Mathaio 17:1-27
17 Malatsi a le marataro moragonyana Jesu a tsaya Petere le Jakobe le Johane morwarraagwe mme a tlhatlogela le bone kwa thabeng e e kwa godimo ba le bosi.+
2 Mme a fetolwa ponalo fa pele ga bone, sefatlhego sa gagwe sa phatsima jaaka letsatsi,+ le diaparo tsa gagwe tsa kafa ntle tsa tsabakela jaaka lesedi.+
3 Mme, bona! ga bonala kwa go bone Moshe le Elija, ba tlotla le ene.+
4 Foo Petere a raya Jesu a re: “Morena, go molemo go bo re le fano. Fa o eletsa, ke tla tlhoma megope e le meraro fano, o mongwe e le wa gago mme o mongwe e le wa ga Moshe mme o mongwe e le wa ga Elija.”+
5 Ya re a sa ntse a bua, bona! leru le le phatsimang la ba okama, mme, bona! lentswe la tswa mo lerung, le re: “Yono ke Morwaake, moratwa, yo ke mo amogetseng;+ mo reetseng.”+
6 Ya re barutwa ba utlwa seno ba wa ka difatlhego mme ba boifa fela thata.+
7 Go tswa foo Jesu a atamela, mme, ya re a ba ama, a re: “Nanogang mme lo se boife.”+
8 E rile ba tlhatlosa matlho, ba se ka ba bona ope fa e se Jesu ka boene fela.+
9 Ya re ba fologa mo thabeng, Jesu a ba laya a re: “Lo se bolelele ope ponatshegelo eno go fitlha Morwa motho a tsosiwa mo baswing.”+
10 Le fa go ntse jalo, barutwa ba mo tlhoma potso ba re: “Ke ka ntlha yang, he, bakwadi ba re Elija o tshwanetse go tla pele?”+
11 Fa a araba a re: “Elija, eleruri, o etla e bile o tla busetsa dilo tsotlhe.+
12 Le fa go ntse jalo, ke a lo raya ka re Elija o setse a tlile mme ba ne ba se ka ba mo lemoga mme ba ne ba mo dira dilo tse ba neng ba batla go di mo dira. Ka tsela eno gape Morwa motho o laoletswe go boga mo diatleng tsa bone.”+
13 Foo barutwa ba lemoga gore o ne a bua le bone ka Johane Mokolobetsi.+
14 E rile ba tla kwa boidiiding,+ monna mongwe a mo atamela, a khubama fa pele ga gagwe a re:
15 “Morena, utlwela morwaake botlhoko, ka gonne o na le bolwetse jwa go karalala e bile o a lwala, gonne o wela mo molelong gantsi le mo metsing+ gantsi;
16 mme ke ne ka mo tlisa mo barutweng ba gago, mme ba ne ba se ka ba kgona go mo alafa.”+
17 Fa Jesu a fetola a re: “Lona kokomana+ e e se nang tumelo le e e sokameng, ke tshwanetse go tswelela le lona ka lobaka lo lo kae? Ke tshwanetse ka lo itshokela ka lobaka lo lo kae? Mo tliseng kwano go nna.”
18 Go tswa foo Jesu a kgalema ledimona, mme la tswa mo go ene;+ mosimane yono a alafega go tloga ka nako eo.+
19 Morago ga moo barutwa ba tla mo go Jesu kwa thoko ba re: “Ke ka ntlha yang fa re ne re sa kgone go le leleka?”+
20 A ba raya a re: “Ke ka ntlha ya tumelo ya lona e potlana. Gonne ammaaruri ke a lo raya, Fa lo na le tumelo ya bogolo jwa tlhaka ya mosetara, lo tla raya thaba eno lo re, ‘Fuduga fano o ye fale,’ mme e tla fuduga, ga go na sepe se se tla nnang se sa kgonege mo go lona.”+
21 ——
22 E ne e le fa ba ne ba phuthegile mmogo kwa Galalea fa Jesu a ne a ba raya a re: “Morwa motho o laoletswe go okelwa mo diatleng tsa batho,+
23 mme ba tla mmolaya, mme ka letsatsi la boraro o tla tsosiwa.”+ Ka gone ba ne ba hutsafala fela thata.+
24 Fa ba sena go goroga kwa Kaperenama banna ba ba phuthang [lekgetho] la diderakema tse pedi ba atamela Petere ba re: “A moruti wa lona ga a duele [lekgetho] la diderakema tse pedi?”+
25 A re: “Ee.” Le fa go ntse jalo, e rile a tsena mo ntlong Jesu a mo raka ka go re: “O akanyang, Simone? Dikgosi tsa lefatshe di amogela ditshwanelo kgotsa lekgetho la tlhogo mo go bomang? Mo go bomorwaatsone kgotsa mo go ba e leng batswakwa?”
26 E rile a re: “Mo go ba e leng batswakwa,” Jesu a mo raya a re: “Ruri, he, bomorwaatsone ba gololesegile mo lekgethong.
27 Mme gore re se ka ra ba kgopisa,+ ya kwa lewatleng, o latlhele sekgoge sa ditlhapi, o bo o tseye tlhapi ya ntlha e e tswang mme, fa o bula molomo wa yone, o tla fitlhela ledi la tshipi la selefera. Le tseye mme o le ba neye e le la me le wena.”+
