Esekiele 4:1-17
4 “Mme wena, morwa motho, itseele setena, mme o se beye fa pele ga gago mme o gabe motse mo go sone, e leng Jerusalema.+
2 Mme o o dikanyetse+ o bo o age lobota lo lo o dikanyetsang+ o bo o emise lorako lwa phemelo kgatlhanong le one+ o tlhome bothibelelo kgatlhanong le one mme o beye dikota tse di thubaganyang go o dikologa gotlhe fela.+
3 Mme fa e le wena, itseele pane e e gadikelang, mme o e beye jaaka lobota lwa tshipi fa gare ga gago le motse, mme o lebise sefatlhego sa gago kgatlhanong le one, mme o dikanyediwe, o o dikanyetse. Ke sesupo mo ntlong ya Iseraele.+
4 “Mme fa e le wena, lala ka letlhakore la gago la molema, mme o beye tlolo ya ntlo ya Iseraele mo go lone.+ O tla sikara tlolo ya bone ka palo ya malatsi a o tla bong o letse mo go lone ka one.
5 Mme nna ke tla go naya dingwaga tsa tlolo+ ya bone tse di fitlhang go palo ya malatsi a le makgolo a le mararo le masome a le robongwe,+ mme o tla sikara tlolo ya ntlo ya Iseraele.
6 Mme o a wetse.
“O lale ka letlhakore la gago la moja mo lekgetlong la bobedi, mme o sikare tlolo ya ntlo ya Juda malatsi a le masome a manè.+ Letsatsi le emela ngwaga, letsatsi le emela ngwaga, ke se ke se go neileng.+
7 Mme o lebise sefatlhego kwa go dikanyediweng ga Jerusalema,+ lebogo la gago le apotswe, mme o porofete kgatlhanong le ene.
8 “Mme bona! Ke tla baya megala+ mo go wena gore o se ka wa pitikologa mo letlhakoreng le lengwe wa ya kwa go le lengwe, go fitlha o weditse malatsi a go dikanyetsa ga gago.
9 “Mme fa e le wena, itseele korong+ le barele le dinawa tse dikima+ le dilentele+ le lebelebele le mabele a a tlhabang,+ o a tsenye mo selwaneng se le sengwe fela o itirele senkgwe ka one, sa palo ya malatsi a o a fetsang o robetse ka letlhakore; o tla a ja malatsi a le makgolo a le mararo le masome a le robongwe.+
10 Mme dijo tsa gago tse o tla di jang e tla nna tsa bokete jo bo lekanyeditsweng—dishekele di le masome a mabedi ka letsatsi.+ O tla di ja gangwe le gape.
11 “Mme metsi o tla a nwa ka selekanyo fela, karolo ya borataro ya hine. O tla nwa gangwe le gape.
12 “Mme o tla di ja jaaka kuku e kgolokwe ya barele;+ mme fa e le yone, o tla e besa mo godimo ga dibi tsa mantle+ a batho fa pele ga matlho a bone.”
13 Mme Jehofa a tswelela a re: “Bomorwa Iseraele ba tla ja senkgwe sa bone se le leswe+ fela jaana mo gare ga ditšhaba tse ke tla ba phatlalaletsang kwa go tsone.”+
14 Mme ka re: “Ijoo, Morena Molaodimogolo Jehofa! Bona! Moya wa me ga se o o leswafetseng;+ ga ke ise ke je setoto se se setseng se sule le fa e le phologolo e e garotsweng go tswa bosheng jwa me go ya pele,+ le go fitlha jaanong, mme ga go ise go tsene nama epe e e leswe+ mo molomong wa me.”
15 Ka jalo a nthaya a re: “Bona, ke go neile motshotelo wa dikgomo mo boemong jwa dibi tsa batho, mme o dire senkgwe sa gago mo go one.”
16 Mme a tswelela a nthaya a re: “Morwa motho, bona, ke robaganya dithobane tse dinkgwe tse di bopegileng jaaka maseka di lepeleditsweng+ mo go tsone, kwa Jerusalema, mme ba tla tshwanelwa ke go ja senkgwe sa bokete jo bo lekanyeditsweng le ka go tshwenyega ka tlhobaelo,+ mme ba tla nwa metsi ka selekanyo+ le ka letshogo,
17 ka boikaelelo jwa gore ba tlhaele senkgwe le metsi mme ba lebane ba akabetse ba bo ba bole mo tlolong ya bone.+
