla mo go nna, le re:
27 “Morwa motho, bona! ba ntlo ya Iseraele ba re, ‘Ponatshegelo e a e bonang e saletswe ke malatsi a mantsi, mme o porofeta ka ga dinako tse di kgakala.’+
28 Ka jalo ba reye o re, ‘Morena Molaodimogolo Jehofa o buile jaana: “‘Ga go kitla go tlhola go busediwa morago ka ga mafoko ape a me.+ Lefoko lepe le ke tla le buang, ruri le tla diragadiwa,’+ go bua Morena Molaodimogolo Jehofa.”’”+
