Samuele wa Ntlha 13:1-23
13 Saulo o ne a na le dingwaga di le . . .* fa a ne a nna kgosi,+ mme o ne a busa Iseraele dingwaga di le pedi.
2 Saulo o ne a tlhopha banna ba le 3 000 mo Iseraele; ba le 2 000 ba bone ba ne ba na le Saulo kwa Mikemashe le mo kgaolong e e dithaba ya Bethele, mme ba le 1 000 ba ne ba na le Jonathane+ kwa Gibea+ wa ga Benjamine. O ne a naya batho ba bangwe botlhe tsela, mongwe le mongwe a ya kwa tenteng ya gagwe.
3 Foo Jonathane o ne a kgemetha setlhopha sa masole a a sireletsang a Bafilisitia+ se se neng se le kwa Geba,+ mme Bafilisitia ba ne ba utlwa ka gone. Mme Saulo o ne a laela gore go lediwe lonaka+ mo nageng yotlhe, a re: “A Bahebera ba utlwe!”
4 Baiseraele botlhe ba ne ba utlwa dikgang tseno: “Saulo o kgemethile setlhopha sa masole a a sireletsang a Bafilisitia, mme jaanong Bafilisitia ba tlhoile Iseraele.” Ka jalo, batho ba ne ba bidiwa gore ba sale Saulo morago kwa Gilegala.+
5 Bafilisitia le bone ba ne ba phuthega mmogo gore ba tlhabane le Iseraele, ba na le dikara tsa ntwa di le 30 000 le masole a a tsamayang ka dipitse a le 6 000 le mephato ya masole e le mentsi jaaka motlhaba* o o fa losing lwa lewatle;+ mme ba ne ba tsamaya ba bo ba kampa kwa Mikemashe kwa botlhaba jwa Bethe-afene.+
6 Mme banna ba Iseraele ba ne ba lemoga gore ba mo mathateng ka gonne ba ne ba le mo pitlaganong; ka jalo, batho ba ne ba iphitlha mo dikgageng,+ mo dikhuting, mo mafikeng, mo diphaposing tse di ka fa tlase ga matlo le mo dikhuting tsa go bolokela metsi.*
7 Bangwe ba Bahebera ba ne ba bo ba kgabaganya Joredane ba ya kwa lefatsheng la Gada le la Gileade.+ Le fa go ntse jalo, Saulo ene o ne a sa ntse a le kwa Gilegala, mme batho botlhe ba ba neng ba mo setse morago ba ne ba roroma.
8 O ne a tswelela a letile malatsi a le supa go fitlha ka nako e e tlhomilweng e Samuele a neng a e beile, le fa go ntse jalo Samuele o ne a se ka a tla mo Gilegala, mme batho ba ne ba phatlalala ba mo tlogela.
9 La bofelo Saulo o ne a re: “Tlisang setlhabelo se se fisiwang le ditlhabelo tsa go abelana fa go nna.” Mme o ne a ntsha setlhabelo se se fisiwang.+
10 Fela fa a fetsa go ntsha setlhabelo se se fisiwang, Samuele o ne a goroga. Ka jalo, Saulo o ne a tswa a ya go mo kgatlhantsha a bo a mo dumedisa.
11 Foo Samuele o ne a re: “O dirile eng?” Saulo o ne a araba a re: “Ke ne ke bona batho ba ntlogela,+ le wena o sa tle ka nako e e tlhomilweng, mme Bafilisitia bone ba ne ba phuthega mmogo kwa Mikemashe.+
12 Ka jalo, ke ne ka ipolelela ka re, ‘Jaanong Bafilisitia ba tla tla go ntlhasela mo Gilegala, mme ga ke ise ke kope kamogelo mo go* Jehofa.’ Ka jalo, ke ne ka ikutlwa ke patelesega go ntsha setlhabelo se se fisiwang.”
13 Foo Samuele o ne a raya Saulo a re: “O dirile bomatla. Ga o a ikobela taelo e Jehofa, Modimo wa gago a go e neileng.+ Fa o ka bo o dirile jalo, Jehofa a ka bo a dirile gore bogosi jwa gago bo nne ka bosakhutleng mo Iseraele.
14 Mme jaanong bogosi jwa gago ga bo kitla bo nnela ruri.+ Jehofa o tla tlhopha monna yo o amogelwang ke pelo ya gagwe+ e bile Jehofa o tla mo tlhoma go nna moeteledipele wa batho ba gagwe,+ ka gonne ga o a ikobela se Jehofa a neng a se go laetse.”+
15 Go tswa foo, Samuele o ne a tsamaya a tswa mo Gilegala a ya kwa Gibea wa ga Benjamine, mme Saulo o ne a bala batho; ba ba neng ba sa ntse ba na le ene e ne e le banna ba ka nna 600.+
16 Saulo, morwawe e bong Jonathane le batho ba ba neng ba sa ntse ba na le bone, ba ne ba nna kwa Geba+ wa ga Benjamine, mme Bafilisitia bone ba ne ba kampile kwa Mikemashe.+
17 Mme ditlhopha tse di tlhaselang di ne di tle di tswe mo kampeng ya Bafilisitia ka mephato e le meraro. Mophato o mongwe o ne o tle o fapogele kwa tseleng e e yang kwa Ofera, kwa lefatsheng la Shuale;
18 mophato o mongwe o ne o tle o fapogele kwa tseleng ya Bethe-horona,+ mme mophato wa boraro o bo o fapogela kwa tseleng e e yang kwa molelwaneng o o lebileng kwa mokgatšheng wa Seboima, go ela kwa nageng.
19 Jaanong go ne go se na ope yo o dirang ka tshipi mo lefatsheng lotlhe la Iseraele, ka gonne Bafilisitia ba ne ba rile: “Go seng jalo Bahebera ba ka dira tšhaka kgotsa lerumo.”
20 Mme Baiseraele botlhe ba ne ba tshwanelwa ke go ya kwa Bafilisitieng gore ba ye go lootsa magale a megoma, dikepu, dilepe kgotsa disekele tsa bone.
21 Tlhwatlhwa ya go lootsa magale a megoma, dikepu, didirisiwa tse di menomararo, dilepe le go gagamatsa setlhabo* sa pholo e ne e le digerama tsa sefelera di le 8.*
22 Mme mo letsatsing la tlhabano, go ne ga se ka ga fitlhelwa tšhaka kgotsa lerumo mo seatleng sa motho ope wa ba ba neng ba na le Saulo le Jonathane;+ Saulo le morwawe e bong Jonathane ke bone fela ba ba neng ba na le dibetsa.
23 Jaanong masole a a sireletsang a Bafilisitia a ne a ile kwa thotaneng ya Mikemashe.+
Dintlha Tse di Kwa Tlase
^ Ga go na palo mo mokwalong wa Sehebera.
^ Kgotsa “moshawa.”
^ Bona polelwana “Khuti ya go bolokela metsi” mo Ditlhaloso Tsa Mafoko.
^ Kgotsa “ke nolofatse sefatlhego sa ga.”
^ Bona Ditlhaloso Tsa Mafoko.
^ Seheb., “e le pime.” Bona Dintlha B14.
