Mathaio 14:1-36
14 Ka yone nako eo Herode, mmusi wa kgaolo, a utlwa pego kaga Jesu+
2 mme a raya batlhanka ba gagwe a re: “Yono ke Johane Mokolobetsi. O tsositswe mo baswing, mme ke gone ka moo ditiro tse di maatla di dirang mo go ene.”+
3 Gonne Herode o ne a ile a tshwara Johane mme a mo golega a ba a mo latlhela mo kgolegelong ka ntlha ya ga Herodiase mosadi wa ga Filipo morwarraagwe.+
4 Gonne Johane o ne a ntse a mo raya a re: “Ga go kafa molaong gore o bo o mo tsere.”+
5 Le fa go ntse jalo, le mororo a ne a batla go mmolaya, o ne a boifa boidiidi, ka gonne ba ne ba tsaya gore ke moporofeti.+
6 Mme e rile letsatsi la go tsalwa+ ga ga Herode le ketekwa morwadia Herodiase a le binela mme a itumedisa Herode fela thata
7 mo a neng a mo solofetsa ka ikano gore o tla mo naya le fa e le eng se a se kopang.+
8 Mme ene, a laetswe ke mmaagwe, a re: “Mpha fano mo mogopong tlhogo ya ga Johane Mokolobetsi.”+
9 Le fa kgosi e ne e hutsafetse, ka ntlha ya maikano a yone le ka ntlha ya ba ba ntseng ka go sekama le ene ya laela gore a e newe;+
10 mme ya roma gore Johane a kgaolwe tlhogo kwa kgolegelong.
11 Mme tlhogo ya gagwe e ne ya tlisiwa ka mogopo ya newa morweetsana, mme a e tlisa kwa go mmaagwe.+
12 Labofelo barutwa ba gagwe ba tla mme ba tlosa setopo ba mo fitlha+ mme ba tla ba begela Jesu.
13 Fa Jesu a utlwa seno a tswa koo ka mokoro a ya kwa lefelong le le se nang batho gore a nne a le nosi;+ mme boidiidi, ya re bo utlwa ka gone, jwa mo sala morago ka dinao bo tswa kwa metseng.
14 Jaanong e rile a tswa a bona boidiidi jo bogolo; mme a utlwa a ba tlhomogela pelo,+ mme a alafa babobodi ba bone.+
15 E rile go nna maitseboa barutwa ba gagwe ba tla mo go ene ba re: “Lefelo leno ga le na batho mme nako e setse e ile; naya boidiidi jono tsela, gore ba tsene mo metsaneng ba ithekele dilo tse ba tla di jang.”+
16 Le fa go ntse jalo, Jesu a ba raya a re: “Ga ba tlhoke go tsamaya: ba neyeng sengwe se ba ka se jang.”+
17 Ba mo raya ba re: “Ga re na sepe fano fa e se dinkgwe tse tlhano le ditlhapi tse pedi.”+
18 A re: “Di tliseng kwano mo go nna.”
19 Morago ga moo a laela boidiidi gore bo nne ka go sekama mo bojannyeng mme a tsaya dinkgwe tse tlhano le ditlhapi tse pedi, mme, ya re a lelalela kwa legodimong, a di segofatsa+ mme, fa a sena go ngathoganya dinkgwe, a di abela barutwa, barutwa le bone ba di abela boidiidi.+
20 Jalo botlhe ba ja ba bo ba kgora, mme ba sela mo go setseng ga manathwana, a tlala diroto di le lesome le bobedi.+
21 Le fa go ntse jalo ba ba jang e ne e ka nna banna ba le dikete di le tlhano, kwantle ga basadi le bana ba babotlana.+
22 Go tswa foo, kwantle ga tiego, a patelela barutwa ba gagwe gore ba palame mokoro ba tsamaye pele ga gagwe go ya ka kwa moseja, fa a ntse a naya boidiidi tsela.+
23 Kgabagare, ya re a sena go naya boidiidi tsela, a tlhatlogela kwa thabeng a le nosi go ya go rapela.+ Le fa go ne go nna lotlatlana, o ne a le koo a le nosi.
24 Mo nakong eno mokoro o ne o le bokgakala jwa makgolokgolo a dimitara go tswa fa lefatsheng, o tshwarisitswe bothata ke makhubu,+ ka gonne phefo e ne e tlhabagana le bone.
25 Mme ka lobaka lwa tebelo ya bonè ya bosigo a tla kwa go bone, a tsamaya mo godimo ga lewatle.+
26 E rile barutwa ba tshogana ka ba mmona a tsamaya mo lewatleng, ba tshwenyega, ba re: “Ke sedimo!”+ Mme ba goa ka poifo.
27 Mme Jesu a akofa a bua le bone mafoko a a reng: “Nnang pelokgale, ke nna;+ se boifeng.”
28 Fa Petere a fetola a mo raya a re: “Morena, fa e le gore ke wena, ntaele gore ke tle kwa go wena mo godimo ga metsi.”
29 A re: “Tla!” Foo Petere, ya re a fologa mo mokorong,+ a tsamaya mo godimo ga metsi mme a ela kwa go Jesu.
30 Ya re a leba phefo ya matsubutsubu, a boifa mme, fa a sena go simolola go nwela, a goa a re: “Morena, mpoloka!”
31 Ka yone nako eo ya re Jesu a otlolola seatla sa gagwe a mo tshwara mme a mo raya a re: “Wena yo o nang le tumelo e potlana, ke ka ntlha yang fa o ne o fenngwa ke pelaelo?”+
32 Mme fa ba sena go palama mo mokorong, phefo ya matsubutsubu ya kokobela.
33 Foo ba ba mo mokorong ba obama fa pele ga gagwe, ba re: “Ruri o Morwa Modimo.”+
34 Mme ba kgabaganya ba tla fa lefatsheng mo Genesareta.+
35 Fa batho ba mo lefelong leo ba mo lemoga ba romela kwa nageng eo yotlhe e e mo tikologong, mme batho ba mo tlisetsa botlhe ba ba neng ba lwala.+
36 Mme ba simolola go mo rapela gore ba ame fela lekantsa la seaparo sa gagwe sa kafa ntle;+ mme botlhe ba ba neng ba le ama ba ne ba fodisiwa ka botlalo.
