Bakorintha wa Bobedi 6:1-18
6 E re ka re le badirimmogo le Modimo,+ gape re lo kopa gore lo se ka lwa amogela bopelonomi jo bogolo* jwa Modimo lo bo lo lebala gore boikaelelo jwa jone ke eng.+
2 Gonne a re: “Mo nakong e e amogelesegang ke ne ka go utlwa, mme ke ne ka go thusa mo letsatsing la poloko.”+ Jaanong, eno ke nako ya gore Modimo a re amogele. Leno ke letsatsi la gore Modimo a re boloke.
3 Ga re batle go kgopisa ope, gore tiro ya rona ya go rera e se ka ya bonwa molato;+
4 mme ka dinako tsotlhe re bontsha gore re direla Modimo:+ re ne ra itshokela diteko di le dintsi, dipitlagano, dinako tse di boima le mathata.+
5 Re ne ra itewa, ra tsenngwa mo dikgolegelong,+ ra tlhaselwa ke digongwana, ra dira ka natla, re sa robale masigo e bile re tlhoka dijo.+
6 Re bontsha gore re direla Modimo fa re tshela botshelo jo bo phepa, re itshwara go dumalana le boammaaruri, re le pelotelele,+ re le pelonomi,+ re kaelwa ke moya o o boitshepo e bile re sa itire e kete re rata ba bangwe mme re sa ba rate.+
7 Re bua boammaaruri, re ikaega ka maatla a Modimo,+ re tshwara dibetsa tsa tshiamo+ ka seatla sa moja* le sa molema.*
8 Re a galalediwa e bile re a tlontlololwa, re a latofadiwa e bile re a akgolwa. Batho ba re re a tsietsa mme gone re bua boammaaruri,
9 ba re ga re itsiwe mme gone Modimo ene o a re itse, mo go bone go ntse jaaka e kete re a swa* mme gone re sa ntse re tshela,+ ba re tsaya jaaka batho ba ba otlhailweng mme gone ga re a bolawa.+
10 Batho ba akanya gore re hutsafetse mme gone re nna re itumetse, ba akanya gore re humanegile mme gone re abela batho dilo di le dintsi, ba akanya gore ga re na sepe mme gone re na le sengwe le sengwe.+
11 Bakorintha, re bua le lona re phuthologile e bile re lo rata thata.*
12 Le fa go ntse jalo, lona ga lo re rate ka tsela e rona re lo ratang ka yone.+
13 Ka jalo, ke bua le lona jaaka bongwanake, re rateng jaaka le rona re lo rata.+
14 Lo se ka lwa pataganela jokwe* le ba ba sa dumeleng.+ Gonne tshiamo le tshiamololo di tsalana jang?+ Kgotsa lesedi le amana jang le lefifi?+
15 Mo godimo ga moo, a go na le sengwe se Keresete le Satane* ba ka dumalanang ka sone?+ Kgotsa a go na le sengwe se motho yo o dumelang mo go Keresete* le motho yo o sa dumeleng mo go ene ba tshwanang ka sone?+
16 Gape a go a kgonega gore medingwana e nne mo tempeleng ya Modimo?+ Gonne re tempele ya Modimo yo o tshelang;+ fela jaaka Modimo a ne a re: “Ke tla nna mo gare ga bone+ ke bo ke tsamaya mo gare ga bone, mme ke tla nna Modimo wa bone, le bone ba tla nna batho ba me.”+
17 “‘Ka jalo, tswang mo gare ga bone, lo bo lo ikgaoganye le bone,’ go bua Jehofa,* ‘mme lo tlogele go tshwara selo se se seng phepa’”;+ “‘mme ke tla lo amogela.’”+
18 “‘Ke tla nna rraalona,+ mme lona lo tla nna bomorwaake le bomorwadiake,’+ go bua Jehofa* Mothatayotlhe.”
Dintlha Tse di Kwa Tlase
^ Bona Ditlhaloso Tsa Mafoko.
^ Gongwe go tlhasela.
^ Gongwe go itshireletsa.
^ Kgotsa “re tshwanelwa ke loso.”
^ Kgotsa “re lo buletse dipelo tsa rona.”
^ Kgotsa “lwa ikopanya.”
^ Seger., “Beliale.” Ke lefoko la Sehebera le le kayang “Motho yo e Seng wa Sepe.”
^ Kgotsa “motho yo o ikanyegang.”
^ Bona Dintlha A5.
^ Bona Dintlha A5.
