Johane wa Ntlha 5:1-21
5 Mongwe le mongwe yo o dumelang gore Jesu ke Keresete, ke ngwana wa Modimo,+ mme mongwe le mongwe yo o ratang Modimo o rata bana ba Modimo.
2 Re a itse gore re rata bana ba Modimo,+ fa re rata Modimo e bile re ikobela ditaelo tsa gagwe.
3 Fa re rata Modimo, re tla ikobela ditaelo tsa gagwe;+ mme ditaelo tsa gagwe ga di imele,+
4 ka gonne mongwe le mongwe yo* e leng ngwana wa Modimo o fenya lefatshe.+ Mme re fentse lefatshe ka tumelo ya rona.+
5 Ke mang yo o ka fenyang lefatshe?+ A ga se yo o dumelang gore Jesu ke Morwa Modimo?+
6 Jesu Keresete o ne a tla ka metsi le madi, e seng ka metsi fela;+ mme o ne a tla ka metsi le ka madi.+ Mme moya o naya bosupi ka seno,+ ka gonne moya o senola boammaaruri.
7 Gonne go na le dilo tseno tse tharo tse di senolang gore Jesu ke mang:
8 moya,+ metsi+ le madi;+ mme dilo tseno tse tharo di a dumalana.
9 Fa e le gore re amogela bosupi jo bo tswang mo bathong, bosupi jo Modimo a bo nayang bo bogolo thata. Gonne jono ke bosupi jo Modimo a re nayang jone ka Morwawe.
10 Motho yo o dumelang mo go Morwa Modimo, o bontsha gore mo pelong ya gagwe go na le se Modimo a se mo rutileng. Motho yo o sa dumeleng mo Modimong o dirile Modimo moaki,+ ka gonne ga a dumele bosupi jo Modimo a re neileng jone ka Morwawe.
11 Mme jono ke bosupi, jwa gore Modimo o ne a re naya botshelo jo bo sa khutleng,+ mme botshelo jono bo mo go Morwawe.+
12 Yo o amogelang Morwa o na le tsholofelo ya botshelo jono; mme yo o sa amogeleng Morwa Modimo ga a na tsholofelo ya botshelo jono.+
13 Ke lo kwalela dilo tseno gore lo itse gore lo tla bona botshelo jo bo sa khutleng,+ lona ba lo dumelang mo leineng la Morwa Modimo.+
14 Re tshepa Modimo,*+ gore sepe fela se re se kopang go dumalana le thato ya gagwe, o a re utlwa.+
15 Mme fa re itse gore o a re utlwa fa re kopa sengwe le sengwe mo go ene, gape re a itse gore o tla re naya dilo tse re di kopang, ka gonne re di kopile mo go ene.+
16 Fa mongwe a bona mokaulengwe wa gagwe a dira boleo jo bo sa bakeng loso, o tshwanetse go mo rapelela, mme Modimo o tla mo naya botshelo,+ eleruri, o tla bo naya ba ba sa direng boleo jo bo bakang loso. Le fa go ntse jalo, go na le boleo jo bo bakang loso.+ Ga ke mmolelele gore a rapelele motho yo o dirang boleo jo bo ntseng jalo.
17 Ditiro tsotlhe tse di bosula ke boleo,+ mme le fa go ntse jalo go na le boleo jo bo sa bakeng loso.
18 Re a itse gore motho mongwe le mongwe yo e leng ngwana wa Modimo ga a dire boleo, e bile Morwa Modimo o a mo sireletsa, mme Satane* ga a kitla a mo tshwara.*+
19 Re a itse gore re ba Modimo, mme lefatshe lotlhe le laolwa ke Satane.*+
20 Le fa go ntse jalo, re a itse gore Morwa Modimo o tlile,+ mme o re neile temogo* gore re nne le kitso ka Modimo wa boammaaruri. Re seoposengwe le ene+ ka ntlha ya ga Morwawe e bong Jesu Keresete. Yono ke Modimo wa boammaaruri e bile ke motswedi wa botshelo jo bo sa khutleng.+
21 Bana ba bannye, ikeleng tlhoko* mo medingwaneng.+
Dintlha Tse di Kwa Tlase
^ Seger., “sengwe le sengwe se.”
^ Kgotsa “Re ka bua le Modimo re sa tshabe.”
^ Seger., “yo o boikepo.” Bona Ditlhaloso Tsa Mafoko.
^ Kgotsa “ga a kitla a mo ngangatlela.”
^ Seger., “yo o boikepo.” Bona Ditlhaloso Tsa Mafoko.
^ Seger., “bokgoni jwa go akanya; botlhale.”
^ Seger., “itiseng.”
