Mathaio 6:1-34
6 “Elang tlhoko thata gore lo se ka lwa nna le mokgwa wa go dira tshiamo+ fa pele ga batho gore ba lo bone; go seng jalo ga lo na go bona maduo mo go Rraalona yo o kwa magodimong.
2 Ka gone fa o simolola go aba dimpho tsa kutlwelobotlhoko,+ o se ka wa letsa terompeta+ kwa pele ga gago, fela jaaka baitimokanyi ba dira mo disinagogeng le mo mebileng, gore ba tle ba galalediwe ke batho. Ammaaruri ke a lo raya, Ba bona maduo a bone ka botlalo.
3 Mme wena, fa o aba dimpho tsa kutlwelobotlhoko, a seatla sa gago sa molema se se ka sa itse se sa moja se se dirang,
4 gore dimpho tsa gago tsa kutlwelobotlhoko di tle di nne mo sephiring; mme Rrago yo o lebileng mo sephiring o tla go duela.+
5 “Gape, fa lo rapela, ga lo a tshwanela go nna jaaka baitimokanyi; ka gonne ba rata go rapela ba eme+ mo disinagogeng le mo dikhutlong tsa ditsela tse di atlhameng gore ba bonwe ke batho.+ Ammaaruri ke a lo raya, Ba bona maduo a bone ka botlalo.
6 Le fa go ntse jalo, wena, fa o rapela, tsena mo phaposing+ ya gago mme, fa o sena go tswala setswalo sa gago, rapela Rrago yo o mo sephiring;+ mme Rrago yo o lebang mo sephiring o tla go duela.
7 Fa o rapela, o se ka wa boaboeletsa dilo di le dingwe,+ fela jaaka batho ba ditšhaba ba dira, gonne ba ithaya ba re ba tla utlwiwa ka ntlha ya go dirisa ga bone mafoko a le mantsi.
8 Jalo, lo se ka lwa nna jaaka bone, gonne Modimo Rraalona o itse dilo le fa e le dife tse lo di tlhokang+ le pele ga lo mo kopa.
9 “Ka jalo, lo rapele ka tsela eno:+
“‘Rraarona yo o kwa magodimong, a leina+ la gago le itshepisiwe.+
10 A bogosi+ jwa gago bo tle. A thato+ ya gago e diragale le mo lefatsheng,+ jaaka kwa legodimong.
11 Re fe gompieno senkgwe sa rona sa letsatsi+ leno;
12 mme o re itshwarele melato ya rona, jaaka le rona re itshwaretse ba ba molato le rona.+
13 Mme o se ka wa re tsenya mo thaelong,+ o re golole mo go yo o boikepo.’+
14 “Gonne fa lo itshwarela batho ditlolo tsa bone, Rraalona wa selegodimo le ene o tla lo itshwarela;+
15 mme fa lo sa itshwarele batho ditlolo tsa bone, le Rraalona ga a na go itshwarela ditlolo+ tsa lona.
16 “Fa lo itima dijo,+ tlogelang go tlhonya difatlhego jaaka baitimokanyi, gonne ba se-nya difatlhego tsa bone gore ba tle ba bonale mo bathong gore ba itima dijo.+ Ammaaruri ke a lo raya, Ba bona maduo a bone ka botlalo.
17 Mme wena, fa o itima dijo, tlotsa tlhogo ya gago o bo o tlhape sefatlhego sa gago,+
18 gore o tle o bonale o itima dijo, e seng mo bathong, fa e se mo go Rrago yo o mo sephiring;+ mme Rrago yo o lebang mo sephiring o tla go duela.
19 “Tlogelang go ipolokela matlotlo+ mo lefatsheng, mo motoutwane le ruse di jang gone, le mo magodu a thubang gone a ba a utswa.
20 Go na le moo, ipolokeleng matlotlo kwa legodimong,+ kwa motoutwane le fa e le ruse di sa jeng gone, le kwa magodu a sa thubeng gone a ba a utswa.
21 Gonne kwa letlotlo la gago le leng gone, le pelo ya gago e tla nna gone koo.
22 “Lobone lwa mmele ke leitlho.+ Ka jalo, fa leitlho la gago le sa raraana, mmele otlhe wa gago o tla tlala lesedi;
23 mme fa leitlho la gago le le boikepo,+ mmele otlhe wa gago o tla nna lefifi. Fa totatota lesedi le le leng mo go wena e le lefifi, a bo lefifi leo le le legolo jang ne!+
24 “Ga go ope yo o ka nnang motlhanka wa beng ba babedi; gonne o tla tlhoa yo mongwe mme a rate yo mongwe,+ kgotsa o tla ngaparela yo mongwe mme a nyatse yo mongwe. Ga lo ka ke lwa nna batlhanka ba Modimo le ba Dikhumo.+
25 “Ka lebaka leno ke lo raya ke re: Tlogelang go tlhobaela+ ka meya ya lona ka ga gore lo tla ja eng kgotsa lo tla nwa eng, kgotsa kaga mebele ya lona gore lo tla apara+ eng. A moya ga o botlhokwa go feta dijo le mmele go feta diaparo?+
26 Lepang ka kelotlhoko dinonyane+ tsa legodimo, ka gonne ga di jale peo le gone ga di robe le gone ga di phuthele mo matlong a polokelo; le fa go ntse jalo Rraalona wa selegodimo o a di fepa. A ga lo botlhokwa go feta tsone?+
27 Ke mang wa lona yo ka go tlhobaela a ka oketsang lobaka lwa botshelo jwa gagwe+ ka kubita e le nngwe?
28 Gape, mo kgannyeng ya diaparo, ke ka ntlha yang fa lo tlhobaela? Ithuteng mo dithunyeng tsa masoma+ tsa legola, kafa di golang ka gone; ga di dire ka natla, le gone ga di otlhe;
29 mme ke lo raya ke re le eleng Solomone+ mo kgalalelong yotlhe ya gagwe o ne a sa kgabe jaaka sengwe sa tseno.
30 Jaanong, fa Modimo a apesa dimela tsa naga jalo, tse di leng gone gompieno mme ka moso di latlhelwa mo pesetsong, a go na le moo ga a na a apesa lona bogolo, lona ba lo nang le tumelo e potlana?+
31 Jalo lo se ka le ka motlha lwa tlhobaela+ mme lwa re, ‘Re tla ja eng?’ kgotsa, ‘Re tla nwa eng?’ kgotsa, ‘Re tla apara eng?’
32 Gonne dilo tseno tsotlhe ke dilo tse ditšhaba di di gwalalelang. Gonne Rraalona wa selegodimo o a itse gore lo tlhoka dilo tseno tsotlhe.+
33 “Jalo, nnang lo batle pele bogosi le tshiamo ya gagwe,+ mme dilo tse dingwe tseno tsotlhe lo tla di okelediwa.+
34 Jalo, lo se ka le ka motlha lwa tlhobaela kaga letsatsi le le latelang,+ gonne letsatsi le le latelang le tla nna le ditlhobaelo tsa lone. Letsatsi lengwe le lengwe le lekanwe ke bosula jwa lone.
