Mathaio 27:1-66
27 E rile go sena go nna moso, baperesiti ba bagolo botlhe le banna ba bagolwane ba batho ba tshwara puisano kaga Jesu gore ba mmolaye.+
2 Mme, fa ba sena go mmofa, ba tsamaya ka ene mme ba mo neela Pilato molaodi.+
3 Go tswa foo Judase, yo o neng a mo oka, ya re a bona gore o bonwe molato, a ikwatlhaya mo go botlhoko mme a busetsa dipapetlana tsa selefera di le masome a mararo+ kwa baperesiting ba bagolo le banna ba bagolwane,
4 a re: “Ke leofile fa ke ne ke oka madi a a siameng.”+ Ba re: “Re direng ka gone? Bona gore o tswa jang ka gone!”+
5 Jalo a latlhela dipapetlana tsa selefera mo tempeleng mme a tswa, a ya go ikaletsa.+
6 Baperesiti ba bagolo ba tsaya dipapetlana tsa selefera ba re: “Ga go kafa molaong gore di latlhelwe mo bobolokelamatlotlong jo bo boitshepo, ka gonne ke se se rekileng madi.”
7 Fa ba sena go buisana mmogo, ba reka ka tsone tshimo ya mmopi wa letsopa gore ba fitlhe batswakwa mo go yone.
8 Jalo tshimo eo e ntse e bidiwa “Tshimo ya Madi”+ go fitlha mo go lone letsatsi leno.
9 Jaanong se se neng sa buiwa ka Jeremia moporofeti se ne sa diragadiwa, go twe: “Mme ba ne ba tsaya dipapetlana tsa selefera di le masome a mararo,+ tlhwatlhwa ya monna yo o neng a beelwa tlhwatlhwa ya go bolawa, ene yo bangwe ba bomorwa Iseraele ba neng ba mo tlhoma tlhwatlhwa,
10 mme ba di ntshetsa tshimo ya mmopi+ wa letsopa, go ya ka se Jehofa a se ntaetseng.”
11 Jesu jaanong a ema fa pele ga molaodi; mme molaodi a mo tlhoma potso a re: “A o kgosi ya Bajuda?”+ Jesu a fetola a re: “Wena ka bowena wa rialo.”+
12 Mme, ya re a ntse a latofadiwa+ ke baperesiti ba bagolo le banna ba bagolwane, a se ka a araba.+
13 Foo Pilato a mo raya a re: “A ga o utlwe gore ke dilo di le dintsi jang tse ba di supang ka wena?”+
14 Le fa go ntse jalo o ne a se ka a mo araba, nnyaa, le fa e le ka lefoko, mo molaodi a neng a gakgamala fela thata.+
15 Jaanong moletlo le moletlo e ne e le mokgwa wa molaodi go gololela boidiidi legolegwa, le ba neng ba le batla.+
16 Ka yone fela nako eo ba ne ba tshwere legolegwa lengwe le le itsegeng ka bosula le le neng le bidiwa Barabase.+
17 Ka gone e rile ba phuthegile mmogo Pilato a ba raya a re: “Ke ofe yo lo batlang gore ke lo mo gololele, Barabase kgotsa Jesu yo go tweng ke Keresete?”+
18 Gonne o ne a lemoga gore ba ne ba mo mo neetse+ ka ntlha ya lefufa.+
19 Mo godimo ga moo, ya re a ntse mo setulong sa katlholo, mosadi wa gagwe a romela kwa go ene, a re: “Tlogela monna yo o siameng+ yoo, gonne ke ne ka boga thata gompieno mo torong+ ka ntlha ya gagwe.”
20 Mme baperesiti ba bagolo le banna ba bagolwane ba tlhotlheletsa boidiidi gore bo kope Barabase,+ mme ba dire gore Jesu a bolawe.
21 Jaanong ya re molaodi a arabela a ba raya a re: “Ke ofe wa ba babedi bano yo lo batlang ke lo mo gololela?” Ba re: “Barabase.”+
22 Pilato a ba raya a re: “Jaanong ke tla dirang ka Jesu yo go tweng ke Keresete?” Botlhe ba re: “A a bapolwe!”+
23 A re: “Ka ntlha yang, ke selo sefe se se bosula se a se dirileng?” Le fa go ntse jalo ba nna ba goa le go feta ba re: “A a bapolwe!”+
24 Ya re a bona gore go ne go sa thuse sepe, mme go na le moo, pheretlhego e ne e tsoga, Pilato a tsaya metsi+ mme a tlhapa diatla fa pele ga boidiidi, a re: “Ga ke na molato wa madi a monna yono. Lona ka bolona bonang gore lo tswa jang ka gone.”
25 Fa a rialo batho botlhe fa ba araba ba re: “A madi a gagwe a tle mo go rona le mo baneng ba rona.”+
26 Foo a ba gololela Barabase, mme a dira gore Jesu a itewe ka seme+ mme a ba mo neela gore a bapolwe.+
27 Go tswa foo masole a molaodi a tseela Jesu mo ntlong ya segosi ya molaodi mme a phuthela setlhopha sotlhe sa mephato ya masole kwa go ene.+
28 Ba mo apola, ba mmipa ka kobo e e bohibidu jo bo letlhololo,+
29 mme ba loga serwalo ka mitlwa ba se mo rwesa mo tlhogong ba bo ba mo naya lotlhaka mo seatleng sa gagwe sa moja. Mme, ba khubama fa pele ga gagwe, ba sotla ka ene,+ ba re: “Dumela, wena Kgosi ya Bajuda!”+
30 Mme ba mo kgwela mathe+ ba bo ba tsaya lotlhaka ba mo itaya mo tlhogong.
31 La bofelo, e rile ba sena go sotla ka ene,+ ba mo apola kobo mme ba mo apesa diaparo tsa gagwe tsa kafa ntle ba mo isa gore a ye go bapolwa.+
32 Fa ba tswa ba bona motho mongwe wa kwa Kurene yo o neng a bidiwa Simone.+ Ba patelela monna yono go rwala kota ya gagwe ya tlhokofatso.
33 E rile ba tla kwa lefelong le le bidiwang Gologotha,+ ke gore, Felo ga Logata,
34 ba mo naya beine e tlhakantswe le santlhoko+ gore a nwe; mme, fa a sena go e latswa, a gana go nwa.+
35 E rile ba sena go mmapola+ ba aba diaparo tsa gagwe tsa ka fa ntle+ ka go tshela bola,+
36 mme, ya re ba ntse foo, ba nna ba mo lebeletse.
37 Gape, ba pega fa godimo ga tlhogo ya gagwe tatofatso kaga gagwe, ya mokwalo o o reng: “Yono ke Jesu Kgosi ya Bajuda.”+
38 Foo dinokwane tse pedi di ne di bapotswe le ene, se sengwe ka fa mojeng wa gagwe mme se sengwe ka fa molemeng wa gagwe.+
39 Jalo bafeti ka tsela ba simolola go bua ka ene ba mo kgoba,+ ba thukutha+ ditlhogo
40 ba re: “Wai wena yo o reng o ka digela tempele fa fatshe+ mme o e age mo malatsing a le mararo, ipoloke! Fa e le gore o morwa Modimo, fologa mo koteng ya tlhokofatso!”+
41 Ka mokgwa o o tshwanang baperesiti ba bagolo ba na le bakwadi le banna ba bagolwane le bone ba simolola go sotla ka ene ba re:+
42 “Ba bangwe o ne a ba boloka; ene ga a kgone go ipoloka! Ke Kgosi+ ya Iseraele; a jaanong a fologe mo koteng ya tlhokofatso mme re tla dumela mo go ene.+
43 O ikantse Modimo; a jaanong A mo namole+ fa e le gore Wa mmatla, gonne o ne a re, ‘Ke Morwa Modimo.’”+
44 Ka yone tsela eo le tsone dinokwane tse di neng di bapotswe le ene tsa simolola go mo kgoba.+
45 Go tloga ka ura ya borataro go ya pele ga nna lefifi+ mo lefatsheng leo lotlhe, go fitlha ka ura ya borobongwe.+
46 Mo e ka nnang ka ura ya borobongwe Jesu a goa ka lentswe le le kwa godimo, a re: “Eli, Eli, lama sabakathani?” ke gore, “Modimo wa me, Modimo wa me, o ntatlhetseng?”+
47 Ya re bangwe ba bao ba emeng foo ba utlwa seno, ba re: “Monna yono o bitsa Elija.”+
48 Mme ka yone nako eo mongwe wa bone a siana a tsaya ngami a e ina mo beineng e e botšarara+ a e tlhomela mo lotlhakeng mme a mo nosa.+
49 Mme ba bangwe botlhe ba re: “Mo leseng! A re boneng gore a Elija o tla tla go mmoloka.”+ [[Monna yo mongwe a tsaya lerumo mme a tlhaba letlhakore la gagwe, mme madi le metsi tsa tswa.]]+
50 Jesu a goa ka lentswe le le kwa godimo gape, mme a lesa moya wa gagwe.+
51 Mme, bona! sesiro+ sa lefelo le le boitshepo sa gagogana ka bogare, go tswa kwa godimo go ya kwa tlase,+ mme lefatshe la roroma, le mafika a phatloga.+
52 Mme mabitla a kgakologelo a ne a bulega le mebele e le mentsi ya baitshepi ba ba neng ba robetse ya tswela kwa ntle,
53 (mme batho, ya re ba tswa mo mabitleng a kgakologelo fa a sena go tsosiwa, ba tsena mo motseng o o boitshepo,)+ mme ya bonwa ke batho ba le bantsi.
54 Mme modiredi wa masole mmogo le ba ba lebeletseng Jesu, e rile ba bona thoromo ya lefatshe le dilo tse di diragalang, ba tlelwa ke poifo fela thata, ba re: “Eleruri yono e ne e le Morwa Modimo.”+
55 Mo godimo ga moo, basadi ba le bantsi, ba ba neng ba patile Jesu go tswa kwa Galalea go mo direla,+ ba ne ba le gone koo ba lebile ba le kgakajana;+
56 ba mo go bone go neng go na le Marea Magadalena, le Marea mmaagwe Jakobe le Josese, le mmaagwe bomorwa Sebede.+
57 Jaanong ka go ne go le thapama, ga tla monna yo o humileng wa Arimathea, yo o bidiwang Josefa, yo jaanong le ene a neng a le morutwa wa ga Jesu.+
58 Monna yono o ne a ya kwa go Pilato mme a kopa mmele wa ga Jesu.+ Foo Pilato a laela gore a o neelwe.+
59 Josefa a tsaya mmele ono, a o phuthela ka leloba le le boleta le le phepa,+
60 mme a o latsa mo lebitleng la gagwe le lesha la kgakologelo,+ le a neng a le gabile mo lefikeng. Mme, fa a sena go pitikololela leje le legolo kwa kgorong ya lebitla la kgakologelo, a tsamaya.+
61 Marea Magadalena le Marea yo mongwe ba nna ba ntse ba le foo, ba ntse fa pele ga phupu.+
62 Ka letsatsi le le latelang, le e neng e le morago ga Paakanyo,+ baperesiti ba bagolo le Bafarasai ba phuthega mmogo fa pele ga ga Pilato,
63 ba re: “Rra, re gakologetswe gore leferefere lele fa le ne le sa ntse le tshela le ne la re, ‘Ke tla tsosiwa morago ga malatsi a le mararo.’+
64 Jalo laela gore phupu e disiwe go fitlha ka letsatsi la boraro, gore barutwa ba gagwe ba se ka ba tla ka gope ba mo utswa+ mme ba raya batho ba re, ‘O ne a tsosiwa mo baswing!’ mme boferefere jono jwa bofelo bo tla nna maswe go gaisa jwa ntlha.”
65 Pilato a ba raya a re: “Lo na le badisa.+ Tsamayang lo ye go e disa kafa lo itseng ka gone.”
66 Jalo ba ya go disa phupu ka go kana leje+ le go baya badisa.
