Samuele wa Ntlha 27:1-12
-
Bafilisitia ba naya Dafide Sikelage (1-12)
27 Le fa go ntse jalo, Dafide o ne a bua jaana mo pelong: “Letsatsi lengwe Saulo o tlile go mpolaya. Go botoka gore ke tshabele+ kwa lefatsheng la Bafilisitia; foo Saulo o tla itlhoboga a bo a sa tlhole a mpatla mo nageng yotlhe ya Iseraele,+ mme ke tla falola mo seatleng sa gagwe.”
2 Ka jalo, Dafide o ne a tsamaya le banna ba le 600+ ba ba neng ba na le ene mme ba ya kwa go Akishe+ morwa Maoke, kgosi ya Gathe.
3 Dafide o ne a nna le Akishe kwa Gathe, ene le banna ba gagwe, monna mongwe le mongwe a na le ba lelapa la gagwe. Dafide o ne a na le basadi ba gagwe ba babedi, Ahinoame+ wa kwa Jesereele le Abigaile+ wa Mokaremele, motlholagadi wa ga Nabale.
4 Fa Saulo a begelwa gore Dafide o ne a tshabetse kwa Gathe, o ne a tlogela go mmatla.+
5 Foo Dafide o ne a raya Akishe a re: “Fa e le gore o nkutlwela botlhoko, a ba nneye lefelo mo motseng mongwe wa selegae, gore ke nne gone. Ke ka ntlha yang fa nna motlhanka wa gago ke tshwanetse go nna mo motseng wa segosi le wena?”
6 Ka jalo, Akishe o ne a mo naya Sikelage+ mo go lone letsatsi leo. Ke gone ka moo Sikelage e leng motse wa dikgosi tsa Juda go tla go fitlha mo letsatsing leno.
7 Dafide o ne a nna mo motseng wa selegae wa Bafilisitia ngwaga le dikgwedi di le nnê.+
8 Dafide o ne a tle a tsamaye le banna ba gagwe ba ya go tlhasela Bageshure,+ Bagirese le Baamaleke,+ ka gonne ba ne ba nna mo lefatsheng le le neng le simologa kwa Telame go ya go fitlha kwa Shure+ le go ya kwa lefatsheng la Egepeto.
9 E ne e re fa Dafide a tlhasela lefatshe, o ne a sa tlogele monna kgotsa mosadi a tshela,+ mme o ne a tsaya matsomane, metlhape, ditonki, dikamela le diaparo, mme morago ga moo o ne a boela kwa go Akishe.
10 Akishe o ne a tle a mmotse jaana: “Lo tlhasetse kae gompieno?” Dafide o ne a tle a arabe jaana: “Re tlhasetse kwa borwa jwa* Juda”+ kgotsa “Re tlhasetse kwa borwa jwa naga ya Bajerameele”+ kgotsa “Re tlhasetse kwa borwa jwa naga ya Bakene.”+
11 Dafide o ne a sa tlogele monna kgotsa mosadi ope a tshela yo o neng a ka tlisiwa mo Gathe, a re: “Gore ba se ka ba ba bolelela ka rona mme ba re: ‘Seno ke se Dafide a neng a se dira.’ ” (Mme ono ke mokgwa o a neng a dira ka one nako yotlhe fa a ne a nna kwa motseng wa selegae wa Bafilisitia.)
12 Ka jalo, Akishe o ne a dumela Dafide, a ipolelela a re: ‘Ruri o fetogile sebodu mo bathong ba gagabo ba Iseraele, ka jalo o tla tswelela e le motlhanka wa me.’
Dintlha Tse di Kwa Tlase
^ Kgotsa “kwa Negebe wa.”
