Ditiragalo wa Ntlha 9:1-44
9 Baiseraele botlhe ba ne ba kwadisitswe go ya ka tatelano ya masika a bone e bile ba kwadilwe mo Bukeng ya Dikgosi Tsa Iseraele. Bajuda ba ne ba isiwa botshwarwa kwa Babelona ka gonne ba ne ba sa ikanyege.+
2 Batho ba ntlha go boela kwa metseng ya bone e ne e le Baiseraele bangwe, baperesiti, Balefi le batlhanka ba ba direlang mo tempeleng.*+
3 Mme dingwe tsa ditlogolwana tsa ga Juda,+ tsa ga Benjamine,+ tsa ga Eferaime le tsa ga Manase tse di neng tsa nna kwa Jerusalema e ne e le:
4 Uthai morwa Amihude morwa Omeri morwa Imeri morwa Bani, yo o tswang mo ditlogolwaneng tsa ga Perese+ morwa Juda.
5 Mme go tswa mo Bashilong, e ne e le Asaia wa leitibolo le bomorwawe.
6 Mme go tswa mo go bomorwa Sera,+ e ne e le Jeuele le bangwe ba bomorwarraabone ba le 690.
7 Mme go tswa mo ditlogolwaneng tsa ga Benjamine, e ne e le Salu morwa Meshulame morwa Hodafia morwa Hasenua,
8 Ibeneia morwa Jerohame, Ela morwa Usi morwa Mikeri le Meshulame morwa Shefatia morwa Reuele morwa Ibenija.
9 Mme bomorwarraabone go ya ka tatelano ya masika a bone ba ne ba le 956. Banna bano botlhe e ne e le ditlhogo tsa dikgotla tsa bone.*
10 Mme ba ba tswang mo baperesiting e ne e le Jedaia, Jehoiaribe, Jakine,+
11 Asaria morwa Hilekia morwa Meshulame morwa Sadoke morwa Meraiothe morwa Ahitube, yo o neng a eteletse pele mo ntlong* ya Modimo wa boammaaruri,
12 Adaia morwa Jerohame morwa Pashure morwa Malekija, Maasai morwa Adiele morwa Jahasera morwa Meshulame morwa Meshilemithe morwa Imere,
13 le bomorwarraabone, ditlhogo tsa dikgotla tsa bone, banna ba ba maatla ba le 1 760, ba ba ikanyegang ba ba direlang mo ntlong ya Modimo wa boammaaruri.
14 Mme ba ba tswang mo Balefing e ne e le Shemaia+ morwa Hashube morwa Aserikame morwa Hashabia yo o tswang mo ditlogolwaneng tsa ga Merari;
15 le Bakabakare, Hereshe, Galale, Matania morwa Miga morwa Sikeri morwa Asafe,
16 Obadia morwa Shemaia morwa Galale morwa Jeduthune, le Berekia morwa Asa morwa Elekana, yo o neng a nna mo metsaneng ya Banetofa.+
17 Badisa ba dikgoro+ e ne e le Shalume, Akube, Talemone, Ahimane le Shalume wa losika lwa bone yo e neng e le tlhogo ya bone,
18 mme go fitlha ka nako eo o ne a le kwa kgorong ya kgosi e e ka fa botlhaba.+ Bano e ne e le badisa ba dikgoro tsa dikampa tsa Balefi.
19 Mme Shalume morwa Kore morwa Ebiasafe morwa Kora le bomorwarraagwe ba kgotla ya borraabone, ba e leng Bakora, ba ne ba okametse ditiro tse di dirwang ke badisa ba kgoro ya tente, mme borraabone ba ne ba okametse kampa ya ga Jehofa e le badisa ba kgoro.
20 Finease+ morwa Eliasare+ e ne e le ene moeteledipele wa bone mo nakong e e fetileng; Jehofa o ne a na le ene.
21 Sekarea+ morwa Meshelemia e ne e le modisa wa kgoro ya tente ya bokopanelo.
22 Banna botlhe ba ba neng ba tlhophilwe gore ba dise dikgoro ba ne ba le 212. Ba ne ba le mo metsaneng ya bone go ya kafa ba kwadisitsweng ka tatelano ya masika a bone+ ka gone. Dafide le Samuele wa mmoni*+ ba ne ba ba tlhoma mo tirong ya bone e ba e abetsweng.
23 Bone le bomorwaabone ba ne ba okametse tirelo ya go disiwa ga dikgoro tsa ntlo ya ga Jehofa,+ e leng ntlo ya tente.
24 Badisa ba dikgoro ba ne ba le mo matlhakoreng a manê: kwa botlhaba, kwa bophirima, kwa bokone le kwa borwa.+
25 Nako le nako bomorwarraabone ba ne ba tshwanetse go tswa kwa metsaneng ya bone ba tla go direla mmogo le bone malatsi a le supa.
26 Go ne go na le badisabagolo* ba dikgoro ba le banê mo tirong e ba e abetsweng. E ne e le Balefi, mme ba ne ba tlhokometse matlwana* le mabolokelamatlotlo a ntlo ya Modimo wa boammaaruri.+
27 Ba ne ba nna bosigo jotlhe ba le mo maemong a bone ba dikologile ntlo ya Modimo wa boammaaruri, ka gonne ba ne ba dira tiro ya go disa e bile ba ne ba tshola selotlolo, mme ba ne ba bula ntlo moso mongwe le mongwe.
28 Bangwe ba bone ba ne ba tlhokomela dilwana+ tse di neng di dirisiwa kwa tempeleng; ka gonne ba ne ba di bala fa ba di tsenya e bile ba ne ba di bala fa ba di ntsha.
29 Bangwe ba bone ba ne ba tlhomilwe gore ba okamele dilwana, dilwana tsotlhe tse di boitshepo,+ le bupi jo bo boleta,+ beine,+ leokwane,+ borekhu jo bo nkgang monate*+ le leokwane la balema.+
30 Bangwe ba bomorwa baperesiti ba ne ba tswakanya setlôlô sa leokwane la balema.
31 Mme Matithia wa lotso lwa Balefi, yo e neng e le leitibolo la ga Shalume wa Mokora, o ne a abetswe tiro ya go okamela dilo tse di besiwang mo dipaneng.+
32 Bangwe ba bomorwarraabone ba Bakohathe ba ne ba okametse senkgwe se se tlhatlagantsweng,*+ gore ba se baakanye ka sabata mongwe le mongwe.+
33 Bano e ne e le baopedi, ditlhogo tsa dikgotla tsa bone tsa Balefi mo matlwaneng,* ba ba neng ba sa dire ditiro tse dingwe; ka gonne boikarabelo jwa bone e ne e le gore ba bereke motshegare le bosigo.
34 Bano e ne e le ditlhogo tsa dikgotla tsa bone tsa Balefi go ya ka tatelano ya masika a bone, e le dikgosana. Bano ba ne ba nna kwa Jerusalema.
35 Rraagwe Gibeone, e bong Jeiele, o ne a nna kwa Gibeone.+ Leina la mosadi wa gagwe e ne e le Maaka.
36 Mme morwawe wa leitibolo e ne e le Abedona, go bo go latela Sure, Kishe, Baale, Nere, Nadabe,
37 Gedore, Ahio, Sekarea le Mikelothe.
38 Mikelothe o ne a nna rraagwe Shimeame. Mme bano botlhe ba ne ba nna go bapa le bomorwarraabone kwa Jerusalema, mmogo le bomorwarraabone ba bangwe.
39 Nere+ o ne a nna rraagwe Kishe; Kishe o ne a nna rraagwe Saulo;+ Saulo o ne a nna rraagwe Jonathane,+ Maleki-shua,+ Abinadabe+ le Eshebaale.
40 Mme morwa Jonathane e ne e le Meribe-baale.+ Meribe-baale o ne a nna rraagwe Mika.+
41 Mme bomorwa Mika e ne e le Pithone, Meleke, Taherea le Ahase.
42 Ahase o ne a nna rraagwe Jarahe; Jarahe o ne a nna rraagwe Alemethe, Asamafetha le Simeri. Simeri o ne a nna rraagwe Mosa.
43 Mosa o ne a nna rraagwe Binea, Binea o ne a nna rraagwe Refaia, Refaia o ne a nna rraagwe Eleasa, Eleasa o ne a nna rraagwe Asele.
44 Asele o ne a na le barwa ba le barataro, mme maina a bone e ne e le Aserikame, Bokeru, Ishemaele, Shearia, Obadia le Hanane. Bano e ne e le bomorwa Asele.
Dintlha Tse di Kwa Tlase
^ Kgotsa “le Banethinime.” Seheb., “le ba ba abilweng.”
^ Seheb., “ditlhogo tsa borre tse di okametseng ntlo ya borraabone.”
^ Kgotsa “tempeleng.”
^ Bona Ditlhaloso Tsa Mafoko.
^ Kgotsa “diphaposi tsa bojelo.”
^ Seheb., “badisa ba ba maatla.”
^ Seheb., “lebano.” Bona Ditlhaloso Tsa Mafoko.
^ Go tewa senkgwe se se bewang fa pele ga Modimo.
^ Kgotsa “diphaposing tsa bojelo.”
