Dikgosi wa Bobedi 20:1-21
20 Mo metlheng eo, Hesekia o ne a lwala mo a neng a le gaufi le go swa.+ Moporofeti Isaia morwa Amosi o ne a tla mme a mo raya a re, “Seno ke se Jehofa a se buang: ‘Naya ba lelapa la gago* ditaelo, ka gonne o tlile go swa; ga o kitla o fola.’”+
2 Foo o ne a lebisa sefatlhego sa gagwe kwa loboteng mme a rapela Jehofa a re:
3 “Ke a go kopa tlhe Jehofa, tsweetswee gakologelwa gore ke ne ka tsamaya mo ditseleng tsa gago ka boikanyegi le ka pelo e e feletseng, e bile ke ne ka dira se se molemo mo matlhong a gago.”+ Mme Hesekia o ne a lela fela thata.
4 Isaia o ne a ise a tswele kwa lolwapeng lo lo fa gare fa Jehofa a ne a mo raya a re:+
5 “Boela morago mme o reye Hesekia, moeteledipele wa batho ba me, o re, ‘Seno ke se Jehofa, Modimo wa ga Dafide rragomogolo a se buang: “Ke utlwile thapelo ya gago. Ke bone dikeledi tsa gago.+ Bona, ke a go fodisa.+ Mo letsatsing la boraro o tla ya kwa ntlong ya ga Jehofa.+
6 Jaanong ke tla oketsa botshelo* jwa gago ka dingwaga di le 15, mme ke tla golola wena le motse ono mo seatleng sa kgosi ya Asiria,+ mme ke tla femela motse ono ka ntlha ya me le ka ntlha ya ga Dafide motlhanka wa me.”’”+
7 Go tswa foo, Isaia o ne a re: “Tlisang kuku ya difeige tse di kgobilweng tse di omisitsweng.” Ka jalo, ba ne ba e tlisa ba bo ba e tshasa mo godimo ga lethopa,* morago ga moo o ne a fola ka iketlo.+
8 Hesekia o ne a boditse Isaia a re: “Ke sesupo+ sefe se se tla bontshang gore Jehofa o tla mphodisa le gore ke tla ya kwa ntlong ya ga Jehofa mo letsatsing la boraro?”
9 Isaia o ne a araba jaana: “Seno ke sesupo se se tswang kwa go Jehofa se se tla go bontshang gore Jehofa o tla diragatsa se a se buileng: A o batla gore moriti o o mo ditepising* o ye kwa pele ditepisi di le lesome kgotsa o boele kwa morago ditepisi di le lesome?”+
10 Hesekia o ne a re: “Go motlhofo gore moriti o ye kwa pele ditepisi di le lesome, mme e seng gore o boele kwa morago ditepisi di le lesome.”
11 Ka jalo, moporofeti Isaia o ne a tlhaeletsa kwa go Jehofa, mme Modimo o ne a dira gore moriti o o mo ditepising tsa ga Ahase o o neng o setse o fologetse kwa tlase, o boele morago ditepisi di le lesome.+
12 Ka nako eo, kgosi ya Babelona e bong Berodake-baladane morwa Baladane, o ne a romelela Hesekia makwalo le mpho ka gonne o ne a utlwile gore Hesekia o ne a ntse a lwala.+
13 Hesekia o ne a amogela* barongwa bao a bo a ba bontsha ntlo yotlhe ya gagwe ya matlotlo:+ selefera, gauta, leokwane la balema le leokwane le lengwe le le tlhwatlhwakgolo, dibetsa tsa gagwe le sengwe le sengwe se se neng se le mo mabolokelamatlotlong a gagwe. Go ne go se na sepe se Hesekia a neng a sa se ba bontsha mo ntlong ya gagwe* le mo pusong yotlhe ya gagwe.
14 Morago ga moo, moporofeti Isaia o ne a tla kwa go Kgosi Hesekia mme a mmotsa jaana: “Banna bano ba go reile ba reng, mme ba ne ba tswa kae?” Ka jalo, Hesekia o ne a re: “Ba ne ba tswa kwa lefatsheng le le kgakala, kwa Babelona.”+
15 Go tswa foo, o ne a mmotsa jaana: “Ba bone eng mo ntlong ya gago?”* Hesekia o ne a araba a re: “Ba bone sengwe le sengwe se se mo ntlong ya me.* Ga go na sepe se ke sa ba bontshang sone mo mabolokelamatlotlong a me.”
16 Jaanong Isaia o ne a raya Hesekia a re: “Utlwa lefoko la ga Jehofa,+
17 ‘Metlha e etla, mme sengwe le sengwe se se mo ntlong ya gago* le sotlhe se borragomogolo ba se bolokileng go tla go fitlha mo letsatsing leno se tla isiwa kwa Babelona.+ Ga go na sepe se se tla tlogelwang,’ go bua Jehofa.
18 ‘E bile bangwe ba bomorwao ba o tla nnang rraabone ba tla tsewa+ mme ba tla nna badiredibagolo mo ntlong ya segosi ya kgosi ya Babelona.’”+
19 Foo Hesekia o ne a raya Isaia a re: “Lefoko la ga Jehofa le o le buileng le molemo.”+ Go tswa foo, o ne a oketsa jaana: “Go molemo fa e le gore go tla nna le kagiso le boiketlo* fa ke sa ntse ke tshela.”*+
20 Fa e le pego yotlhe ya botshelo jwa ga Hesekia, kafa a neng a le maatla thata ka gone le kafa a dirileng mogobe+ le mosele ka gone a bo a tlisa metsi mo motseng,+ a ga e a kwalwa mo bukeng ya dipego tsa metlha ya dikgosi tsa Juda?
21 Go tswa foo, Hesekia o ne a swa jaaka borraagwemogolo;+ mme morwawe e bong Manase+ o ne a nna kgosi mo boemong jwa gagwe.+
Dintlha Tse di Kwa Tlase
^ Kgotsa “ba ntlo ya gago ya segosi.”
^ Seheb., “malatsi.”
^ Kgotsa “sekaku; tlhagala.”
^ Gongwe ditepisi tseno di ne di dirisediwa go bala nako, ka go leba gore moriti o fa kae.
^ Kgotsa “mo ntlong ya segosi.”
^ Kgotsa “reetsa.”
^ Kgotsa “mo ntlong ya segosi.”
^ Kgotsa “mo ntlong ya segosi.”
^ Kgotsa “mo ntlong ya segosi.”
^ Seheb., “mo motlheng wa me.”
^ Kgotsa “boammaaruri.”
