Nehemia 2:1-20
2 Mme go ne ga diragala mo kgweding ya Nisane,+ mo ngwageng wa bomasome a mabedi+ wa ga kgosi Aretaserese,+ gore beine e bo e le fa pele ga gagwe, mme nna jaaka tlwaelo ka tsaya beine mme ka e naya kgosi.+ Mme go ne go ise go ke go diragale gore ke tlhonye fa pele ga gagwe.+
2 Ka jalo kgosi ya nthaya ya re: “Ke ka ntlha yang fa sefatlhego sa gago se tlhontse+ fa wena ka bowena o sa bobole? Seno ga se sepe fa e se go tlhonya ga pelo.”+ Foo ka boifa thata.
3 Go tswa foo ka raya kgosi ka re: “A kgosi e tshele ka bosakhutleng!+ Ke ka ntlha yang fa sefatlhego sa me se sa tshwanela go tlhonya fa motse,+ ntlo ya mafelo a go fitlhela a borremogologolwane,+ o swafetse, le dikgoro tsa one di laitswe ke molelo?”+
4 Foo kgosi ya nthaya ya re: “Ke eng se o batlang go se dira?”+ Ka akofa ka rapela+ Modimo wa magodimo.+
5 Morago ga moo ka raya kgosi ka re: “Fa go lebega go le molemo+ mo kgosing, le fa motlhanka wa gago a lebega a le molemo fa pele ga gago,+ gore o nthomele kwa Juda, kwa motseng wa mafelo a go fitlhela a borremogologolwane, gore ke o age sesha.”+
6 Foo kgosi ya nthaya, mohumagadi wa kgosi a ntse fa thoko ga yone, ya re: “Loeto lwa gago lo tla nna loleele go le kae mme o tla boa leng?” Ka jalo ga lebega go le molemo+ fa pele ga kgosi gore e ntetle ke tsamaye, fa ke ne ke e naya nako e e tlhomilweng.+
7 Mme ka tswelela ka raya kgosi ka re: “Fa go lebega go le molemo mo kgosing, mma ke newe makwalo+ a a yang kwa balaoding+ ba ba ka kwa ga Noka, gore ba tle ba ntetle ke fete go fitlha ke goroga mo Juda;
8 le lekwalo le le yang kwa go Asafe motlhokomedi wa paraka ya kgosi, gore a tle a nneye ditlhare gore ke age dikgoro tsa Kago ya Phemelo+ ya ntlo+ ka dikota, le lobota+ lwa motse le ntlo e ke tla tsenang mo go yone.” Ka jalo kgosi ya a nnaya, go ya ka seatla se se molemo sa Modimo wa me mo go nna.+
9 Kgabagare ka goroga kwa balaoding+ ba ba ka kwa ga Noka mme ka ba naya makwalo a kgosi. Mo godimo ga moo, kgosi ya nthoma le balaodi ba mophato wa sesole le bapalami ba dipitse.
10 E rile Sanabalate+ wa Mohorona le Tobia+ motlhanka, Moamona,+ ba utlwa ka gone, mo go bone ga lebega e le selo se se bosula+ thata gore motho o ne a tlile go batlela bomorwa Iseraele sengwe se se molemo.
11 La bofelo ka goroga mo Jerusalema, mme ka nna teng malatsi a le mararo.
12 Go tswa foo ka nanoga bosigo, nna le banna ba le mmalwa ba na le nna, mme ka se ka ka bolelela motho+ ope se Modimo wa me a neng a se tsenya mo pelong ya me gore ke se direle Jerusalema,+ mme go ne go se na seruiwa sepe se se neng se na le nna fa e se seruiwa se ke neng ke se palame.
13 Mme ka tswa ka Kgoro ya Mokgatšha+ bosigo le fa pele ga Motswedi wa Noga e Kgolo le go ya kwa Kgorong ya Dithotobolo tsa Molora,+ mme ke ne ke tlhatlhoba dipota+ tsa Jerusalema ka metlha, kafa di neng di thubilwe ka teng le kafa dikgoro+ tsa yone di neng di laitswe ke molelo ka teng.
14 Mme ka fetela kwa Kgorong ya Motswedi+ le kwa Mogobeng wa Kgosi, mme go ne go se na gope fa seruiwa se ke se palameng se neng se ka feta teng.
15 Mme ka nna ka tlhatloga mokgatšha+ o o phothoselang bosigo, mme ka nna ka tlhatlhoba lobota; mme morago ga moo ka boa ka tsena ka Kgoro ya Mokgatšha,+ mme ka boa jalo.
16 Mme bathusi ba mmusi+ ba ne ba sa itse gore ke ne ke ile kae le gore ke ne ke dira eng; mme ke ne ke ise ke bolelele Bajuda le baperesiti le batlotlegi le bathusi ba mmusi le badiri ba bangwe botlhe ba tiro sepe.
17 La bofelo ka ba raya ka re: “Lo bona seemo se se maswe se re leng mo go sone, kafa Jerusalema a swafetseng ka teng le dikgoro tsa gagwe di fisitsweng ka molelo ka teng. Tlang re ageng lobota lwa Jerusalema sesha, gore re se ka ra tlhola re nna kgobo.”+
18 Mme ka tswelela ka ba bolelela ka seatla+ sa Modimo wa me, gore se ne se le molemo jang mo go nna,+ le ka mafoko a kgosi+ a e neng e a buile le nna. Foo ba re: “A re nanogeng, mme re ageng.” Ka jalo ba nonotsha diatla tsa bone go dira tiro e e molemo.+
19 Jaanong e rile Sanabalate+ wa Mohorona le Tobia+ wa motlhanka,+ Moamona,+ le Gesheme+ wa Moarabia+ ba utlwa ka gone, ba simolola go re sotla+ le go re leba ka lenyatso ba re: “Ke eng selo seno se lo se dirang? A lo tsuologela kgosi?”+
20 Le fa go ntse jalo, ka ba fetola ka ba raya ka re: “Modimo wa magodimo+ ke Ene yo o tla re atlegisang,+ mme rona, batlhanka ba gagwe, re tla nanoga, mme re age; mme lona ga lo na seabe,+ le fa e le sepe se lo tshwanetseng gore lo se newe, le fa e le segopotso+ mo Jerusalema.”
