Ditiragalo wa Ntlha 5:1-26
5 Bano ke bomorwa Rubene,+ leitibolo la ga Iseraele. E ne e le leitibolo, le fa go ntse jalo, e re ka a ile a leswafatsa* bolao jwa ga rraagwe,+ tshwanelo ya gagwe ya go nna leitibolo e ne ya newa bomorwa Josefa+ morwa Iseraele, ka jalo o ne a se ka a kwadisiwa mo tatelanong ya losika lwa bone a kwadisediwa tshwanelo ya go nna leitibolo.
2 Le fa gone Juda+ a ne a le kwa godimo ga bomorwarraagwe e bile go ne go tshwanetse ga tswa yo o neng a tla nna moeteledipele mo go ene,+ tshwanelo ya go nna leitibolo e ne ya nna ya ga Josefa.
3 Bomorwa Rubene, leitibolo la ga Iseraele, e ne e le Hanoke, Palu, Heserone le Karami.+
4 Morwa* Joele e ne e le Shemaia, morwa Shemaia e ne e le Gogo, morwa Gogo e ne le Shimei,
5 morwa Shimei e ne e le Mika, morwa Mika e ne e le Reaia, morwa Reaia e ne e le Baale,
6 mme morwa Baale e ne e le Beera, yo Kgosi Tilegathe-pilenesere+ wa Asiria a neng a mo isa botshwarwa; e ne e le kgosana ya Barubene.
7 Bomorwarraagwe ba ba neng ba kwadisitswe mo tatelanong ya masika go ya ka malapa a bone e ne e le Jeiele tlhogo ya bone, Sekarea
8 le Bela morwa Asase morwa Shema morwa Joele, yo o neng a nna kwa Aroere+ le go ya go fitlha kwa Nebo le Baale-meone.+
9 Kwa botlhaba o ne a aga go ya go fitlha kwa naga e simologang teng kwa Nokeng ya Euferatese,+ ka gonne leruo la bone le ne le le lentsi thata mo lefatsheng la Gileade.+
10 Mo motlheng wa ga Saulo, Barubene ba ne ba tlhabana le Bahagare, mme ba ne ba ba fenya, ka jalo ba ne ba nna mo ditenteng tsa bone mo nageng yotlhe e e kwa botlhaba jwa Gileade.
11 Jaanong ditlogolwana tsa ga Gada di ne di nna gaufi le bone mo lefatsheng la Bashana go ya go fitlha kwa Saleka.+
12 Joele e ne e le tlhogo ya bone, wa bobedi e le Shafame, le Janai le Shafate kwa Bashana.
13 Mme bomorwarraabone ba e leng ba dikgotla tsa bone e ne e le Mikaele, Meshulame, Sheba, Jorai, Jakane, Sia le Ebere, botlhe ba le supa.
14 E ne e le bomorwa Abihaile morwa Huri morwa Jaroa morwa Gileade morwa Mikaele morwa Jeshishai morwa Jahido morwa Buse.
15 Ahi morwa Abediele morwa Guni, e ne e le tlhogo ya kgotla ya bone.
16 Ba ne ba nna kwa Gileade,+ kwa Bashana+ le mo metseng e e e dikologileng le mo mafulong otlhe a Sharona go ya go fitlha kwa a felelang gone.
17 Botlhe ba ne ba kwadisitswe go ya ka tatelano ya losika mo motlheng wa ga Kgosi Jothame+ wa Juda le mo motlheng wa ga Kgosi Jeroboame*+ wa Iseraele.
18 Barubene, Bagada le halofo ya lotso lwa ga Manase ba ne ba na le batlhabani ba ba maatla ba le 44 760 mo mophatong wa bone wa masole, ba ba neng ba tshola dithebe le ditšhaka e bile ba tshola bora,* mme ba ne ba katiseditswe ntwa.
19 Ba ne ba tlhabana le Bahagare,+ Jeture, Nafishe+ le Nodabe.
20 Mme ba ne ba thusiwa go tlhabana le bone, mo e leng gore Bahagare le botlhe ba ba neng ba na le bone ba ne ba tsenngwa mo seatleng sa bone, ka gonne ba ne ba kopa Modimo gore a ba thuse mo ntweng, mme o ne a araba kopo ya bone ka gonne ba ne ba mo ikantse.+
21 Ba ne ba gapa leruo la bone, e leng dikamela di le 50 000, dinku di le 250 000 le ditonki di le 2 000 mmogo le batho ba le 100 000.
22 Ba ne ba bolaile batho ba le bantsi, ka gonne Modimo wa boammaaruri ke ene a neng a lwa ntwa eo.+ Mme ba ne ba nna mo lefelong la bone go fitlha ka nako ya fa ba isiwa botshwarwa.+
23 Ditlogolwana tsa halofo ya lotso lwa ga Manase,+ di ne di nna mo lefatsheng leo go simologa kwa Bashana go ya kwa Baale-heremone le kwa Senire le kwa Thabeng ya Heremone.+ Ba ne ba le bantsi thata.
24 Bano e ne e le ditlhogo tsa dikgotla tsa bone: Efere, Ishi, Eliele, Asariele, Jeremia, Hodafia le Jahadiele; e ne e le batlhabani ba ba maatla, banna ba ba tumileng, e bile e le ditlhogo tsa matlo a borraabone.
25 Le fa go ntse jalo, ga ba a ka ba ikanyega mo Modimong wa borraabonemogolo mme ba ne ba obamela* medimo ya ditšhaba tsa lefatshe leo,+ tse Modimo a neng a di nyeleditse fa pele ga bone.
26 Ka jalo, Modimo wa Iseraele o ne a tlhotlheletsa moya wa ga Kgosi Pule wa Asiria+ (go tewa Kgosi Tilegathe-pilenesere+ wa Asiria) mo a neng a tsaya Barubene, Bagada le halofo ya lotso lwa ga Manase mme a ba isa botshwarwa kwa Hala, Habore, Hara le kwa nokeng ya Gosane,+ kwa ba leng gone go tla go fitlha mo letsatsing leno.
Dintlha Tse di Kwa Tlase
^ Kgotsa “itshepolola.”
^ Seheb., “Bomorwa.”
^ Go tewa Jeroboame II.
^ Seheb., “e bile ba gata bora.”
^ Kgotsa “bagwebakammele le.”
