Esekiele 24:1-27
24 Mme lefoko la ga Jehofa la tswelela go tla mo go nna mo ngwageng wa borobabongwe, mo kgweding ya bolesome, mo letsatsing la bolesome la kgwedi, le re:
2 “Morwa motho, ikwalele leina la letsatsi, lone letsatsi leno. Kgosi ya Babelona e tsogologetse Jerusalema mo go lone letsatsi leno.+
3 Mme o tlhame polelo ya seane malebana le ntlo ya botsuolodi,+ mme o bue jaana kaga bone,
“‘Morena Molaodimogolo Jehofa o buile jaana: “Tlhatlayang pitsa e e molomomogolo e e apeelang; e tlhatleyeng lo bo lo tshele metsi mo go yone.+
4 Phuthelang ditokololo mo go yone,+ tokololo nngwe le nngwe e e siameng, serope le legetla; lo e tlatse ka marapo a a gaisang otlhe.
5 A go tsewe nku e e di gaisang tsotlhe,+ mme go tlhatlaganngwe dikota gore di dire lesakana kafa tlase ga yone. Bedisang ditokololo tsa yone, mme lo apeye marapo a yone mo go yone.”’”+
6 “Ka jalo Morena Molaodimogolo Jehofa o buile jaana, ‘A bo go latlhega motse wa ditiro tsa tshololo ya madi,+ pitsa e e molomomogolo e e apeelang, e ruse ya yone e leng mo go yone, le e ruse ya yone e sa tswang mo go yone! E ntshe,+ lenathwana le lenathwana la yone; go se ka ga latlhelwa bola bope malebana le yone.+
7 Gonne madi a yone a mo gare ga yone.+ O a beile mo godimo ga lefika le legolo le le phatsimang le le se nang sepe. Ga a ka a a tshela fa fatshe, gore a a bipe ka lorole.+
8 Gore a tsose tšararego ya go diragatsa pusoloso,+ ke beile madi a gagwe mo godimo ga lefika le legolo le le phatsimang le le bipologileng, gore a se ka a bipiwa.’+
9 “Ka jalo Morena Molaodimogolo Jehofa o buile jaana, ‘A bo go latlhega motse wa ditiro tsa tshololo ya madi!+ Le nna ke tla dira gore mokoa o nne mogolo.+
10 Ntsifatsa dikota. Gotsa molelo. Bedisa nama thata. Mme o tsholole moro, o letle marapo gore a nne mogote thata.
11 E emise e le lolea mo magaleng a yone gore e nne mogote; mme kgotlho ya yone e gotele, le boitshekologo jwa yone bo nyerolosiwe mo go yone.+ A ruse ya yone e lailwe.+
12 Matshwenyego! A lapisitse motho, mme bontsi jwa ruse ya yone ga bo tswe mo go yone.+ A e tsene mo molelong ka ruse ya yone!’
13 “‘Go ne go na le boitshwaro jo bo repileng mo boitshekologong jwa gago.+ Ke ka lebaka leo ke neng ka tshwanelwa ke go go phepafatsa, mme ga o a ka wa nna phepa mo boitshekologong jwa gago.+ Ga o kitla o tlhola o nna phepa go fitlha ke dira gore tšararego ya me e go ikhutsetse.+
14 Nna, Jehofa, ke buile.+ Go tla tla,+ mme ke tla tsaya kgato. Ga nkitla ke tlhokomologa,+ le gone ga nkitla ke utlwela botlhoko+ le fa e le go ikwatlhaya.+ Ba tla go atlhola kafa ditseleng tsa gago le kafa ditirong tsa gago,’+ go bua Morena Molaodimogolo Jehofa.”
15 Mme lefoko la ga Jehofa la tswelela go tla mo go nna, le re:
16 “Morwa motho, bona, ke tlosa selo se se eletsegang+ mo matlhong a gago ka titeo,+ mme o se ka wa ipetsa sehuba, le gone o se ka wa lela kgotsa dikeledi tsa gago tsa tswa.+
17 Fegelwa kwantle ga mafoko. O se ka wa hutsafalela ba ba suleng.+ Ipofe ka serwalo sa gago sa tlhogo,+ mme o rwale bompaatšhane ba gago mo dinaong.+ O se ka wa bipa ditedu tsa dipounama,+ le gone o se ka wa ja senkgwe sa batho.”+
18 Mme ke ne ka bua le batho mo mosong, mme kgabagare mosadi wa me a swa mo maitseboeng. Mme mo mosong ka dira fela jaaka ke ne ke laetswe.
19 Mme batho ba nna ba nthaya ba re: “A o ka se re bolelele gore dilo tseno tse o di dirang, di amana jang le rona?”+
20 Foo ka ba raya ka re: “Lefoko la ga Jehofa le tlile mo go nna, le re,
21 ‘Raya ntlo ya Iseraele o re: “Morena Molaodimogolo Jehofa o buile jaana, ‘Bonang, ke itshepolola lefelo la me le le boitshepo,+ boipelafatso jwa nonofo ya lona,+ selo se se eletsegang mo matlhong a lona+ le selo se se tlhomogelwang pelo ke moya wa lona, mme bomorwaalona le bomorwadialona ba lo ba tlogetseng kwa morago—ba tla wa ka tšhaka.+
22 Mme lo tla tshwanelwa ke go dira fela jaaka ke dirile. Ga lo kitla lo bipa+ ditedu tsa dipounama, e bile ga lo kitla lo ja senkgwe sa batho.+
23 Mme serwalo sa lona sa tlhogo se tla bo se le mo ditlhogong tsa lona, le bompaatšhane ba lona ba le mo dinaong tsa lona. Ga lo kitla lo ititaya le fa e le go lela,+ mme lo tla bola mo ditlolong tsa lona,+ mme lo tla fegelwa mongwe mo go yo mongwe.+
24 Mme Esekiele o fetogile kgakgamatso mo go lona.+ Lo tla dira kafa go sotlhe se a se dirileng. Fa go tla,+ lo tla itse gore ke nna Morena Molaodimogolo Jehofa.’”’”+
25 “Fa e le wena, morwa motho, a ga e kitla e nna mo letsatsing la fa ke tsaya kago ya bone ya phemelo mo go bone, selo se sentle se ba se itumelelang, selo se se eletsegang mo matlhong+ a bone le se se tlhologelelwang ke moya wa bone, bomorwaabone le bomorwadiabone,+ gore
26 mo letsatsing leo go tla tla mo go wena motho yo o falotseng go dira gore ditsebe di utlwe?+
27 Mo letsatsing leo molomo wa gago o tla bulegela motho yo o falotseng,+ o tla bua mme o se tlhole o nna semumu;+ ruri o tla nna kgakgamatso mo go bone,+ mme ba tla itse gore ke nna Jehofa.”+
