Ditiragalo wa Ntlha 20:1-8
20 Fa ngwaga o simologa,* ka nako ya fa dikgosi di ne di ya matsholong, Joabe+ o ne a etelela mophato wa masole pele ba ya ntweng mme ba ne ba senya lefatshe la Baamone; o ne a tla mme a kampa go dikologa Raba,+ fa Dafide ene a ne a setse kwa Jerusalema.+ Joabe o ne a tlhasela Raba a bo a e senya.+
2 Go tswa foo, Dafide o ne a rola Malekame serwalo sa tlhogo, mme o ne a fitlhela bokete jwa sone e le talenta* ya gauta, e bile mo go sone go ne go na le maje a a tlhwatlhwakgolo; mme se ne sa rwesiwa Dafide. Gape o ne a gapa dilo di le dintsi thata mo motseng.+
3 Mme o ne a ntsha batho ba ba neng ba le mo go one a bo a ba naya tiro+ ya go shaga maje, ya go bereka ka didirisiwa tsa tshipi tse di bogale le ka dilepe. Seo ke se Dafide a neng a se dira metse yotlhe ya Baamone. La bofelo Dafide le masole otlhe ba ne ba boela kwa Jerusalema.
4 Morago ga seno, Baiseraele ba ne ba lwa le Bafilisitia kwa Gesere. Ka nako eo, Sibekai+ wa Mohusha o ne a bolaya Sipai, yo e neng e le setlogolwana sa Barefaime,+ mme Bafilisitia ba ne ba fenngwa.
5 Mme go ne ga lowa gape le Bafilisitia, mme Elehanane morwa Jaire o ne a bolaya Lahemi monnawe Goliathe+ wa Mogathe, yo lerumo la gagwe le neng le na le thobane e e tshwanang le logong lwa balogi.+
6 Go ne ga nna le ntwa e nngwe gape kwa Gathe,+ kwa go neng go na le monna yo mogolo ka tsela e e sa tlwaelegang,+ a na le menwana e le 6 mo seatleng sengwe le sengwe le menwana e le 6 mo lonaong longwe le longwe, yotlhe e le 24; mme le ene e ne e le setlogolwana sa Barefaime.+
7 O ne a nna a kgoba+ Iseraele. Ka jalo, Jonathane morwa Shimea,+ morwarraagwe Dafide, o ne a mmolaya.
8 Bano e ne e le ditlogolwana tsa Barefaime+ kwa Gathe,+ mme ba ne ba wa ka seatla sa ga Dafide le ka seatla sa batlhanka ba gagwe.
