Mathaio 4:1-25
4 Foo Jesu a gogelwa ke moya kwa nageng+ go ya go raelwa+ ke Diabolo.
2 Fa a sena go itima dijo malatsi a le masome a manè le masigo a le masome a manè,+ a utlwa a tshwerwe ke tlala.
3 Gape, Moraedi+ a tla mme a mo raya a re: “Fa e le gore o morwa Modimo,+ raya maje ano o re a fetoge dinkgwe.”
4 E rile a fetola a re: “Go kwadilwe ga twe, ‘Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.’”+
5 Foo Diabolo a mo tsaya a ya le ene kwa motseng o o boitshepo,+ a mo emisa mo setlhoeng sa tempele
6 a mo raya a re: “Fa e le gore o morwa Modimo, ipiriganyetse kwa tlase;+ gonne go kwadilwe ga twe, ‘O tla naya baengele ba gagwe taelo kaga gago, mme ba tla go tshwara ka diatla, gore le fa e le ka nako epe o se ka wa itaaganya lonao lwa gago le leje+ lepe.’”
7 Jesu a mo raya a re: “Gape go kwadilwe ga twe, ‘O se ka wa leka Jehofa Modimo wa gago.’”+
8 Gape Diabolo a mo tsaya a ya le ene kwa thabeng e e kwa godimo ka tsela e e sa tlwaelegang, a mmontsha magosi otlhe a lefatshe+ le kgalalelo ya one,
9 mme a mo raya a re: “Dilo tseno tsotlhe ke tla di go naya+ fa o ka wela fa fatshe mme wa nkobamela.”+
10 Foo Jesu a mo raya a re: “Tsamaya, Satane! Gonne go kwadilwe ga twe, ‘Jehofa Modimo wa gago ke ene yo o tshwanetseng go mo obamela,+ e bile ke ene a le esi+ yo o tshwanetseng go mo direla tirelo e e boitshepo.’”+
11 Foo Diabolo a mo tlogela,+ mme, bona! baengele ba tla mme ba simolola go mo direla.+
12 Jaanong e rile a utlwa gore Johane o ne a tshwerwe,+ a tswa a ya kwa Galalea.+
13 Gape, fa a sena go tloga kwa Nasaretha, a tla mme a aga mo Kaperenama+ go bapa le lewatle mo dikgaolong tsa Sebulone le Nafetali,
14 gore go tle go diragadiwe se se neng sa buiwa ka Isaia moporofeti, a re:
15 “Wena lefatshe la Sebulone le lefatshe la Nafetali, go bapa le tsela ya lewatle, kwa moseja ga Joredane, Galalea+ wa ditšhaba!
16 batho ba ba ntseng mo lefifing+ ba ne ba bona lesedi+ le legolo, mme fa e le ka ba ba ntseng mo lefatsheng la moriti wa loso, lesedi+ le ne la ba tlhabela.”+
17 Go tloga ka nako eo go ya pele Jesu a simolola go rera a re: “Ikwatlhayeng,+ gonne bogosi+ jwa magodimo bo atametse.”
18 Ya re a tsamaya go bapa le lewatle la Galalea a bona bana ba motho ba babedi, Simone+ yo o bidiwang Petere+ le Anderea morwarraagwe, ba digela letlowa la go tshwara ditlhapi kwa tlase mo lewatleng, gonne e ne e le batshwara ditlhapi.
19 A ba raya a re: “Ntshalang morago, mme ke tla lo dira batshwari ba batho.”+
20 Ba tlogela matlowa+ ka yone nako eo, ba mo sala morago.
21 Ya re a tswelela gape a tswa koo a bona ba bangwe ba babedi+ ba e neng e le bana ba motho, Jakobe morwa Sebede+ le Johane morwarraagwe, ba le mo mokorong le Sebede rraabone, ba rokaganya matlowa a bone, mme a ba bitsa.
22 Ba tlogela mokoro le rraabone ka yone nako eo, ba mo sala morago.
23 Go tswa foo a tsamayatsamaya mo Galalea+ yotlhe,+ a ruta mo disinagogeng+ tsa bone a rera dikgang tse di molemo tsa bogosi e bile a alafa bolwetse+ jwa mofuta mongwe le mongwe le bokoa jwa mofuta mongwe le mongwe mo bathong.
24 Mme pego kaga gagwe ya tswela kwa Siria+ yotlhe; mme ba mo tlisetsa botlhe ba ba mo seemong se se maswe,+ ba ba neng ba tshwenngwa ke malwetse a a farologaneng le ditlhokofatso, batho ba ba laolwang ke madimona le ba ba nang le bolwetse jwa go karalala+ le ba ba suleng ditokololo, mme a ba alafa.
25 Ka gone boidiidi jo bogolo jwa mo sala morago go tswa kwa Galalea+ le Dekapolise le Jerusalema+ le Judea le go tswa kwa moseja ga Joredane.
