Tshenolo 6:1-17
6 Mme ka leba fa Kwana+ a ne a bula se sengwe sa dikano tse supa,+ mme ka utlwa sengwe sa dibopiwa tse nnè tse di tshelang+ se bua ka lentswe le e keteng tumo ya maru se re: “Tla!”+
2 Ka leba, mme, bona! pitse e tshweu;+ mme yo o e pagameng+ o ne a tshotse bora;+ a newa serwalo,+ mme a tsamaya a fenya+ a ba a digela phenyo+ ya gagwe.
3 E rile a bula sekano sa bobedi, ka utlwa sebopiwa sa bobedi se se tshelang+ se re: “Tla!”
4 Mme e nngwe ya tla, pitse e e khunou; mme yo o e pagameng a newa go tlosa kagiso mo lefatsheng gore ba bolaane; mme a newa tšhaka e kgolo.+
5 E rile a+ bula sekano sa boraro, ka utlwa sebopiwa sa boraro se se tshelang+ se re: “Tla!” Ka leba, mme, bona! pitse e ntsho; mme yo o e pagameng o ne a tshotse sekale+ ka seatla.
6 Mme ka utlwa lentswe le e keteng le mo gare+ ga dibopiwa tse nnè tse di tshelang+ le re: “Kwatara ya korong ke denario,+ le dikwatara di le tharo tsa barele ke denario; mme o se ka wa senya lookwane lwa motlhware le beine.”+
7 E rile a bula sekano sa bonè, ka utlwa lentswe la sebopiwa sa bonè se se tshelang+ le re: “Tla!”
8 Ka leba, mme, bona! pitse e tshetlha; mme leina la yo o e pagameng e ne e le Loso. Hadese+ e ne e mo setse morago e le gaufi thata. Mme ba ne ba newa taolo godimo ga karolo ya bonè ya lefatshe, gore ba bolaye ka tšhaka e telele+ le ka tlhaelo ya dijo+ le ka sebetso se se bolayang le ka dibatana tsa naga+ tsa lefatshe.
9 Mme e rile a bula sekano sa botlhano, ka bona kafa tlase ga sebeso+ meya+ ya ba ba neng ba bolawa+ ka ntlha ya lefoko la Modimo le ka ntlha ya tiro ya go supa+ e ba kileng ba bo ba e dira.
10 Mme ya goa ka lentswe le le kwa godimo, ya re: “Morena Molaodimogolo+ yo o boitshepo le yo o boammaaruri, o tla ithiba go atlhola+ le go busolosa madi+ a rona mo go ba ba nnang mo lefatsheng go fitlha leng?”
11 Mme mongwe le mongwe wa yone wa newa seaparo se se telele se sesweu;+ mme ya bolelelwa gore e ikhutse ka lobakanyana, go fitlha go tladiwa le palo ya batlhankammogo le yone le bomorwarraayone ba ba neng ba tloga ba bolawa+ fela jaaka le yone e bolailwe.
12 Mme ka leba fa a bula sekano sa borataro, mme ga nna thoromo e kgolo ya lefatshe; letsatsi la nna lentsho jaaka letsela la kgetsi+ la moriri, mme ngwedi yotlhe ya nna jaaka madi,+
13 dinaledi tsa legodimo tsa wela mo lefatsheng, jaaka fa setlhare sa mofeige se se tshikhinngwang ke phefo e kgolo se tlhotlhora difeige tsa sone tse di sa butswang.
14 Legodimo la tloga jaaka lokwalo lwa momeno lo lo menwang,+ le thaba nngwe le nngwe le setlhaketlhake sengwe le sengwe di ne tsa tlosiwa mo mafelong a tsone.+
15 Mme dikgosi tsa lefatshe le ba maemo a a kwa godimo le balaodi ba sesole le ba ba humileng le ba ba nonofileng le motlhanka mongwe le mongwe le motho mongwe le mongwe yo o gololesegileng ba iphitlha mo dikgageng le mo mafikeng+ a dithaba.
16 Ba nna ba raya dithaba le mafika ba re: “Re weleng godimo+ lo bo lo re fitlhele sefatlhego sa Yo o ntseng mo setulong sa bogosi+ le tšhakgalo ya Kwana,+
17 ka gonne letsatsi le legolo+ la tšhakgalo+ ya bone le gorogile, mme ke mang yo o kgonang go ema?”+
