Mareko 1:1-45
1 Tshimologo ya dikgang tse di molemo kaga Jesu Keresete:
2 Fela jaaka go kwadilwe mo go Isaia moporofeti go twe: “(Bona! Ke romela morongwa wa me fa pele ga sefatlhego sa gago, yo o tla baakanyang tsela ya gago;)+
3 reetsang! mongwe o goa kwa nageng a re, ‘Baakanyang tsela ya ga Jehofa, tlhamalatsang ditsela tsa gagwe,’”+
4 Johane wa mokolobetsi o ne a tla mo nageng, a rera kolobetso e le tshwantshetso ya boikwatlhao gore go itshwarelwe maleo.+
5 Ka gone karolo yotlhe ya naga ya Judea le banni botlhe ba Jerusalema ba ya kwa go ene, mme a ba kolobetsa mo Nokeng ya Joredane, ba ipolela maleo a bone ka tshosologo.+
6 Jaanong Johane o ne a apere boboa jwa kamela le moitlamo wa letlalo mo lothekeng lwa gagwe,+ mme o ne a ja tsie+ le tswina ya dinotshe ya naga.+
7 Mme o ne a tle a rere, a re: “Morago ga me go tla mongwe yo o nonofileng go mpheta; ga ke a lekana go inama ke funolola dikgole tsa bompaatšhane ba gagwe.+
8 Nna ke ne ka lo kolobetsa ka metsi, mme ene o tla lo kolobetsa ka moya o o boitshepo.”+
9 Fa malatsi ao a ntse a tsweletse Jesu a tla a tswa kwa Nasaretha wa Galalea mme a kolobediwa ke Johane mo Joredane.+
10 Mme ka yone nako eo ya re a tlhatloga a tswa mo metsing a bona magodimo a kgaogana, le moya o fologela mo go ene jaaka lephoi;+
11 mme lentswe la tswa kwa magodimong la re: “O Morwaake, moratwa; ke go amogetse.”+
12 Mme ka yone nako eo moya wa mo patelela go tsena mo nageng.+
13 Jalo a tswelela a le mo nageng malatsi a le masome a manè,+ a raelwa ke Satane,+ mme o ne a na le dibatana tsa naga, le fa go ntse jalo baengele ba ne ba mo direla.+
14 Jaanong ya re Johane a sena go tshwarwa, Jesu a tsena mo Galalea,+ a rera dikgang tse di molemo tsa Modimo+
15 a re: “Nako e e tlhomilweng e diragaditswe,+ mme bogosi jwa Modimo bo atametse. Ikwatlhayeng,+ mme lo nne le tumelo mo dikgannyeng tse di molemo.”
16 Fa a ntse a tsamaya go bapa le lewatle la Galalea a bona Simone+ le Anderea morwarraagwe Simone ba latlhela matlowa a bone kwa le kwa mo lewatleng, gonne e ne e le batshwaraditlhapi.+
17 Jalo Jesu a ba raya a re: “Ntshalang morago, mme ke tla dira gore lo nne batshwari ba batho.”+
18 Mme ka yone nako eo ba tlogela matlowa a bone ba mo sala morago.+
19 Fa a sena go tsamaya sekgalanyana a bona Jakobe morwa Sebede le Johane morwarraagwe, tota e bile, e le fa ba ne ba ntse ba le mo mokorong wa bone ba rokaganya matlowa a bone;+
20 mme kwantle ga tiego a ba bitsa. Le bone ba tlogela rraabone Sebede mo mokorong a na le banna ba ba thapilweng mme ba tswa ba mo sala morago.
21 Mme ba tsena mo Kaperenama.+
E rile fela fa e nna sabata a tsena mo sinagogeng a simolola go ruta.
22 Ba tshwarwa ke kgakge ka ntlha ya tsela ya gagwe ya go ruta,+ ka e le moo a ne a ba ruta jaaka yo o nang le taolo, mme e seng jaaka bakwadi.+
23 Gape, ka yone nako eo mo sinagogeng ya bone go ne go na le motho yo o laolwang ke maatla a moya o o seng phepa, mme a goa,+
24 a re: “Re dirang ka wena, Jesu wena Monasaretha?+ A o tletse go re senya? Ke itse+ sentlentle gore o mang, o Moitshepi+ wa Modimo.”+
25 Jesu a o kgalema, a re: “Didimala, mme o tswe mo go ene!”+
26 Mme moya o o seng phepa, fa o sena go mo tshwarisa mototwane o bo o goa thata ka lentswe le le kwa godimo, wa tswa mo go ene.+
27 Ebu, batho botlhe ba ne ba akabetse thata mo ba neng ba simolola go tlotla, ba re: “Seno ke eng? Ke thuto e ntšha! O laela ka taolo le e leng meya e e seng phepa, mme e a mo utlwa.”+
28 Jalo pego kaga gagwe ya anamela gongwe le gongwe ka yone nako eo mo nageng yotlhe e e mo tikologong mo Galalea.+
29 Ka yone nako eo ba tswa mo sinagogeng mme ba tsena mo legaeng la ga Simone+ le Anderea ba na le Jakobe le Johane.
30 Jaanong mogogwadia Simone+ o ne a letse fa fatshe a tshwerwe ke letshoroma,+ mme ba akofa ba bolelela Jesu ka ga gagwe.
31 A ya kwa go ene a mo tsosa, a mo tshwara ka seatla; mme letshoroma la mo tlogela,+ mme a simolola go ba direla.+
32 Fa go sena go nna maitseboa, letsatsi le sena go phirima, batho ba simolola go mo tlisetsa botlhe ba ba neng ba lwala+ le ba ba neng ba laolwa ke madimona;+
33 mme motse otlhe o ne o phuthegetse fela fa kgorong.
34 Jalo a alafa ba le bantsi ba ba neng ba lwala dipobolo tse di farologaneng,+ a ba a leleka madimona a le mantsi, mme o ne a sa letle madimona go bua, ka gonne a ne a itse gore ke Keresete.+
35 E rile go sa le phakela, go santse go le lefifi, a tsoga a tswela kwa ntle a ya kwa lefelong le le se nang batho,+ mme koo a simolola go rapela.+
36 Le fa go ntse jalo, Simone le ba ba neng ba na le ene ba mo tsoma
37 ba bo ba mmona, mme ba mo raya ba re: “Batho botlhe ba a go batla.”
38 Mme a ba raya a re: “A re yeng golo gongwe go sele, mo metsanasetoropong e e fa gautshwane, gore ke tle ke rere+ le koo, gonne ke tletse jone boikaelelo jono.”+
39 Mme ruri a ya, a rera mo disinagogeng tsa bone mo Galalea yotlhe e bile a leleka madimona.+
40 Gape molepero mongwe a tla kwa go ene, a mo rapela e bile a obile lengole, a mo raya a re: “Fa fela o batla, o ka nntlafatsa.”+
41 Foo a tlhomoga pelo,+ mme ya re a otlolola seatla sa gagwe a mo ama, a mo raya a re: “Ke a batla. Ntlafala.”+
42 Mme ka yone nako eo lepero la nyelela mo go ene, mme a ntlafala.+
43 Mo godimo ga moo, a mo naya ditaelo tse di gagametseng mme a akofa a mo letla gore a tsamaye,
44 mme a mo raya a re: “Tlhokomela gore o se ka wa bolelela ope le fa e le sepe, mme tsamaya o ye go ipontsha moperesiti+ o bo o ise tshupelo ya dilo tse Moshe a di laetseng,+ o e isetse go ntlafadiwa ga gago, gore e nne bosupi mo go bone.”+
45 Fa a sena go tsamaya, monna yono a simolola go bolela seno mo gogolo fela thata a ba a anamisetsa tiragalo eno kwa kgakala, mo Jesu a neng a sa tlhole a kgona go tsena mo motseng pepenene, mme a tswelela a le kwa ntle mo mafelong a a se nang batho. Le fa go ntse jalo ba nna ba tla kwa go ene ba tswa dintlheng tsotlhe.+
