Esethere 3:1-15
3 Morago ga dilo tseno Kgosi Ahasueruse a godisa Hamane+ morwa Hamedatha wa Moagage+ mme a mo goletsa+ a bo a baya setulo sa gagwe sa bogosi kwa godimo ga dikgosana tse dingwe tsotlhe tse di neng di na le ene.+
2 Mme batlhanka botlhe ba kgosi ba ba neng ba le mo kgorong ya kgosi+ ba ne ba ikoba le go obama fa pele ga ga Hamane, gonne kgosi e ne e laetse jalo kaga gagwe. Mme fa e le Moredekai, o ne a sa ikobe le fa e le go obama.+
3 Mme batlhanka ba kgosi ba ba neng ba le mo kgorong ya kgosi ba simolola go raya Moredekai ba re: “Ke ka ntlha yang fa o tlhokomologa taelo ya kgosi?”+
4 Mme go ne ga diragala gore, fa ba ntse ba bua le ene letsatsi le letsatsi, mme a sa ba reetse, ba bolelela Hamane go bona gore a merero ya ga Moredekai e ne e tla ema;+ gonne o ne a ba boleletse gore ke Mojuda.+
5 Jaanong Hamane a nna a bona gore Moredekai o ne a sa ikobe le fa e le go obama fa pele ga gagwe,+ mme Hamane a galefa fela thata.+
6 Mme go ne go nyatsega mo matlhong a gagwe gore a ka baya Moredekai a le esi seatla, gonne ba ne ba mmoleletse kaga batho ba gagabo Moredekai; mme Hamane a simolola go batla go nyeletsa+ Bajuda botlhe ba ba neng ba le mo bogosing jotlhe jwa ga Ahasueruse, batho ba gagabo Moredekai.+
7 Mo kgweding ya ntlha,+ ke gore, kgwedi ya Nisane, mo ngwageng wa bolesome le bobedi+ wa ga Kgosi Ahasueruse, mongwe o ne a latlhela Pure,+ ke gore, Bola,+ fa pele ga ga Hamane letsatsi le letsatsi le kgwedi le kgwedi, go fitlha ka ya bolesome le bobedi, ke gore, kgwedi ya Adare.+
8 Mme Hamane a raya Kgosi Ahasueruse a re: “Go na le setšhaba sengwe se se gasameng+ se se itomolotseng mo gare ga ditšhaba mo dikgaolong tsotlhe tse di laolang tsa bogosi jwa gago;+ mme melao ya bone e farologane le ya batho ba bangwe botlhe, e bile ga ba dire melao ya kgosi,+ mme ga go a tshwanela gore kgosi e ba tlogele fela.
9 Fa go bonala go le molemo mo kgosing, a go kwalwe gore ba senngwe; mme ba ba dirang tiro+ eno ke tla ba duela ditalenta tsa selefera di le dikete di le lesome+ mo diatleng gore di tlisiwe mo bobolokela matlotlong jwa kgosi.”
10 Fa a rialo kgosi ya tlosa palamonwana ya yone e e tshwayang+ mo seatleng sa yone ya e naya Hamane+ morwa Hamedatha wa Moagage,+ ene yo o bontshang Bajuda bobaba.+
11 Mme kgosi ya raya Hamane ya re: “O newa selefera,+ mmogo le batho, gore o dire ka bone go ya kafa go leng molemo ka gone mo matlhong a gago.”+
12 Go tswa foo bakwaledi ba kgosi+ ba ne ba bidiwa ka kgwedi ya ntlha mo letsatsing la yone la bolesome le boraro, mme ga kwalwa+ go ya kafa go tsotlhe tse Hamane a neng a di laela dikgosana tsa kgosi tsa kgaolo ya naga le balaodi ba ba neng ba okametse dikgaolo tse di farologaneng tse di laolang,+ le dikgosana tsa ditšhaba tse di farologaneng, tsa kgaolo nngwe le nngwe e e laolang, ka mokgwa wa yone wa go kwala,+ le setšhaba sengwe le sengwe ka loleme lwa sone; go ne ga kwalwa ka leina+ la ga Kgosi Ahasueruse ga ba ga tshwaiwa ka palamonwana e e tshwayang+ ya kgosi.
13 Mme makwalo a ne a romelwa ka barongwa+ kwa dikgaolong tsotlhe tse di laolang tsa kgosi, go nyeletsa, go bolaya le go senya Bajuda botlhe, lekau mmogo le monnamogolo, ba bannye le basadi, ka letsatsi le le lengwe fela,+ ka letsatsi la bolesome le boraro la kgwedi ya bolesome le bobedi, ke gore, kgwedi ya Adare+ le go gapa thopo ya bone.+
14 Sekaelo sa mokwalo se se neng se tla ntshiwa e le molao+ mo dikgaolong tsotlhe tse di laolang+ tse di farologaneng se ne se itsisiwe phatlalatsa mo ditšhabeng tsotlhe, gore di ipaakanyetse letsatsi leno.
15 Barongwa ba ne ba tswa, ba tsamaya ka lobelo+ ka ntlha ya lefoko la kgosi, mme molao o ne wa newa kwa Shushane+ kago ya phemelo. Fa e le kgosi le Hamane, ba ne ba nna fa fatshe ba nwa;+ mme fa e le motse wa Shushane+ one, o ne o tlhakatlhakane.+
