Esethere 4:1-17
4 Mme Moredekai+ ka esi a tla go itse ka sengwe le sengwe se se neng se dirilwe;+ mme Moredekai a gagoganya diaparo tsa gagwe a ba a apara letsela la kgetsi+ le melora+ a ba a tswela kwa gare ga motse mme a goa ka selelo se se kwa godimo se se botlhoko.+
2 La bofelo a tla go fitlha fa pele ga kgoro ya kgosi,+ gonne go ne go se na ope yo o neng a tshwanetse go tsena mo teng ga kgoro ya kgosi ka diaparo tsa letsela la kgetsi.
3 Mme mo dikgaolong tsotlhe tse di farologaneng tse di laolang,+ gongwe le gongwe kwa lefoko la kgosi le molao wa yone o neng o fitlha gone, go ne go nna le khutsafalo e kgolo+ mo Bajudeng, le go itima dijo+ le go lela le go kuruetsa. Ba le bantsi ba ne ba ala letsela la kgetsi+ le melora+ go nna sekanamelo sa bone.
4 Mme barweetsana ba ga Esethere le baopafadiwa+ ba gagwe ba simolola go tsena ba tla go mmolelela. Mme kgosigadi e ne ya utlwa botlhoko thata. Foo ya romela diaparo gore e apese Moredekai le go tlosa letsela la kgetsi mo go ene. Mme a se ka a di amogela.+
5 Morago ga moo Esethere a bitsa Hathake,+ mongwe wa baopafadiwa ba kgosi, yo e neng e mo tlhomile gore a mo direle, mme a mo naya taelo kaga Moredekai, gore a itse gore seno se ne se kaya eng le gore seno se ne se bolela eng.
6 Ka jalo Hathake a tswela kwa go Moredekai kwa patlelong ya motse e e neng e le fa pele ga kgoro ya kgosi.
7 Mme Moredekai a mmolelela kaga dilo tsotlhe tse di neng di mo diragaletse+ le polelo e e tlhomameng ya madi a Hamane a neng a rile o tla a duela kwa bobolokela matlotlong jwa kgosi+ kgatlhanong le Bajuda, go ba senya.+
8 Mme a mo naya sekaelo+ sa mokwalo sa molao o o neng o neilwe kwa Shushane+ gore ba nyelediwe gore a se bontshe Esethere le go mmolelela le go mo laela+ gore a tsene kwa kgosing mme a mo rapele gore e mo utlwele botlhoko+ a ba a kopele batho ba gagabo+ ka tlhamalalo fa pele ga gagwe.
9 Jaanong Hathake+ a tsena mme a bolelela Esethere mafoko a ga Moredekai.
10 Foo Esethere a raya Hathake a ba a mo laela ka ga Moredekai+ a re:
11 “Batlhanka botlhe ba kgosi le batho ba dikgaolo tse di laolang tsa kgosi ba a itse gore, monna kgotsa mosadi mongwe le mongwe yo o tsenang kwa kgosing kwa lolwapeng+ lo lo kwa teng a sa bidiwa, molao+ wa gagwe o o osi fela ke gore a bolawe; fa fela kgosi e ka otlololela lore lwa yone lwa segosi lwa gouta kwa go ene, ruri o tla tswelela a tshela.+ Fa e le nna, ga ke ise ke bidiwe gore ke tsene kwa kgosing malatsi a le masome a mararo jaanong.”
12 Mme ba bolelela Moredekai mafoko a ga Esethere.
13 Foo Moredekai a re go fetolwe Esethere go twe: “O se ka wa ithaya mo moyeng wa gago wa re ba ntlo ya kgosi ba tla falola go feta Bajuda ba bangwe botlhe. +
14 Gonne fa o didimetse fela mo nakong eno, Bajuda ba tla bona kgololo go tswa lefelong le lengwe;+ mme fa e le wena le ba ntlo ya ga rrago, lo tla nyelela. Le gone ke mang yo o itseng gore o ka tswa o fitlheletse tlotlomalo ya segosi+ ka ntlha ya motlha o o ntseng jaana?”
15 Ka jalo Esethere a araba Moredekai a re:
16 “Tsamaya, phutha Bajuda botlhe ba ba tla fitlhelwang mo Shushane+ mme o itime dijo+ ka ntlha ya me mme o se ka wa ja kgotsa wa nwa malatsi a le mararo,+ bosigo le motshegare. Le nna le barweetsana ba me,+ ke tla itima dijo ka tsela e e tshwanang, mme morago ga moo ke tla tsena kwa kgosing, e le se se seng kafa molaong; mme fa e le gore ke tla nyelela,+ ke tla nyelela.”
17 Morago ga moo Moredekai a fetela pele mme a dira go ya ka sotlhe se Esethere a neng a se mo laetse.
