Esekiele 45:1-25
45 “‘Mme fa lo aba lefatshe go nna boswa,+ lo isetse Jehofa moneelo,+ kabelo e e boitshepo e e tswang mo lefatsheng;+ fa e le ka boleele jwa yone, e nne boleele jwa dikubita di le dikete di le masome a mabedi le botlhano, mme fa e le ka bophara jwa yone, e nne dikete di le lesome.+ E tla bo e le kabelo e e boitshepo mo melelwaneng yotlhe ya yone mo tikologong yotlhe.
2 Mo go yone lefelo le le boitshepo le tla nna le makgolo a matlhano mo letlhakoreng lengwe le lengwe, le dirilwe go nna matlhakore a le manè a a lekalekanang go le dikologa;+ mme le tla nna le dikubita di le masome a matlhano mo letlhakoreng lengwe le lengwe e le mafulo a lone.
3 Mme mo selekanyong seno o lekanye boleele jwa dikete di le masome a mabedi le botlhano le boatlhamo jwa dikete di le lesome, mme lefelo le le boitshepo le tla nna mo go sone, selo se se boitshepotshepo.+
4 Le tla nna kabelo e e boitshepo mo lefatsheng ya baperesiti,+ badiredi ba lefelo le le boitshepo, ba ba atamelang ba tla go direla Jehofa.+ Mme e tla nna lefelo la bone la matlo, le lefelo le le itshepileng la lefelo le le boitshepo.
5 “‘Le tla nna le boleele jwa dikete di le masome a mabedi le botlhano le boatlhamo jwa dikete di le lesome.+ E tla nna la Balefi, badiredi ba Ntlo. Ba tla rua diphaposi tsa bojelo di le masome a mabedi.+
6 “‘Mme lo tla ntsha boatlhamo jwa dikete di le tlhano le boleele jwa dikete di le masome a mabedi le botlhano e le thuo ya motse, fela jaaka moneelo o o boitshepo.+ E tla nna ya ntlo yotlhe ya Iseraele.
7 “‘Mme kafa letlhakoreng leno le kafa letlhakoreng lele la moneelo o o boitshepo+ le thuo ya motse, fa thoko ga moneelo o o boitshepo le fa thoko ga thuo ya motse, kgosana e tla nna le sengwe kafa letlhakoreng la bophirima go ela ntlheng ya bophirima le sengwe kafa letlhakoreng la botlhaba go ela ntlheng ya botlhaba. Mme boleele bo tla bo bo le fela jaaka nngwe ya dikabelo, go tswa molelwaneng wa bophirima go ya molelwaneng wa botlhaba.+
8 Fa e le lefatshe lone, e tla nna la gagwe e le thuo mo Iseraele. Mme dikgosana tsa me ga di kitla di tlhola di tshwara batho ba me setlhogo,+ mme ba tla naya ba ntlo ya Iseraele lefatshe malebana le ditso tsa bone.’
9 “Morena Molaodimogolo Jehofa o buile jaana, ‘Go lekane ka lona, lona dikgosana tsa Iseraele!’+
“‘Tlosang thubakanyo le thopo,+ mme lo dire tshiamiso le tshiamo.+ Tlogelang go gapela batho ba me dithoto,’+ go bua Morena Molaodimogolo Jehofa.
10 ‘Lo nne le dikale tse di tlhomameng le ifa e e tlhomameng le selekanyo se se tlhomameng sa bata.+
11 Fa e le selekanyo sa ifa le sa bata, go nne le selekanyo se le sengwe fela se se beilweng, gore selekanyo sa bata se tshole nngwesomeng ya selekanyo sa homere le nngwesomeng ya selekanyo sa homere se tshole selekanyo sa ifa;+ mme selekanyo sa homere se nne le selekanyo sa sone se se batlegang.
12 Mme shekele+ ke digera di le masome a mabedi.+ Dishekele di le masome a mabedi, dishekele di le masome a mabedi le botlhano, dishekele di le lesome le botlhano e nne selekanyo sa lona sa mane.’
13 “‘Ono ke moneelo o lo tshwanetseng go o ntsha, karolo ya borataro ya ifa e tswa mo selekanyong sa homere sa korong, le karolo ya borataro ya ifa e tswa mo selekanyong sa homere sa barele;
14 mme fa e le kabelo ya leokwane yone, go na le selekanyo sa bata sa leokwane. Bata ke nngwesomeng ya selekanyo sa koro. Dibata di le lesome ke selekanyo sa homere; ka gonne dibata di le lesome ke selekanyo sa homere.
15 Le nku e le nngwe go tswa mo letsomaneng, go tswa mo go di le makgolo a mabedi tsa diruiwa tsa Iseraele,+ ya tshupelo ya dijo tsa ditlhaka+ le ya tshupelo e e fisiwang e feletse+ le ya ditlhabelo tsa kabalano,+ go ba direla tetlanyo,’+ go bua Morena Molaodimogolo Jehofa.
16 “‘Fa e le batho botlhe ba lefatshe bone, ba tla rwala boikarabelo jwa moneelo+ ono mo kgosaneng ya Iseraele.+
17 Mme ditshupelo tse di fisiwang di feletse+ le tshupelo ya dijo tsa ditlhaka+ le tshupelo ya senō+ e tla nna boikarabelo jwa kgosana+ mo meletlong+ le ka nako ya bongwedi ba basha+ le ka bosabata,+ ka dipaka tsotlhe tsa meletlo tsa ntlo ya Iseraele.+ Ke ene a tla isang tshupelo ya boleo le tshupelo ya dijo tsa ditlhaka le tshupelo e e fisiwang e feletse le ditlhabelo tsa kabalano, gore a direle ba ntlo ya Iseraele tetlanyo.’
18 “Morena Molaodimogolo Jehofa o buile jaana, ‘Mo kgweding ya ntlha, mo letsatsing la ntlha la kgwedi, o tseye powana, e tonanyana ya motlhape, e e itekanetseng sentle,+ mme o itshekise lefelo le le boitshepo mo boleong.+
19 Mme moperesiti a tseye mangwe a madi a tshupelo ya boleo a a beye mo mophakwaneng+ wa Ntlo le mo dikhutlong tse nnè tsa serepodi se se dikologileng sebeso+ le mo mophakwaneng wa kgoro ya lolwapa lo lo kwa teng.
20 Ke kafa o tla dirang ka gone mo letsatsing la bosupa mo kgweding ka ntlha ya motho ope yo o dirang phoso+ le ka ntlha ya motho ope yo o se nang maitemogelo; mme lo direle Ntlo+ tetlanyo.
21 “‘Mo kgweding ya ntlha, mo letsatsing la bolesome le bonè la kgwedi, lo nne le tlolaganyo.+ Go jewe dikuku tse di sa bedisiwang+ e le moletlo wa malatsi a le supa.
22 Mme mo letsatsing leo, kgosana e intshetse e bo e ntshetse batho botlhe ba lefatshe powana e le tshupelo ya boleo.+
23 Mme malatsi a le supa a moletlo+ a a ntshe dipowana di le supa le diphelefu di le supa tse di itekanetseng sentle go nna tshupelo e e fisiwang e feletse e e yang kwa go Jehofa, letsatsi le letsatsi malatsi a le supa,+ le podi e tonanyana go nna tshupelo ya boleo letsatsi le letsatsi.+
24 Gape a ntshe ifa ya powana le ifa ya phelefu go nna tshupelo ya dijo tsa ditlhaka, mme fa e le leokwane lone, hine ya ifa.+
25 “‘Mo kgweding ya bosupa, mo letsatsing la bolesome le botlhano la kgwedi, mo moletlong,+ a ntshe tse di tshwanang le tseno malatsi a le supa,+ go tshwana le tshupelo ya boleo, le tshupelo e e fisiwang e feletse, le tshupelo ya dijo tsa ditlhaka le leokwane.’”
