Nehemia 8:1-18
8 Mme batho botlhe ba phuthega mmogo jaaka motho a le mongwe+ kwa patlelong+ e e neng e le fa pele ga Kgoro ya Metsi.+ Go tswa foo ba bolelela Esera+ mokwalolodi gore a tlise buka+ ya molao wa ga Moshe,+ o Jehofa a neng a o laetse Iseraele.+
2 Ka jalo moperesiti+ Esera a tlisa molao fa pele ga phuthego+ ya banna le ya basadi le ya botlhe ba ba botlhale go ka reetsa,+ mo letsatsing la ntlha la kgwedi ya bosupa.+
3 Mme a tswelela go e balela+ kwa godimo fa pele ga patlelo e e fa pele ga Kgoro ya Metsi, go simolola fa letsatsi le tlhaba+ go fitlha ka sethoboloko, fa pele ga banna le basadi le ba bangwe ba ba botlhale; mme ditsebe+ tsa batho botlhe di ne di reeditse+ buka ya molao.
4 Mme Esera mokwalolodi a nna a eme mo bogatong jwa logong,+ jo ba neng ba bo diretse moletlo oo; mme Matithia le Shema le Anaia le Uria le Hilekia le Maaseia ba ne ba eme fa thoko ga gagwe go ya kafa letsogong la gagwe la moja, mme kafa molemeng wa gagwe Pedaia le Mishaele le Malekija+ le Hashume+ le Hashe-badana, Sekarea le Meshulame.
5 Mme Esera a bula+ buka fa pele ga matlho a batho botlhe, gonne o ne a le kwa godimo ga batho botlhe; mme fa a ne a e bula batho botlhe ba ema ka dinao.+
6 Go tswa foo Esera a baka Jehofa+ Modimo wa boammaaruri, yo Mogolo, mme batho botlhe ba araba ba re, “Amen! Amen!”+ ba tsholetsa diatla tsa bone.+ Go tswa foo ba obama+ mme ba ikobela Jehofa difatlhego tsa bone di lebile fa fatshe.+
7 Mme Jeshua le Bani le Sherebia,+ Jamine, Akube, Shabethai, Hodia, Maaseia, Kelita, Asaria, Josabade,+ Hanane, Pelaia,+ le e leng Balefi, ba ne ba tlhalosetsa batho+ molao, fa batho bone ba ne ba eme.+
8 Mme ba tswelela ba balela+ buka kwa godimo, molao wa Modimo wa boammaaruri, o tlhalosiwa ka botlalo, gape o dirwa gore o nne le bokao; mme ba tswelela ba dira gore go tlhaloganngwe se se balwang.+
9 Mme Nehemia,+ ke gore, Motireshatha,+ le moperesiti Esera+ e bong mokwalolodi, le Balefi ba ba neng ba ruta batho ba raya batho botlhe ba re: “Letsatsi leno le boitshepo mo go Jehofa Modimo wa lona.+ Lo se ka lwa hutsafala le fa e le go lela.”+ Gonne batho botlhe ba ne ba lela fa ba ne ba utlwa mafoko a molao.+
10 Mme a ba raya a re: “Tsamayang, lo je dilo tse di mafura lo nwe dilo tse di botshe, mme lo romele dingwe+ tsa tsone kwa go yo a sa baakanyediwang sepe; gonne letsatsi leno le boitshepo mo Moreneng wa rona, mme lo se ka lwa utlwa botlhoko, gonne boipelo jwa ga Jehofa ke kago ya lona e e thata.”
11 Mme Balefi ba ne ba laela batho botlhe gore ba didimale, ba re: “Didimalang! gonne letsatsi leno le boitshepo; mme lo se ka lwa utlwa botlhoko.”
12 Ka jalo batho botlhe ba tsamaya ba ya go ja le go nwa le go romela dingwe+ tsa tsone le go tswelela ba ipela thata,+ gonne ba ne ba tlhalogantse mafoko a ba neng ba a itsisitswe.+
13 Mme mo letsatsing la bobedi ditlhogo tsa borre ba batho botlhe, baperesiti le Balefi, tsa phuthegela mmogo kwa go Esera mokwalolodi, le e leng gore ba nne le temogo mo mafokong a molao.+
14 Mme ba fitlhela go kwadilwe mo molaong gore Jehofa o ne a laetse ka Moshe+ gore bomorwa Iseraele ba ne ba tshwanetse go nna mo diobong+ mo nakong ya moletlo mo kgweding ya bosupa,+
15 le gore ba tshwanetse go tlhaba mokgosi+ le go dira gore mokgosi o utlwadiwe go ralala metse yotlhe ya bone le go ralala Jerusalema,+ ba re: “Yang kwa kgaolong e e dithaba+ mme lo tlise matlhare a motlhware+ le matlhare a ditlhare tsa leokwane le matlhare a moretela le matlhare a mokolane le matlhare a ditlhare tse di dikala go tla go dira diobo, go ya ka se se kwadilweng.”
16 Mme batho ba tswa ba a tlisa mme ba itirela diobo, mongwe le mongwe mo borulelong+ jwa gagwe le mo malwapeng a bone le mo malwapeng+ a ntlo ya Modimo wa boammaaruri le mo patlelong+ ya Kgoro ya Metsi+ le mo patlelong ya Kgoro ya Eferaime.+
17 Ka jalo phuthego yotlhe ya ba ba neng ba boile kwa botshwarwa ya dira diobo mme ya nna mo diobong; gonne bomorwa Iseraele ba ne ba ise ba ko ba dire jalo go tloga mo malatsing a ga Joshua morwa Nune+ go fitlha mo letsatsing leo, mo e leng gore go ne ga ipelwa thata.+
18 Mme buka ya molao wa Modimo wa boammaaruri e ne e balelwa kwa godimo letsatsi le letsatsi,+ go simolola ka letsatsi la ntlha go fitlha mo letsatsing la bofelo; mme ba tswelela go tshwara moletlo malatsi a le supa, mme mo letsatsing la borobedi go ne go na le kopano e e masisi, go ya ka molao.+
