Sefania 1:1-18
1 Lefoko la ga Jehofa le le neng la tla kwa go Sefania morwa Kushi morwa Gedalia morwa Amaria morwa Hesekia mo metlheng ya ga Josia+ morwa Amone+ kgosi ya Juda:
2 “Ruri ke tla fedisa sengwe le sengwe ke se tlosa mo godimo ga lefatshe,” go bua Jehofa.+
3 “Ke tla fedisa motho wa mo lefatsheng le phologolo.+ Ke tla fedisa sebopiwa se se fofang sa magodimo le ditlhapi tsa lewatle,+ le dikgopi mmogo le baikepi;+ mme ke tla kgaola batho mo godimo ga lefatshe,”+ go bua Jehofa.
4 “Mme ke tla otlolola seatla sa me kgatlhanong le Juda le kgatlhanong le banni botlhe ba Jerusalema,+ le gone ke tla kgaola mo lefelong leno ba ba setseng ba ga Baale,+ leina la baperesiti ba medimo ya seeng mmogo le baperesiti,+
5 le ba ba ikobelang masomosomo a magodimo+ ba le mo marulelong, le ba ba ikobang,+ ba direla Jehofa maikano+ a a ikanetsweng e bile ba dira maikano a a ikanetsweng ka Malekame;+
6 le ba ba katang ka morago mo go saleng Jehofa morago+ le ba ba sa senkang Jehofa e bile ba sa tlhotlhomisa mo go ene.”+
7 Didimalang fa pele ga Morena Molaodimogolo Jehofa;+ gonne letsatsi la ga Jehofa le gaufi,+ gonne Jehofa o baakantse setlhabelo;+ o itshepisitse+ balalediwa ba gagwe.
8 “Mme go tla diragala gore mo letsatsing la setlhabelo sa ga Jehofa ke ele tlhoko dikgosana, le bomorwa kgosi,+ le botlhe ba ba apereng diaparo tsa seeng.+
9 Mme ke tla ela tlhoko mongwe le mongwe yo o palamang serala mo letsatsing leo, ba ba tlatsang ntlo ya beng ba bone ka thubakanyo le tsietso.+
10 Mme mo letsatsing leo,” go bua Jehofa, “go tla utlwala modumo wa selelo o tswa kwa Kgorong ya Ditlhapi,+ le go bokolela go tswa kwa karolong ya bobedi ya motse,+ le go thubagana mo gogolo go tswa kwa dithoteng.+
11 Bokolelang+ lona banni ba Makateshe, gonne batho botlhe ba e leng bagwebi ba didimaditswe;+ botlhe ba ba lekanyang bokete jwa selefera ba kgaotswe.
12 “Mme go tla diragala gore ka nako eo ke hukutse Jerusalema ka kelotlhoko ka dipone,+ mme ke tla ela tlhoko batho ba ba itshekileng mo dintsheng tsa bone+ ba ba buang mo pelong ya bone ba re, ‘Jehofa ga a kitla a dira molemo, e bile ga a kitla a dira bosula.’+
13 Mme khumo ya bone e tla thopiwa le matlo a bone a tla kgakgabadiwa.+ E bile ba tla aga matlo, mme ga ba kitla ba nna mo go one;+ le gone ba tla jala masimo a mofine, mme ga ba kitla ba nwa beine ya one.+
14 “Letsatsi le legolo+ la ga Jehofa le gaufi.+ Le gaufi e bile le itlhaganela thata.+ Modumo wa letsatsi la ga Jehofa o bogalaka.+ Koo monna yo o thata o a goa.+
15 Letsatsi leo ke letsatsi la tšhakgalo, letsatsi la matshwenyego le la tlalelo e e mahehe,+ letsatsi la matsubutsubu le la kgakgabalo, letsatsi la lefifi le la letobo,+ letsatsi la maru le letobo le lentshontsho,
16 letsatsi la lonaka le la mokgosi wa tlhagiso,+ kgatlhanong le metse e e sireletsegileng le kgatlhanong le ditora tse di goletseng kwa godimo tsa dikhutlo.+
17 Mme ke tla baka go tshwenyega thata mo bathong, mme ruri ba tla tsamaya jaaka batho ba ba foufetseng;+ ka gonne ba leofetse Jehofa.+ Mme madi a bone a tla tshololwa jaaka lorole,+ le mala a bone jaaka boloko.+
18 Selefera ya bone le fa e le gouta ya bone e ka se kgone go ba golola mo letsatsing la tšhakgalo ya ga Jehofa;+ mme lefatshe lotlhe le tla lailwa+ ke molelo wa tlhoafalo ya gagwe, ka gonne o tla tlisa phediso mo banning botlhe ba lefatshe,+ e le e e boifisang eleruri.”
