Mathaio 23:1-39
23 Go tswa foo Jesu a bua le boidiidi le barutwa ba gagwe,+ a re:
2 “Bakwadi+ le Bafarasai ba ipeile mo setulong sa ga Moshe.+
3 Jalo dilo tsotlhe tse ba di lo bolelelang,+ lo di dire lo bo lo di boloke, mme lo se ka lwa dira kafa ditirong tsa bone,+ gonne ba a bua mme ba bo ba sa dire.
4 Ba bofa merwalo e e boima ba bo ba e pega mo magetleng a batho,+ mme bone ka bobone ga ba rate le go e sutisa ka monwana wa bone.+
5 Ditiro tsotlhe tse ba di dirang ba di dira gore ba bonwe ke batho;+ gonne ba atolosa dikgetsinyana [tse di nang le dikwalo]+ tse ba di rwalang e le tshireletso, e bile ba lelefatsa makantsa+ a diaparo tsa bone.
6 Ba rata mafelo a a tlhomologileng thata+ mo dijong tsa maitseboa le ditulo tse di kwa pele mo disinagogeng,+
7 le ditumediso+ mo marekisetsong le go bidiwa Rabi ke batho.+
8 Mme lona, lo se ka lwa bidiwa Rabi, gonne moruti wa lona o mongwe,+ mme lona lotlhe lo bakaulengwe.
9 Mo godimo ga moo, lo se ka lwa bitsa ope rraalona mo lefatsheng, gonne Rraalona o mongwe,+ Wa selegodimo.
10 Le gone lo se ka lwa bidiwa ‘baeteledipele,’ gonne Moeteledipele wa lona o mongwe, e bong Keresete.
11 Mme yo mogolo thata mo go lona o tshwanetse go nna modiredi wa lona.+
12 Le fa e le mang yo o ikgodisang o tla kokobediwa,+ mme le fa e le mang yo o ikokobetsang o tla godisiwa.+
13 “A bo go latlhega lona, bakwadi le Bafarasai, baitimokanyi! ka gonne lo tswalela+ batho bogosi jwa magodimo; gonne lona+ ka bolona ga lo tsene, le gone ga lo letle ba ba tsenang go tsena.
14 ——
15 “A bo go latlhega lona, bakwadi le Bafarasai, baitimokanyi!+ ka gonne lo ralala lewatle le lefatshe le le omeletseng go sokolola motho a le mongwe, mme fa a sokologa lo mo dira yo o lebanweng ke Gehena go menagane gabedi go feta lona.
16 “A bo go latlhega lona, bagogi ba ba foufetseng,+ ba lo reng, ‘Fa ope a ikana ka tempele, ga se sepe; mme fa ope a ikana ka gouta ya tempele, o molato.+’
17 Dieleele le difofu! Totatota, ke eng se segolwane, a ke gouta kgotsa ke tempele e e itshepisitseng gouta?+
18 Gape, ‘Fa ope a ikana ka sebeso, ga se sepe; mme fa ope a ikana ka mpho e e mo go yone, o molato.’
19 Difofu! Totatota, ke eng se segolwane, a ke mpho kgotsa ke sebeso+ se se itshepisang mpho?
20 Jalo yo o ikanang ka sebeso o ikana ka sone le ka dilo tsotlhe tse di mo go sone;
21 le yo o ikanang ka tempele o ikana ka yone le ka ene yo o nnang mo go yone;+
22 le yo o ikanang ka legodimo o ikana ka setulo sa bogosi sa Modimo+ le ka ene yo o ntseng mo go sone.
23 “A bo go latlhega lona, bakwadi le Bafarasai, baitimokanyi! ka gonne lo ntsha nngwesomeng+ ya minte le dile le kumina, mme lo itlhokomolositse dilo tse di bokete segolo tsa Molao, e leng, tshiamiso+ le kutlwelobotlhoko+ le boikanyegi.+ Dilo tseno go ne go patelesega gore di dirwe, le fa go ntse jalo go sa tlhokomologiwe dilo tse dingwe.
24 Bagogi ba ba foufetseng,+ ba lo tlhotlhang montsana+ mme lo kodumetsa kamela!+
25 “A bo go latlhega lona, bakwadi le Bafarasai, baitimokanyi! ka gonne lo ntlafatsa bokafantle jwa senwelo+ le jwa sejana, mme mo teng di tletse kgapo+ le go tlhoka tekatekano.
26 Mofarasai ke wena yo o foufetseng,+ ntlafatsa pele bokafateng jwa senwelo+ le jwa sejana, gore bokafantle jwa sone le jone bo tle bo nne phepa.
27 “A bo go latlhega lona, bakwadi le Bafarasai, baitimokanyi!+ ka gonne lo tshwana le diphupu tse di tshasitsweng kalaka,+ tse kafa ntle eleruri di bonalang di le dintle mme mo teng di tletse marapo a batho ba ba suleng le boitshekologo jwa mofuta mongwe le mongwe.
28 Ka tsela eo le lona, eleruri ka fa ntle, lo bonala lo siame mo bathong,+ mme mo teng lo tletse boitimokanyo le go tlhoka molao.
29 “A bo go latlhega lona, bakwadi le Bafarasai, baitimokanyi!+ ka gonne lo aga diphupu tsa baporofeti e bile lo kgabisa mabitla a kgakologelo a basiami,+
30 lo bo lo re, ‘Fa re ne re le mo malatsing a borraaronamogologolwane, re ka bo re sa nna batlhakanedi le bone mo mading a baporofeti.’+
31 Jalo lo naya bosupi ka lona gore lo bana ba bao ba neng ba bolaya baporofeti.+
32 Ka gone, he, tlatsang selekanyo+ sa borraalonamogologolwane.
33 “Dinoga, bana ba dinoga tse di botlhole,+ lo tla tshaba jang katlholo ya Gehena?+
34 Ka lebaka leno, jaanong ke lo romelela+ baporofeti le batho ba ba botlhale le batlhatlheledi ba batho.+ Bangwe ba bone lo tla ba bolaya+ lo bo lo ba bapola, mme bangwe ba bone lo tla ba kgwathisa+ mo disinagogeng tsa lona lo bo lo ba bogisa go tswa motseng go ya motseng o mongwe;
35 gore madi otlhe a a siameng a a tsholotsweng mo lefatsheng a tle mo go lona,+ go tloga ka madi a ga Abele+ yo o siameng+ go fitlha ka madi a ga Sekarea morwa Barakia, yo lo neng lwa mmolaela fa gare ga lefelo le le boitshepo le sebeso.+
36 Ammaaruri ke a lo raya, Dilo tseno tsotlhe di tla tlela kokomana eno.+
37 “Jerusalema wee, Jerusalema wee, mmolai wa baporofeti+ le mokgobotletsi+ wa ba ba rometsweng kwa go ene,+—a bo ke ne ka batla gantsi jang ne go phutha bana ba gago mmogo, ka tsela e koko e namagadi e phuthelang dikokwana tsa yone mmogo ka fa tlase ga diphuka tsa yone!+ Mme lo ne lwa se ka lwa go batla.+
38 Bonang! Ntlo+ ya lona e tlogeletswe lona.+
39 Gonne ke a lo raya ka re, Ga lo na go mpona ka gope go tloga jaanong go fitlha lo re, ‘Go sego yo o tlang ka leina la ga Jehofa!’”+
