Esekiele 32:1-32
32 Mme ga diragala gape gore mo ngwageng wa bolesome le bobedi, mo kgweding ya bolesome le bobedi, mo letsatsing la ntlha la kgwedi, lefoko la ga Jehofa la tla mo go nna, le re:
2 “Morwa motho, tlhabeletsa pina ya khutsafalo kaga Faro kgosi ya Egepeto, mme o mo reye o re, ‘O didimaditswe jaaka tawana e e seriri+ ya ditšhaba.
“‘Mme o ntse o tshwana le setshedi se setonatona sa lewatle mo mawatleng,+ mme o ne wa nna wa phothosela mo dinokeng tsa gago mme wa nna wa kgobera metsi ka dinao tsa gago le go leswefatsa dinoka tsa one.’
3 “Morena Molaodimogolo Jehofa o buile jaana, ‘Ke tla tsharololela letlowa+ la me mo godimo ga gago ka phuthego ya ditšhaba di le dintsi, mme ruri di tla go tlisa ka letlowa la me le le gogwang.+
4 Mme ke tla go tlogela mo lefatsheng. Ke tla go latlhela mo godimo ga naga.+ Mme ke tla dira gore dibopiwa tsothe tse di fofang tsa magodimo di age mo go wena, mme ke tla kgotsofatsa dibatana tsa naga tsa lefatshe lotlhe+ mo go wena.
5 Mme ke tla baya nama ya gago mo dithabeng ke tlatse mekgatšha ka matlakala a gago.+
6 Mme ke tla dira gore lefatshe le nwe keleketlo ya gago, e leng madi+ a gago, mo dithabeng; mme melatswana e tla tladiwa ke mo go tswang mo go wena.’
7 “‘Mme fa o tima ke tla bipa magodimo ke bo ke fifatse dinaledi tsa one. Fa e le letsatsi lone, ke tla le bipa ka maru, mme ngwedi ga e kitla e letla lesedi la yone go phatsima.+
8 Dibonesi tsotlhe tsa lesedi kwa magodimong—ke tla di fifatsa ka ntlha ya gago, mme ke tla baya lefifi mo lefatsheng la gago,’ go bua Morena Molaodimogolo Jehofa.
9 “‘Mme ke tla kgopisa pelo ya ditšhaba di le dintsi fa ke tlisa batshwarwa ba ba tswang mo go wena mo gare ga ditšhaba ke ba tlisa mo mafatsheng a o neng o sa a itse.+
10 Mme ke tla dira gore ditšhaba di le dintsi di go gakgamalele,+ mme dikgosi tsa tsone di tla roroma ka letshogo ka ntlha ya gago fa ke kgatikanya tšhaka ya me mo difatlhegong tsa bone,+ mme di tla roroma nako nngwe le nngwe, mongwe le mongwe ka ntlha ya moya wa gagwe, mo letsatsing la go wa ga gago.’+
11 “Gonne Morena Molaodimogolo Jehofa o buile jaana, ‘Tšhaka ya kgosi ya Babelona e tla tla mo go wena.+
12 Ke tla dira gore boidiidi jwa gago bo we ka ditšhaka tsa ba ba thata, bapatiki ba ditšhaba, botlhe fela;+ mme ba tla thopa boipelafatso jwa Egepeto, mme boidiidi jotlhe jwa gagwe bo tla nyelediwa.+
13 Mme ke tla senya diruiwa tsotlhe tsa gagwe fa thoko ga metsi a mantsi,+ mme lonao lwa motho wa mo lefatsheng ga lo kitla lo tlhola lo a kgobera,+ le fa e le ditlhakwana tsa seruiwa ga di kitla di a kgobera.’
14 “‘Ka nako eo ke tla dira gore metsi a bone a itsheke, le dinoka tsa bone ke tla dira gore di elele fela jaaka leokwane,’ go bua Morena Molaodimogolo Jehofa.
15 “‘Fa ke dira lefatshe la Egepeto kgakgabalo mme lefatshe le kgakgabetse ka botlalo,+ fa ke kgemetha banni botlhe ba ba mo go lone, le bone ba tla itse gore ke nna Jehofa.+
16 “‘Eno ke pina ya khutsafalo, mme ruri batho ba tla e tlhabeletsa. Tota le barwadi ba ditšhaba ba tla e tlhabeletsa; ba tla e tlhabeleletsa Egepeto le boidiidi jotlhe jwa yone,’+ go bua Morena Molaodimogolo Jehofa.”
17 Mme ga diragala gape gore mo ngwageng wa bolesome le bobedi, mo letsatsing la bolesome le botlhano la kgwedi, lefoko la ga Jehofa la tla mo go nna, le re:
18 “Morwa motho, lelela boidiidi jwa Egepeto ka bohutsana mme o bo folosetse kwa tlase,+ ene le bomorwadia ditšhaba tse di tlotlometseng, kwa lefatsheng kwa tlase,+ mmogo le ba ba fologelang mo kgatamping.+
19 “‘O itumedisa thata go feta mang?+ Ya kwa tlase, mme o ladiwe le ba ba sa rupang!’+
20 “‘Ba tla wela mo gare ga ba ba bolailweng ka tšhaka.+ O neilwe tšhaka. Mo gogeleng kgakala ene le boidiidi jotlhe jwa gagwe.
21 “‘Banna ba ba kwa pelepele ba bao ba leng thata ba tla bua le ene go tswa mo gare ga Sheole, le bathusi ba gagwe.+ Ruri ba tla fologa;+ ba tla lala jaaka ba ba sa rupang, ba bolailwe ka tšhaka.
22 Ke gone kwa Asiria le phuthego yotlhe ya gagwe e leng gone.+ O dikologilwe ke mafelo a gagwe a go fitlhela. Botlhe ba bolailwe, ba ba wang ka tšhaka.+
23 Gonne mafelo a gagwe a go fitlhela a tsentswe mo dikarolong tse di kwa tengteng tsa kgatampi,+ mme phuthego ya gagwe e mo tikologong ya phupu ya gagwe, botlhe ba bolailwe, ba ole ka tšhaka, ka gonne ba ne ba bakile letshogo mo lefatsheng la ba ba tshelang.
24 “‘Go na le Elama+ le boidiidi jwa gagwe jotlhe go dikologa phupu ya gagwe, botlhe e le ba ba bolailweng, ba ba oleng ka tšhaka, ba ba fologetseng kwa lefatsheng kwa tlase ba sa rupa, ba ba bakileng letshogo la bone mo lefatsheng la ba ba tshelang; mme ba tla sikara ditlhong tsa bone le ba ba fologelang mo kgatamping.+
25 Ba mmeetse bolao+ mo gare ga ba ba bolailweng mo gare ga boidiidi jotlhe jwa gagwe. Mafelo a gagwe a go fitlhela a bo dikologile. Botlhe ga ba a rupa, ba bolailwe ka tšhaka,+ ka gonne ba ne ba dirwa gore ba tshoge mo lefatsheng la ba ba tshelang; mme ba tla sikara ditlhong tsa bone le ba ba fologelang mo kgatamping. O beilwe mo gare ga ba ba bolailweng.
26 “‘Ke gone kwa Mesheke+ le Tubale+ le boidiidi jwa gagwe jotlhe bo leng gone. Mafelo a gagwe a go fitlhela a mo dikologile. Botlhe ga ba a rupa, ba tlhabilwe ka tšhaka, ka gonne ba bakile letshogo la bone mo lefatsheng la ba ba tshelang.
27 A mme ga ba kitla ba lala le ba ba thata,+ ba wa mo go ba ba sa rupang, ba ba fologetseng mo Sheole ka dibetsa tsa bone tsa ntwa? Mme ba tla tsenya ditšhaka tsa bone kafa tlase ga ditlhogo tsa bone, mme ditlolo tsa bone di tla nna mo marapong a bone,+ ka gonne ba ba thata ba ne ba tshosa mo lefatsheng la ba ba tshelang.+
28 Fa e le wena, o tla robaganngwa mo gare ga ba ba sa rupang, mme o tla lala le ba ba bolailweng ka tšhaka.
29 “‘Ke gone kwa Edoma,+ dikgosi tsa gagwe le dikgosana tsa gagwe tsotlhe di leng gone, bao mo thateng ya bone ba neng ba bewa mmogo le ba ba bolailweng ka tšhaka;+ bone ba tla lala le ba ba sa rupang+ le ba ba fologelang mo kgatamping.
30 “‘Ke gone kwa dikgosana tsa bokone di leng gone, tsotlhe fela, le Basidona+ botlhe, ba ba fologileng le ba ba bolailweng, mo go boifiseng ga bone ka ntlha ya thata ya bone, ba tlhabilwe ke ditlhong. Mme ba sa rupa ba tla lala le ba ba bolailweng ka tšhaka mme ba tla sikara ditlhong tsa bone le ba ba fologelang mo kgatamping.+
31 “‘Bano ke bone ba Faro a tla ba bonang, mme ruri o tla gomotsega ka ntlha ya boidiidi jotlhe jwa gagwe.+ Faro le mophato wa gagwe otlhe wa sesole e tla nna batho ba ba bolailweng ka tšhaka,’ go bua Morena Molaodimogolo Jehofa.
32 “‘Gonne o ne a dira gore a tshogwe mo lefatsheng la ba ba tshelang,+ mme o tla ladiwa mo gare ga ba ba sa rupang, le ba ba bolailweng ka tšhaka, ene Faro le boidiidi jwa gagwe jotlhe,’ go bua Morena Molaodimogolo Jehofa.”
