Nahume 2:1-13
2 Ene yo o gasamisang o tlile fa pele ga sefatlhego sa gago.+ A lefelo le le sireletsegileng le dibelwe. Disa tsela. Nonotsha dinōka. Inonotshe fela thata.+
2 Gonne ruri Jehofa o tla phutha se Jakobe a ipelafatsang ka sone,+ jaaka se Iseraele a ipelafatsang ka sone, ka gonne ba ba tlhotlhorang ba ba tlhotlhorile;+ le matlhogela a bone ba a sentse.+
3 Thebe ya banna ba gagwe ba ba thata e fetoletswe mo mmaleng o mohibidu; banna ba gagwe ba ba nang le maatla a botlhaga ba apere matsela a a bohibidu jo bo mokgona.+ Kara ya gagwe ya ntwa e tsentswe dilwana tsa tshipi tse di nang le molelo mo letsatsing la go ipaakanya ga gagwe, mme marumo a setlhare sa mofira+ a roromisitswe.
4 Dikara tsa ntwa di nna di tsamaya ka botsenwa mo mebileng.+ Di nna di tlhanasela mo dipatlelong. Ponalo ya tsone e tshwana le dirumola tsa molelo. Di nna di siana jaaka dikgadima.+
5 O tla gakologelwa batho ba gagwe ba ba tlotlometseng.+ Ba tla kgotšwa ba ntse ba tsamaya.+ Ba tla potlakela kwa loboteng lwa gagwe, mme thibedi e tla tshwanelwa ke go tlhomamisiwa ka thata.
6 Dikgoro tsa dinoka di tla bulega, mme ntlo ya segosi e tla nyerologa.
7 Mme e tlhomamisitswe; o bipolotswe; ruri o tla isiwa kgakala,+ mme malata a gagwe a tla bo a lela selelo sa khutsafalo, jaaka modumo wa maeba,+ ba ititaya dipelo+ kgapetsa.
8 Mme Ninife, go tloga mo metlheng ya go nna gone ga gagwe,+ o ne a tshwana le mogobe wa metsi;+ mme ba a tshaba. “Emang fela, lona banna! Emang fela!” Mme ga go ope yo o boelang morago.+
9 Gapang selefera, lona banna; gapang gouta;+ ka gonne ga go na tekanyetso ya dilo tse di rulagantsweng. Go na le selekanyo se se boima sa mefuta yotlhe ya dilwana tse di eletsegang.+
10 Lolea le lefela, le motse o o kgakgabetseng!+ Mme pelo e a nyera,+ le mangole a a kgwetlha,+ le ditlhabi tse di botlhoko thata di mo dinōkeng tsotlhe;+ mme fa e le difatlhego tsa bone botlhe, di tletse letshogo.+
11 O kae mongobo wa ditau, le logaga lwa ditawana tse di seriri, koo tau e neng e tsamaya e bo e tsena teng,+ koo tawana e neng e le teng, mme go se na ope yo o di tshosang?+
12 Tau e ne e gagoganyetsa bana ba yone mo go lekaneng, e bile e kgamela ditau tsa yone tse di namagadi. Mme e ne ya nna e tladitse mesima ya yone ka dilo tse e di tsomileng le mafelo a yone a go iphitlha ka diphologolo tse di gagogantsweng.+
13 “Bona! Ke kgatlhanong le wena,” go bua Jehofa wa masomosomo,+ “e bile ke tla fisa kara ya gagwe ya ntwa mo mosing.+ Mme tšhaka e tla kometsa ditawana tsa gago tse di seriri.+ Le gone ke tla fedisa dilo tsa gago tse o di tsomang mo lefatsheng, mme lentswe la barongwa ba gago ga le ne le tlhola le utlwiwa.”+
