Esekiele 20:1-49
20 Jaanong ga diragala mo ngwageng wa bosupa, mo kgweding ya botlhano, mo letsatsing la bolesome la kgwedi, gore banna go tswa mo go ba bagolwane ba Iseraele ba tle go botsa mo go Jehofa,+ mme ba nna fa fatshe fa pele ga me.+
2 Foo lefoko la ga Jehofa la tla mo go nna, le re:
3 “Morwa motho, bua le banna ba bagolwane ba Iseraele, mme o ba reye o re, ‘Morena Molaodimogolo Jehofa o buile jaana: “A lo tlile go botsa mo go nna?+ ‘Jaaka ke tshedile, ga nkitla ke bodiwa ke lona,’+ go bua Morena Molaodimogolo Jehofa.”’
4 “A o tla ba atlhola? A o tla ba atlhola, wena morwa motho?+ Dira gore ba itse dilo tse di makgapha tsa borraabonemogologolwane.+
5 Mme o ba reye o re, ‘Morena Molaodimogolo Jehofa o buile jaana: “Mo letsatsing la fa ke tlhopha Iseraele,+ gape ke ne ka tsholetsa seatla+ sa me ke ikanela losika lwa ba ntlo ya ga Jakobe+ le go ba ikitsise mo lefatsheng la Egepeto.+ Ee, ke ne ka tsholetsa seatla sa me ke ba ikanela, ke re, ‘Ke nna Jehofa Modimo wa lona.’+
6 Mo letsatsing leo ke ne ka tsholetsa seatla+ sa me ke ba ikanela gore ke tla ba ntsha mo lefatsheng la Egepeto ke ba isa kwa lefatsheng le ke neng ke tswa go le ba tlholela, le le elang mashi le tswina ya dinotshe.+ E ne e le mokgabiso wa mafatshe otlhe.+
7 Mme ka tswelela ka ba raya ka re, ‘A mongwe le mongwe wa lona a latlhe dilo tse di ferosang sebete tsa matlho a gagwe,+ mme lo se ka lwa iteswafatsa ka medingwana e e makgapha ya Egepeto.+ Ke nna Jehofa Modimo wa lona.’+
8 “‘“Mme ba simolola go ntsuologela,+ mme ba se ka ba dumela go ntheetsa. Mongwe le mongwe wa bone ga a ka a latlha dilo tse di ferosang sebete tsa matlho a gagwe, le medingwana e e makgapha ya Egepeto ga ba a ka ba e tlogela,+ mo ke neng ka solofetsa go tshololela tšararego ya me mo go bone, gore ke feleletse bogale jwa me mo go bone mo gare ga lefatshe la Egepeto.+
9 Mme ke ne ka tsaya kgato ka ntlha ya leina la me gore le se ka la itshepololwa fa pele ga matlho a ditšhaba tse ba neng ba le mo gare ga tsone,+ ka gonne ke ne ke ba ikitsisitse fa pele ga matlho a bone ka go ba ntsha kwa lefatsheng la Egepeto.+
10 Ka jalo ke ne ka ba ntsha mo lefatsheng la Egepeto ka ba tlisa mo nageng.+
11 “‘“Mme ka ba naya melao+ ya me; ka ba itsise ditshwetso tsa me tsa boatlhodi,+ gore motho yo o nnang a di dira a nne a tshela ka tsone.+
12 Mme ka ba naya le bosabata ba me,+ gore e nne sesupo fa gare ga me le bone,+ gore ba tle ba itse fa e le nna Jehofa yo ke ba itshepisang.
13 “‘“Mme bone, ba ntlo ya Iseraele, ba ne ba ntsuologela kwa nageng.+ Ga ba a ka ba tsamaya mo melaong ya me,+ mme ba ne ba gana ditshwetso tsa me tsa boatlhodi,+ tse fa motho a ka tswelela a di dira, a tla nnang a tshela ka tsone.+ Mme ba ne ba itshepolola bosabata ba me thata,+ mo ke neng ka solofetsa go tshololela tšhakgalo ya me mo go bone kwa nageng, gore ke ba fedise.+
14 Mme ke ne ka tsaya kgato ka ntlha ya leina la me gore le se ka la itshepololwa fa pele ga matlho a ditšhaba tse ke neng ke ba tlisitse fa pele ga matlho a tsone.+
15 Mme ke ne ka tsholetsa seatla sa me ke ba ikanela kwa nageng,+ gore ga ke na ke ba tlisa mo lefatsheng le ke neng ke le ba neile, le le elang mashi le tswina ya dinotshe,+ (ke mokgabiso wa mafatshe otlhe,)+
16 ka lebaka la gore ba ne ba gana ditshwetso tsa me tsa boatlhodi; mme fa e le ka melao ya me, ga ba a ka ba tsamaya mo go yone, mme ba ne ba itshepolola bosabata ba me, ka gonne pelo ya bone e ne e setse medingwana ya bone e e makgapha morago.+
17 “‘“Mme leitlho la me la simolola go ba utlwela botlhoko gore ke se ka ka ba senya,+ mme ka se ka ka ba fedisa kwa nageng.
18 Mme ka raya bomorwaabone kwa nageng+ ka re, ‘Lo se ka lwa tsamaya mo melaong ya borraalonamogologolwane,+ le dikatlholo tsa bone lo se ka lwa di boloka,+ mme lo se ka lwa iteswafatsa ka medingwana ya bone e e makgapha.+
19 Ke nna Jehofa Modimo wa lona.+ Tsamayang mo melaong ya me,+ lo boloke ditshwetso tsa me tsa boatlhodi+ lo di dire.+
20 Mme lo itshepise bosabata ba me,+ mme ba nne sesupo fa gare ga me le lona, gore lo itse fa ke le Jehofa Modimo wa lona.’+
21 “‘“Mme barwa ba simolola go ntsuologela.+ Ga ba a ka ba tsamaya mo melaong ya me, le ditshwetso tsa me tsa boatlhodi ga ba a ka ba di boloka ka go di dira, tse fa motho a ka tswelela a di dira, a tla nnang a tshela ka tsone.+ Ba ne ba itshepolola bosabata ba me.+ Ka jalo ke ne ka solofetsa go tshololela tšararego ya me mo go bone, gore ke feleletse bogale jwa me mo go bone kwa nageng.+
22 Mme ke ne ka busa seatla+ sa me ka tsaya kgato ka ntlha ya leina la me, gore le se ka la itshepololwa fa pele ga matlho a ditšhaba tse ke neng ke ba tlisitse fa pele ga matlho a tsone.+
23 Gape, ke ne ka tsholetsa seatla sa me ke ba ikanela kwa nageng,+ gore ke tla ba gasamisa mo gare ga ditšhaba ke bo ke ba phatlalatsa mo mafatsheng,+
24 ka lebaka la gore ga ba a ka ba diragatsa ditshwetso tsa me tsa boatlhodi+ mme ba ganne melao+ ya me ba bo ba itshepolola bosabata+ ba me, mme matlho a bone a ne a setse medingwana e e makgapha ya borraabonemogologolwane morago.+
25 Mme ke ne ka letla gore ba nne le melao e e neng e sa siama le ditshwetso tsa boatlhodi tse ba neng ba ka se ka ba tswelela ba tshela ka tsone.+
26 Mme ke ne ke ba letla gore ba leswafadiwe ke dimpho tsa bone fa ba ne ba ralatsa ngwana mongwe le mongwe yo o bulang sebopelo molelo,+ gore ke tle ke ba kgakgabatse, gore ba tle ba itse gore ke nna Jehofa.”’+
27 “Ka jalo bua le ba ntlo ya Iseraele, wena morwa motho, mme o ba reye o re,+ ‘Morena Molaodimogolo Jehofa o buile jaana: “Mo kgannyeng eno, borraalonamogologolwane ba buile ka go nkgoba, ka go ntirela bosaikanyegeng.+
28 Mme ke ne ka ba tlisa mo lefatsheng+ le ke neng ka tsholetsa seatla sa me ka ikano gore ke tla le ba naya.+ E rile ba bona thota nngwe le nngwe e e godileng+ le setlhare sengwe le sengwe se se tletseng dikala, foo ba simolola go ntsha ditlhabelo tsa bone gone foo+ le go isa tshupelo ya bone e e kgopisang gone foo, le go tlisa gone foo menko ya bone e e ritibatsang+ le go tsholola ditshupelo tsa bone tsa senō+ gone foo.
29 Ka jalo ke ne ka ba raya ka re, ‘Lefelo le le kwa godimo le lo tlang kwa go lone le kaya eng, gore leina la lone le bidiwe Lefelo le le Kwa Godimo go tla go fitlha gompieno?’”’+
30 “Ka jalo raya ba ntlo ya Iseraele o re, ‘Morena Molaodimogolo Jehofa o buile jaana: “A lo iteswafatsa ka tsela ya borraalonamogologolwane,+ e bile a lo sala dilo tsa bone tse di ferosang sebete morago lo akafala?+
31 Le ka go tsholetsa dimpho tsa lona ka go ralatsa bomorwaalona molelo,+ a lo iteswafaletsa medingwana yotlhe ya lona e e makgapha go tla go fitlha gompieno?+ Go ntse go le jalo a ke tla bodiwa ke lona, ba ntlo ya Iseraele?”’+
“‘Jaaka ke tshedile,’ go bua Morena Molaodimogolo Jehofa, ‘Ga nkitla ke bodiwa ke lona.+
32 Mme se se tlang mo moyeng wa lona+ ruri ga se kitla se diragala,+ ka gonne lo a re: “A re nneng jaaka ditšhaba, jaaka malapa a mafatshe,+ ka go direla logong le leje.”’”+
33 “‘Jaaka ke tshedile,’ go bua Morena Molaodimogolo Jehofa, ‘ke tla lo busa+ jaaka kgosi ka seatla se se nonofileng le ka lebogo le le otlolotsweng+ le ka tšararego e e goromeditsweng.
34 Ke tla lo ntsha mo ditšhabeng, mme ke tla lo phutha mmogo go tswa mo mafatsheng a lo gasamiseditsweng kwa go one ka seatla se se nonofileng le ka lebogo le le otlolotsweng le ka tšararego e e goromeditsweng.+
35 Mme ke tla lo tlisa mo nageng ya ditšhaba+ ke ipeye mo katlholong le lona koo re lebane difatlhego.+
36 “‘Fela jaaka ke ne ka ipaya mo katlholong le borraalonamogologolwane kwa nageng ya lefatshe la Egepeto,+ fela jalo ke tla ipaya mo katlholong le lona,’ go bua Morena Molaodimogolo Jehofa.
37 ‘Ke tla lo fetisa kafa tlase ga thobane+ ke bo ke lo tsenya mo sebofong sa kgolagano.+
38 Mme ke tla tlosa batlhanogi le batlodi+ ba ba kgatlhanong le nna mo go lona, gonne ke tla ba ntsha mo lefatsheng la boagi jwa bone jwa boeng, mme ga ba kitla ba tla mo lefatsheng la Iseraele;+ mme lo tla itse gore ke nna Jehofa.’+
39 “Mme lona, ba ntlo ya Iseraele, Morena Molaodimogolo Jehofa o buile jaana, ‘Tsamayang, mongwe le mongwe wa lona a ye go direla medingwana ya gagwe e e makgapha.+ Mme morago ga moo fa lo sa ntheetsa, foo ga lo kitla lo tlhola lo itshepolola leina la me le le boitshepo ka dimpho tsa lona le ka medingwana ya lona e e makgapha.’+
40 “‘Gonne mo thabeng ya me e e boitshepo, mo thabeng ya bogodimo jwa Iseraele,’+ go bua Morena Molaodimogolo Jehofa, ‘ke gone kwa ntlo yotlhe ya Iseraele e feletse e tla ntirelang gone, mo lefatsheng.+ Ke tla ba ipelela koo, mme ke tla batla meneelo ya lona koo le mabutswapele a dineo tsa lona mo dilong tsotlhe tsa lona tse di boitshepo.+
41 Ke tla lo ipelela ka ntlha ya lonko lo lo ritibatsang,+ fa ke lo ntsha mo ditšhabeng mme ke lo phutha mmogo go tswa mo mafatsheng a lo gasamiseditsweng kwa go one,+ mme ke tla itshepisiwa mo go lona fa pele ga matlho a ditšhaba.’+
42 “‘Mme lo tla itse gore ke nna Jehofa,+ fa ke lo tlisa mo lefatsheng la Iseraele,+ mo lefatsheng le ke neng ka tsholetsa seatla sa me ka ikano gore ke tla le naya borraalonamogologolwane.
43 Mme koo ruri lo tla gakologelwa ditsela tsa lona+ le ditiro tsotlhe tsa lona tse lo iteswafaditseng ka tsone,+ mme lo tla ila difatlhego tsa lona ka ntlha ya dilo tsotlhe tsa lona tse di bosula tse lo di dirileng.+
44 Mme lo tla itse gore ke nna Jehofa+ fa ke tsaya kgato ka lona ka ntlha ya leina la me,+ e seng kafa ditseleng tsa lona tse di bosula kgotsa kafa ditirong tsa lona tse di boikepo,+ lona ntlo ya Iseraele,’ go bua Morena Molaodimogolo Jehofa.”
45 Mme lefoko la ga Jehofa la tswelela go tla mo go nna, le re:
46 “Morwa motho, lebisa sefatlhego+ sa gago ntlheng ya karolo ya borwa mme o rothisetse+ mafoko kwa borwa, o porofetele sekgwa sa naga ya borwa.
47 Mme o reye sekgwa sa borwa o re, ‘Utlwa lefoko la ga Jehofa. Morena Molaodimogolo Jehofa o buile jaana: “Bona, ke go tshubela molelo,+ mme o tla laila setlhare sengwe le sengwe se se sa ntseng se le bongola mo go wena le setlhare sengwe le sengwe se se omileng.+ Molelo o o gotsitsweng ga o kitla o tingwa,+ mme difatlhego tsotlhe di tla fisiwa ke one go tswa borwa go ya bokone.+
48 Mme botlhe ba nama ba tla bona gore nna, Jehofa, ke o tshubile, mo e leng gore ga o kitla o tingwa.”’”+
49 Mme ka re: “Ijoo Morena Molaodimogolo Jehofa! Ba bua kaga me ba re, ‘A ga a tlhame dipolelo tsa seane?’”+
