Mathaio 24:1-51
24 Ya re jaanong Jesu a tloga, a tsena mo tseleng a tswa mo tempeleng, mme barutwa ba gagwe ba atamela go mmontsha dikago tsa tempele.+
2 Fa a arabela a ba raya a re: “A ga lo bone dilo tseno tsotlhe? Ammaaruri ke a lo raya ka re, Leje ga le kitla le tlogelwa ka gope fano le le mo godimo ga leje le lengwe mme le sa digelwa fa fatshe.”+
3 Ya re a ntse mo Thabeng ya Lotlhware, barutwa ba mo atamela kwa thoko, ba re: “Re bolelele, Dilo tseno di tla nna leng, mme sesupo e tla nna eng sa go nna gone ga gago+ le sa bokhutlo jwa tsamaiso eno ya dilo?”+
4 Fa Jesu a araba a ba raya a re: “Disang gore ope a se ka a lo tsietsa;+
5 gonne ba le bantsi ba tla tla mo motheong wa leina la me, ba re, ‘Ke nna Keresete,’ mme ba tla timetsa ba le bantsi.+
6 Lo tlile go utlwalela ka dintwa le dipego tsa dintwa; bonang gore lo se ka lwa tshoga. Gonne dilo tseno di tshwanetse go diragala, mme e be e ise e nne bokhutlo.+
7 “Gonne setšhaba se tla tsogologela setšhaba+ le bogosi bo tsogologele bogosi,+ mme go tla nna le ditlhaelo tsa dijo+ le dithoromo tsa lefatshe+ mo mafelong ka go latelana.
8 Dilo tseno tsotlhe ke tshimologo ya ditlhabi tsa tlalelo.
9 “Go tswa foo batho ba tla lo isa kwa pitlaganong+ e bile ba tla lo bolaya,+ mme lo tla nna ba ba tlhoilweng+ ke ditšhaba tsotlhe ka ntlha ya leina la me.+
10 Go tswa foo, gape, ba le bantsi ba tla kgotšwa+ e bile ba tla okana e bile ba tla tlhoana.+
11 Mme baporofeti ba le bantsi ba maaka+ ba tla tsoga ba bo ba timetsa ba le bantsi;+
12 mme ka ntlha ya go oketsega ga go tlhoka molao+ lorato lwa ba le bantsi lo tla tsidifala.+
13 Mme yo o itshokileng+ go ya bokhutlong ke ene yo o tla bolokwang.+
14 Mme dikgang tse di molemo+ tseno tsa bogosi+ di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe;+ mme go tswa foo bokhutlo+ bo tla tla.
15 “Jalo, fa lo tshogana ka lo bona selo se se ferosang sebete+ se se bakang kgakgabalo, jaaka go buiwa ka sone ka Daniele moporofeti, se eme mo lefelong le le boitshepo,+ (a mmadi a dirise temogo,)
16 foo a ba ba kwa Judea ba tshabele+ kwa dithabeng.
17 A monna yo o kwa godimo ga ntlo a se ka a fologa a ya go ntsha dithoto mo ntlong ya gagwe;
18 mme a monna yo o kwa tshimong a se ka a boela kwa ntlong a ya go tsaya seaparo sa gagwe sa kafa ntle.
19 A bo go latlhega basadi ba ba ba imana le ba ba anyisang masea mo malatsing ao!+
20 Nnang lo rapele gore go tshaba ga lona go se ka ga diragala ka nako ya mariga, le fa e le ka letsatsi la sabata;
21 gonne ka nako eo go tla nna le pitlagano e kgolo+ e e jaaka e e iseng e ko e nne fa e sale ka tshimologo ya lefatshe go fitlha jaanong,+ nnyaa, le gone e se kitla e nna gone gape.
22 Tota e bile, fa malatsi ao a ne a sa khutshwafadiwa, go ka bo go se na nama epe e e tla bolokwang; mme ka ntlha ya ba ba tlhophilweng+ malatsi ao a tla khutshwafadiwa.+
23 “Foo fa mongwe a ka lo raya a re, ‘Bonang! Keresete ke yo,’+ kgotsa, ‘Ke yole!’ lo se ka lwa go dumela.
24 Gonne go tla tsoga bo Keresete ba maaka le baporofeti ba maaka+ mme ba tla dira ditshupo tse dikgolo+ le dikgakgamatso gore ba tsietsa, fa go kgonega, le eleng ba ba tlhophilweng.+
25 Bonang! Ke lo tlhagisitse go sa le pele.+
26 Jalo, fa batho ba lo raya ba re, ‘Bonang! O kwa nageng,’ lo se ka lwa tswa; ‘Bonang! O mo matlwaneng a a kwa teng,’ lo se ka lwa go dumela.+
27 Gonne fela jaaka logadima+ lo tswa dikarolong tsa kwa botlhaba mme lo phatsimela kwa dikarolong tsa bophirima, go nna gone ga Morwa motho go tla nna jalo.+
28 Gongwe le gongwe fela kwa setoto se gone, gone koo dintsu+ di tla phuthegela gone.+
29 “Ka bonako fela morago ga pitlagano ya malatsi ao letsatsi le tla fifala,+ le ngwedi+ ga e na go ntsha lesedi la yone, mme dinaledi di tla wa di tswa kwa legodimong, le maatla a magodimo a tla reketlisiwa.+
30 Mme go tswa foo sesupo sa Morwa motho+ se tla bonala kwa legodimong, mme go tswa foo ditso tsotlhe tsa lefatshe di tla ititaya di lela selelo sa khutsafalo,+ mme di tla bona Morwa motho a tla a le mo marung a legodimo ka maatla le kgalalelo e kgolo.+
31 Mme o tla romela baengele ba gagwe ka modumo o mogolo wa terompeta,+ mme ba tla phutha ba ba tlhophilweng+ ba gagwe go tswa kwa diphefong tse nnè,+ go tswa kwa ntlheng e nngwe ya magodimo go ya kwa ntlheng e nngwe ya one.
32 “Jaanong ithuteng ntlha eno ka setlhare sa mofeige e le setshwantsho: Ka bonako fela fa kalana ya sone e nna nana mme e ntsha matlhare, lo a itse gore selemo se gaufi.+
33 Ka tsela e e tshwanang le lona, fa lo bona dilo tseno tsotlhe, itseng gore o gaufi fa dikgorong.+
34 Ammaaruri ke a lo raya ka re kokomana+ eno ga e na go feta ka gope go fitlha dilo tseno tsotlhe di diragala.
35 Legodimo le lefatshe di tla feta,+ mme mafoko a me ga a na go feta ka gope.+
36 “Ka ga letsatsi leo le ura+ eo ga go na ope yo o itseng, le fa e le baengele ba magodimo kgotsa Morwa, fa e se Rara fela.+
37 Gonne fela jaaka malatsi a ga Noa+ a ne a ntse, go nna gone ga Morwa motho go tla nna jalo.+
38 Gonne fela jaaka ba ne ba ntse mo malatsing ao pele ga morwalela, baa ja e bile baa nwa, banna ba nyala le basadi ba neelwa nyalong, go fitlha ka letsatsi le Noa+ a tseneng mo teng ga araka ka lone;+
39 mme ba se ka ba tsaya tsia go fitlha morwalela o tla o bo o ba gogola botlhe,+ go nna gone ga Morwa motho go tla nna jalo.
40 Ka nako eo banna ba babedi ba tla bo ba le kwa tshimong: yo mongwe o tla tsewa mme yo mongwe a tlogelwe;
41 basadi ba le babedi ba tla bo ba sila mo lelwaleng:+ yo mongwe o tla tsewa mme yo mongwe a tlogelwe.+
42 Jalo, nnang lo disitse, ka gonne ga lo itse gore Morena wa lona o tla ka letsatsi lefe.+
43 “Mme itseng selo se le sengwe, gore fa mong wa ntlo a ne a itsile gore legodu le tla ka tebelo efe,+ o ka bo a ne a nna a tsogile mme a se ka a letlelela gore go thubiwe mo ntlong ya gagwe.
44 Ka lebaka leno le lona itshupeng lo iketleeditse,+ ka gonne ka ura e lo sa akanyeng gore ke yone, Morwa motho o tla ka yone.
45 “Tota motlhanka yo o boikanyego le yo o botlhale+ ke mang yo mong wa gagwe a neng a mo tlhoma gore a okamele ba ntlo ya gagwe, go ba naya dijo tsa bone ka nako e e tshwanetseng?+
46 Go itumela+ motlhanka yoo yo fa mong wa gagwe a goroga a mo fitlhelang a dira jalo!
47 Ammaaruri ke a lo raya, O tla mo tlhoma gore a okamele dilo tsa gagwe tsotlhe.+
48 “Mme fa go direga gore motlhanka yo o bosula yoo a itheye mo pelong a re,+ ‘Mong wa me o a diega,’
49 mme a simolola go itaya batlhankammogo le ene mme a ja a ba a nwa le matagwa a a padileng,
50 mong wa motlhanka yoo o tla tla ka letsatsi le a sa le lebelelang le ka ura+ e a sa e itseng,
51 mme o tla mo otlhaya ka bopeloethata jo bogolo thata+ e bile o tla mo laolela karolo le baitimokanyi. Ke gone koo selelo sa gagwe le phuranyo ya meno a gagwe di tla nnang gone.+
