Dikgosi wa Bobedi 11:1-21
11 Jaanong e rile Athalia,+ mmaagwe Ahasia, a bona gore morwawe o ne a sule,+ o ne a bolaya losika lotlhe lwa segosi.+
2 Le fa go ntse jalo, Jehosheba morwadia Kgosi Jehorame, kgaitsadia Ahasia, o ne a tsaya Jehoashe+ morwa Ahasia mme a mo utswa mo go bomorwa kgosi ba ba neng ba tlile go bolawa, o ne a mmaya le mmelegi wa gagwe mo phaposing e e kwa teng ya borobalo. Ba ne ba kgona go mo fitlhela Athalia, ka jalo o ne a se ka a bolawa.
3 Mosadi yoo o ne a nna le ene dingwaga di le thataro, a fitlhilwe kwa ntlong ya ga Jehofa, fa Athalia ene a ne a busa lefatshe leo.
4 Mo ngwageng wa bosupa, Jehoiada o ne a laela gore go bidiwe baokamedi ba makgolo ba bafemedi ba Bakari le baokamedi ba bafemedi* ba ntlo ya segosi+ mme a laela gore ba tle kwa go ene kwa ntlong ya ga Jehofa. O ne a dira tumalano* le bone kwa ntlong ya ga Jehofa a bo a dira gore ba ikane gore ba tla e diragatsa, go tswa foo o ne a ba bontsha morwa kgosi.+
5 O ne a ba laela jaana: “Seno ke se lo tla se dirang: Setlhopha se le sengwe mo ditlhopheng tsa lona tse tharo, se tla bereka ka Sabata mme se tla nna se disitse ntlo ya kgosi*+ ka kelotlhoko,
6 setlhopha sa bobedi se tla nna kwa Kgorong ya Motheo, mme setlhopha sa boraro se tla nna kwa kgorong e e fa morago ga bafemedi ba ntlo ya segosi. Lo tla refosana go disa ntlo eo.
7 Ditlhopha tsa lona tse pedi tse di tla bong di sa bereke ka Sabata di tshwanetse go nna di disitse ntlo ya ga Jehofa ka kelotlhoko gore di sireletse kgosi.
8 Lo tshwanetse go ema go dikologa kgosi mo matlhakoreng otlhe, mongwe le mongwe a tshotse dibetsa tsa gagwe. Ope fela yo o tsenang mo meleng o tla bolawa. Lo tsamaye le kgosi gongwe le gongwe kwa e yang gone.”*
9 Baokamedi ba makgolo+ ba ne ba dira fela jaaka moperesiti Jehoiada a ne a ba laetse. Ka jalo, mongwe le mongwe wa bone o ne a tsaya banna ba gagwe ba ba neng ba bereka ka Sabata, mmogo le ba ba neng ba sa bereke ka Sabata, mme ba ne ba ya kwa go moperesiti Jehoiada.+
10 Go tswa foo, moperesiti o ne a naya baokamedi ba makgolo marumo le dithebe tse di kgolokwe tse e neng e le tsa ga Kgosi Dafide, tse di neng di le mo ntlong ya ga Jehofa.
11 Mme bafemedi ba ntlo ya segosi+ ba ne ba ema mo maemong a bone, mongwe le mongwe a tshotse dibetsa tsa gagwe, go tswa ka fa letlhakoreng la moja la ntlo go ya kwa letlhakoreng la molema la ntlo, fa thoko ga sebeso+ le fa thoko ga ntlo, go dikologa kgosi gotlhe fela.
12 Go tswa foo, Jehoiada o ne a ntsha morwa kgosi+ mme a mo rwesa serwalo sa segosi a bo a baya momeno o o nang le Molao wa Modimo*+ mo tlhogong ya gagwe, mme ba ne ba mo dira kgosi ba bo ba mo tlotsa. Ba ne ba simolola go opa diatla mme ba re: “A kgosi e tshele lobaka lo loleele!”+
13 E rile Athalia a utlwa modumo wa batho ba siana, ka yone nako eo o ne a ya kwa bathong kwa ntlong ya ga Jehofa.+
14 Foo o ne a bona kgosi e eme fa pilareng go ya ka fa tlwaelong.+ Baokamedi le baletsi ba diterompeta+ ba ne ba na le kgosi, mme batho botlhe ba lefatshe leo ba ne ba itumela e bile ba letsa diterompeta. Fa Athalia a bona seo, o ne a gagoganya diaparo tsa gagwe mme a goa a re: “Leano la boferefere! Leano la boferefere!”
15 Le fa go ntse jalo, moperesiti Jehoiada o ne a laela baokamedi ba makgolo,+ ba ba neng ba tlhomilwe go okamela masole, mme a ba raya a re: “Mo ntsheng mo meleng, mme fa mongwe a mo sala morago, lo mmolaye ka tšhaka!” Gonne moperesiti o ne a rile: “Lo se ka lwa mmolaela mo ntlong ya ga Jehofa.”
16 Ka jalo, ba ne ba mo tshwara, mme fa a fitlha kwa lefelong le dipitse di neng di tsena mo ntlong ya kgosi*+ kwa go lone, o ne a bolaelwa gone koo.
17 Go tswa foo, Jehoiada o ne a dira kgolagano le Jehofa le kgosi le batho,+ gore ba tla tswelela e le batho ba ga Jehofa, mme gape o ne a dira kgolagano fa gare ga kgosi le batho.+
18 Morago ga moo, batho botlhe ba lefatshe leo ba ne ba tla mo ntlong* ya ga Baale mme ba senya dibeso+ tsa gagwe, ba thubaganya ditshwantsho tsa gagwe gotlhelele+ ba bo ba bolaela Matane moperesiti wa ga Baale+ fa pele ga dibeso tseo.
Go tswa foo, moperesiti Jehoiada o ne a tlhoma balebedi gore ba okamele ntlo ya ga Jehofa.+
19 Mo godimo ga moo, o ne a tsaya baokamedi ba makgolo,+ bafemedi ba Bakari, bafemedi ba ntlo ya segosi,+ le batho botlhe ba lefatshe leo gore ba dise kgosi fa e tswa mo ntlong ya ga Jehofa, mme ba ne ba ya kwa ntlong ya kgosi* ka tsela ya kgoro ya bafemedi ba ntlo ya segosi. Go tswa foo, kgosi e ne ya nna mo setulong sa bogosi sa dikgosi.+
20 Ka jalo, batho botlhe ba lefatshe leo ba ne ba itumela, mme motse o ne wa iketla, ka gonne ba ne ba bolaile Athalia ka tšhaka kwa ntlong ya kgosi.
21 Jehoashe+ o ne a na le dingwaga di le supa fa a nna kgosi.+
Dintlha Tse di Kwa Tlase
^ Seheb., “batabogi.”
^ Kgotsa “kgolagano.”
^ Kgotsa “ntlo ya segosi.”
^ Seheb., “fa e tswa le fa e tsena.”
^ Seheb., “a bo a baya Tshupo.”
^ Kgotsa “mo ntlong ya segosi.”
^ Kgotsa “mo tempeleng.”
^ Kgotsa “kwa ntlong ya segosi.”
