Johane 4:1-54
4 E rile, jaanong, Morena a lemoga gore Bafarasai ba ne ba utlwile gore Jesu o ne a dira barutwa ba ba oketsegileng go feta Johane e bile a ba kolobetsa+—
2 le mororo, tota, Jesu ka boene a ne a se ka a kolobetsa mme e le barutwa ba gagwe ba ba neng ba dira jalo—
3 a tloga kwa Judea mme a ya gape kwa Galalea.
4 Mme go ne go tlhokega gore a ralale Samarea.+
5 Jalo a tla mo motseng mongwe wa Samarea o o bidiwang Sikara gaufi le tshimo e Jakobe a e fileng Josefa morwawe.+
6 Tota e bile, motswedi wa ga Jakobe+ o ne o le koo. Jaanong Jesu a bo a ntse fela fa motsweding, a lapisitswe ke loeto. Ura e ne e ka nna ya borataro.
7 Mosadi mongwe wa Samarea a tla go ga metsi. Jesu a mo raya a re: “Ntshiele ke nwe.”
8 (Gonne barutwa ba gagwe ba ne ba dule ba ile kwa motseng go ya go reka dijo.)
9 Jalo mosadi wa Mosamarea a mo raya a re: “Go tla jang gore wena, le fa o le Mojuda, o bo o nkopa gore ke go nose, le mororo nna ke le mosadi wa Mosamarea?” (Gonne Bajuda ga ba dirisane le Basamarea.)+
10 Fa Jesu a araba a mo raya a re: “Fa o ne o itsile mpho ya mahala+ ya Modimo le gore ke mang yo+ o go rayang a re, ‘Ntshiele ke nwe,’ o ka bo o kopile ene, mme o ka bo a go neile metsi a a tshelang.”+
11 A mo raya a re: “Rra, ga o na le fa e le kgamelo ya go gelela metsi, mme sediba se boteng. Jalo, metsi a a tshelang ano o a tsaya kwa motsweding ofe?
12 Ga o mogolo+ go feta rraaronamogologolwane Jakobe, yo o neng a re fa sediba seno le yo ka boene mmogo le bomorwawe le dikgomo tsa gagwe ba neng ba nwa mo go sone, ga ke re?”
13 Fa Jesu a araba a mo raya a re: “Mongwe le mongwe yo o nwang metsi ano o tla nyorwa gape.
14 Le fa e le mang yo o nwang metsi a ke tla a mo nayang ga a kitla a nyorwa ka gope,+ mme metsi a ke tla a mo nayang a tla nna mo go ene motswedi wa metsi+ a a pomponyegang go naya botshelo jo bo sa khutleng.”+
15 Mosadi a mo raya a re: “Rra, nnaya metsi ano, gore ke se ka ka nyorwa le fa e le go nna ke tla mo lefelong leno go tla go ga metsi.”
16 A mo raya a re: “Tsamaya, o ye go bitsa monna wa gago mme lo tle mo lefelong leno.”
17 Fa mosadi a araba a re: “Ga ke na monna.” Jesu a mo raya a re: “O buile sentle wa re, ‘Ga ke na monna.’
18 Gonne o nnile le banna ba le batlhano, mme monna yo gone jaanong o nang le ene ga se monna wa gago. Seno o se buile ka boammaaruri.”
19 Mosadi a mo raya a re: “Rra, ke lemoga gore o moporofeti.+
20 Borraaronamogologolwane ba ne ba obamela mo thabeng eno;+ mme lona lo bolela gore Jerusalema ke lefelo le batho ba tshwanetseng ba obamela kwa go lone.”+
21 Jesu a mo raya a re: “Ntumela, mosadi, Nako e etla ya fa lo se kitla lo obamela+ Rara mo thabeng eno le fa e le kwa Jerusalema.+
22 Lona lo obamela se lo sa se itseng;+ rona re obamela se re se itseng, ka gonne poloko e tswa mo Bajudeng.+
23 Le fa go ntse jalo, nako e etla, le jaanong e fitlhile, ya fa baobamedi ba boammaaruri ba tla obamelang Rara ka moya+ le boammaaruri,+ gonne, eleruri, Rara o batla ba ba ntseng jalo go mo obamela.+
24 Modimo ke Moya,+ mme ba ba mo obamelang ba tshwanetse go obamela ka moya le ka boammaaruri.”+
25 Mosadi a mo raya a re: “Ke a itse gore Mesia+ o etla, yo o bidiwang Keresete.+ Motlhang ene yoo a gorogang, o tla re bolelela dilo tsotlhe ka tshosologo.”
26 Jesu a mo raya a re: “Nna yo ke buang le wena ke ene.”+
27 Jaanong ka nako eno barutwa ba gagwe ba goroga, mme ba simolola go gakgamala ka gonne o ne a bua le mosadi. Legale, ga se ka ga nna le ope yo o neng a re: “O batlang?” kgotsa, “Ke ka ntlha yang fa o bua le ene?”
28 Jalo, mosadi a tlogela nkgo ya gagwe ya metsi mme a tswa a ya kwa motseng mme a raya batho a re:
29 “Tlang kwano, lo bone monna yo o mpoleletseng dilo tsotlhe tse ke di dirileng. A yono gongwe ga se ene Keresete?”+
30 Ba tswa mo motseng mme ba tla kwa go ene.
31 Mo nakong eno barutwa ba ne ba mo emeletse, ba re: “Rabi,+ ja.”
32 Mme a ba raya a re: “Ke na le dijo tse ke di jang tse lo sa di itseng.”
33 Jalo barutwa ba simolola go raana ba re: “Ga go na ope yo o mo tliseditseng sengwe gore a je, ga ke re?”
34 Jesu a ba raya a re: “Dijo tsa me+ ke gore ke dire thato+ ya yo o nthomileng le go wetsa tiro ya gagwe.+
35 A ga lo re go sa ntse go na le dikgwedi di le nnè pele ga thobo e tla? Bonang! Ke a lo raya: Tsholetsang matlho a lona mme lo lebe masimo, gore a masweu go ka rojwa.+ E bile
36 morobi o setse a amogela dituelo gape o kgetla maungo a botshelo jo bo sa khutleng,+ gore mojadi le morobi+ ba tle ba ipele mmogo.+
37 Malebana le seno, eleruri, lefoko leno le boammaaruri, Yo mongwe ke mojadi mme yo mongwe ke morobi.
38 Ke lo rometse gore lo robe se lo sa dirang ka natla mo go sone. Ba bangwe ba dirile ka natla,+ mme lona lo tsene mo molemong wa tiro ya bone ya bonatla.”
39 Jaanong bontsi jwa Basamarea ba ba tswang mo motseng oo ba dumela+ mo go ene ka ntlha ya lefoko la mosadi yo e neng ya re a naya bosupi a re: “O mpoleletse dilo tsotlhe tse ke di dirileng.”+
40 Jalo e rile Basamarea ba tla kwa go ene, ba mo kopa gore a nne le bone; mme a nna koo malatsi a le mabedi.+
41 Ka gone ba le bantsi ba ba oketsegileng ba dumela ka ntlha ya se a neng a se bua,+
42 mme ba raya mosadi ba re: “Ga re tlhole re dumela ka ntlha ya puo ya gago; gonne re ikutlwetse ka borona+ mme re a itse gore monna yono ruri ke mmoloki+ wa lefatshe.”
43 Morago ga malatsi ano a mabedi a tloga koo a ya kwa Galalea.+
44 Le fa go ntse jalo, Jesu ka boene o ne a naya bosupi gore moporofeti ga a bone tlotlo mo nageng ya gagabo.+
45 Jalo e rile a goroga kwa Galalea, Bagalalea ba mo amogela, ka gonne ba ne ba bone dilo tsotlhe tse a neng a di dira kwa Jerusalema kwa moletlong,+ gonne le bone ba ne ba ile kwa moletlong.+
46 Jalo a tla gape kwa Kana+ wa Galalea, koo a neng a fetola metsi gore a nne beine gone.+ Jaanong go ne go na le motlhokomedi mongwe wa kgosi kwa Kaperenama+ yo morwawe a neng a bobola.
47 E rile monna yono a utlwa gore Jesu o ne a dule kwa Judea a ile Galalea, a tswa a ya kwa go ene mme a mo kopa gore a tle mme a fodise morwawe, gonne o ne a setse a tloga aa swa.
48 Le fa go ntse jalo, Jesu a mo raya a re: “Fa lo sa bone ditshupo+ le dikgakgamatso,+ ga lo kitla lo dumela ka gope.”
49 Motlhokomedi wa kgosi a mo raya a re: “Morena, tlaa pele ga ngwanake yo mmotlana aa swa.”
50 Jesu a mo raya a re: “Tsamaya;+ morwao o a tshela.”+ Monna yono a dumela lefoko le Jesu a neng a le bua le ene mme a tsamaya.
51 Mme fa a setse a le mo tseleng a boa, batlhanka ba gagwe ba mo kgatlhantsha go bolela gore mosimane wa gagwe o a tshela.+
52 Jalo a ba botsa ura e a neng a fola ka yone. Jalo ba mo raya ba re: “Maabane ka ura ya bosupa letshoroma+ le ne la mo tlogela.”
53 Jalo rre yono a itse gore e ne e le ka yone ura+ e Jesu a neng a mo raya a re: “Morwao o a tshela.” Mme ene le ba ntlo ya gagwe botlhe ba dumela.+
54 Gape seno e ne e le sesupo+ sa bobedi se Jesu a neng a se dira fa a ne a tswa kwa Judea a tsena mo Galalea.
