Ditiragalo wa Ntlha 23:1-32
23 E rile Dafide a setse a tsofetse e bile a le gaufi le go swa,* o ne a tlhoma morwawe e bong Solomone gore a nne kgosi mo Iseraele.+
2 Go tswa foo, o ne a phutha dikgosana tsotlhe tsa Iseraele, baperesiti+ le Balefi.+
3 Balefi ba ba neng ba na le dingwaga di le 30 le go ya kwa godimo ba ne ba balwa;+ palo ya bone, monna mongwe le mongwe wa bone, e ne e le 38 000.
4 Mo go bano, ba le 24 000 ba ne ba direla e le baokamedi ba tiro e e neng e dirwa mo ntlong ya ga Jehofa, mme go ne go na le badiredibagolo le baatlhodi ba le 6 000,+
5 gape go ne go na le badisa ba dikgoro ba le 4 000,+ mme ba bangwe ba le 4 000 ba ba neng ba baka+ Jehofa ka diletswa tse Dafide a neng a bua ka tsone a re, “Ke di diretse go baka Modimo.”
6 Go tswa foo, Dafide o ne a ba rulaganya* go ya ka ditlhopha+ tsa bomorwa Lefi: Gereshone, Kohathe le Merari.+
7 Go tswa mo go ba Bagereshone e ne e le Ladane le Shimei.
8 Bomorwa Ladane e ne e le kgosana Jehiele, Sethame le Joele,+ ba ne ba le bararo.
9 Bomorwa Shimei e ne e le Shelomothe, Hasiele le Harana, ba ne ba le bararo. Bano e ne e le ditlhogo tsa dikgotla tsa bone tsa ga Ladane.
10 Mme bomorwa Shimei e ne e le Jahathe, Sina, Jeushe le Beria. Barwa bano ba banê e ne e le bomorwa Shimei.
11 Jahathe e ne e le tlhogo ya bone, mme wa bobedi e ne e le Sisahe. Mme e re ka Jeushe le Beria ba ne ba se na barwa ba le bantsi, ba ne ba balelwa mo kgotleng e le nngwe ya borraabone e bile ba na le maikarabelo a le mangwe fela.
12 Bomorwa Kohathe e ne e le Amerame, Isehare,+ Heberone le Usiele,+ ba ne ba le banê.
13 Bomorwa Amerame e ne e le Arone+ le Moshe.+ Mme Arone le bomorwawe ba ne ba nna ba tlhaoletswe+ gore ba direle mo lefelong la Boitshepo Jwa Maitshepo, gore ba ntshe ditlhabelo fa pele ga ga Jehofa, ba mo direle ba bo ba segofatse batho mo leineng la gagwe ka metlha.+
14 Mme Moshe monna wa Modimo wa boammaaruri ene, bomorwawe ba ne ba balelwa mo lotsong lwa Balefi.
15 Bomorwa Moshe e ne e le Gereshome+ le Eliesere.+
16 Bomorwa Gereshome tlhogo ya bone e ne e le Shebuele.+
17 Ditlogolwana* tsa ga Eliesere tlhogo ya bone e ne e le Rehabia;+ Eliesere o ne a se na barwa ba bangwe, mme bomorwa Rehabia bone ba ne ba le bantsi thata.
18 Go tswa mo go bomorwa Isehare,+ Shelomithe+ e ne e le kgosana.
19 Tlhogo ya bomorwa Heberone e ne e le Jeria, wa bobedi e le Amaria, wa boraro e le Jahasiele mme wa bonê e le Jekameame.+
20 Bomorwa Usiele+ tlhogo ya bone e ne e le Mika, mme wa bobedi e le Ishia.
21 Bomorwa Merari e ne e le Maheli le Mushi.+ Bomorwa Maheli e ne e le Eliasare le Kishe.
22 Eliasare o ne a swa, le fa go ntse jalo o ne a se na bana ba basimane mme o ne a na le bana ba basetsana fela. Ka jalo, ba ne ba nyalwa ke bomorwa Kishe, ba e neng e le ba masika a bone.*
23 Bomorwa Mushi e ne e le Maheli, Edere le Jeremothe, ba ne ba le bararo.
24 Bano e ne e le bomorwa Lefi go ya ka dikgotla tsa bone, go ya ka ditlhogo tsa dikgotla tsa bone, ba ba kwadisitsweng ba ba neng ba badilwe e bile ba tsentswe mo lenaaneng la maina a bone le ba ba neng ba dira tirelo ya ntlo ya ga Jehofa, go simolola ka ba ba nang le dingwaga di le 20 go ya kwa godimo.
25 Gonne Dafide o ne a rile: “Jehofa, Modimo wa Iseraele o neile batho ba gagwe boikhutso,+ mme o tla nna mo Jerusalema ka bosakhutleng.+
26 Gape Balefi ga ba kitla ba tshwanelwa ke go tsaya motlaagana kgotsa sepe sa dilwana tse di dirisiwang mo tirelong ya one.”+
27 Gonne go ya ka ditaelo tsa bofelo tsa ga Dafide, Balefi ba ba nang le dingwaga di le 20 go ya kwa godimo ba ne ba balwa.
28 Tiro ya bone e ne e le go thusa bomorwa Arone+ mo tirelong e e diriwang mo ntlong ya ga Jehofa, gore ba tlhokomele malwapa,+ diphaposi tsa bojelo, go itshekisiwa ga sengwe le sengwe se se boitshepo le tiro epe fela e e neng e tlhokega mo tirelong e e dirwang mo ntlong ya Modimo wa boammaaruri.
29 Ba ne ba thusa ka senkgwe se se tlhatlagantsweng,*+ bupi jo bo boleta jwa setlhabelo sa dijo tsa ditlhaka, diphaphatha tse di se nang sebediso,+ dikuku tse di apeilweng ka pane, tlhama e e tlhakantsweng+ e bile ba ne ba thusa ka tiro yotlhe ya go lekanya bontsi le bogolo jwa dilo.
30 Ba ne ba tshwanetse go ema moso mongwe le mongwe+ ba leboga Jehofa le go mmaka e bile ba ne ba tshwanetse go dira jalo le maitseboa.+
31 Ba ne ba thusa nako nngwe le nngwe fa go ne go ntshediwa Jehofa ditlhabelo tse di fisiwang ka Bosabata,+ ka bongwedi ba basha+ le ka nako ya dipaka tsa moletlo,+ go ya ka palo e e neng e tlhokega go ya ka melao e e tlhomilweng, ba dira jalo ka metlha fa pele ga ga Jehofa.
32 Gape ba ne ba direla mo tenteng ya bokopanelo le mo lefelong le le boitshepo. Gape ba ne ba thusa bomorwarraabone e bong bomorwa Arone mo tirelong e e dirwang mo ntlong ya ga Jehofa.
Dintlha Tse di Kwa Tlase
^ Seheb., “a tsofetse e bile a na le malatsi a le mantsi.”
^ Kgotsa “kgaoganya.”
^ Seheb., “Barwa.”
^ Seheb., “e le bomorwarraabone.”
^ Go tewa senkgwe se se bewang fa pele ga Modimo.
