Ditiragalo wa Bobedi 1:1-17
1 Solomone morwa Dafide o ne a nna a nonofa mo bogosing jwa gagwe, mme Jehofa, Modimo wa gagwe o ne a na le ene e bile o ne a mo dira mogolo thata.+
2 Solomone o ne a laela gore go bidiwe Iseraele yotlhe, baokamedi ba dikete le ba makgolo, baatlhodi le dikgosana tsotlhe tsa Iseraele, e leng ditlhogo tsa dikgotla tsa bone.
3 Go tswa foo, Solomone mmogo le phuthego yotlhe ba ne ba ya kwa lefelong le le kwa godimo le le boitshepo kwa Gibeone,+ ka gonne ke teng kwa tente ya bokopanelo ya Modimo wa boammaaruri e neng e le gone, tente e Moshe motlhanka wa ga Jehofa a neng a e dirile kwa nageng.
4 Le fa go ntse jalo, Dafide o ne a ntshitse Letlole la Modimo wa boammaaruri kwa Kiriathe-jearime+ a le tlisitse kwa lefelong le a neng a le le baakanyeditse; o ne a le tlhometse tente kwa Jerusalema.+
5 Mme sebeso sa kopore+ se Besalele+ morwa Uri morwa Hure a neng a se dirile se ne se beilwe fa pele ga motlaagana wa ga Jehofa; mme Solomone le phuthego ba ne ba tle ba rapele fa pele ga sone.*
6 Jaanong Solomone o ne a ntsha ditlhabelo foo fa pele ga ga Jehofa, mme o ne a ntsha ditlhabelo tse di fisiwang di le 1 000 mo sebesong sa kopore+ se se neng se le kwa tenteng ya bokopanelo.
7 Mo bosigong joo, Modimo o ne a iponatsa mo go Solomone mme a mo raya a re: “Kopa se o ka ratang gore ke se go neye.”+
8 Foo Solomone o ne a raya Modimo a re: “O bontshitse rre e bong Dafide lorato lo logolo lo lo sa kgaotseng,+ e bile o ntlhomile kgosi mo boemong jwa gagwe.+
9 Jaanong, tlhe Jehofa Modimo, a tsholofetso ya gago e o e diretseng Dafide rre e diragale,+ ka gonne o ntlhomile kgosi ya setšhaba se sentsi jaaka lorole lwa lefatshe.+
10 Ka jalo, nneye botlhale le kitso+ gore ke etelele setšhaba seno pele,* gonne ke mang yo o ka kgonang go atlhola setšhaba seno sa gago se segolo?”+
11 Foo Modimo o ne a raya Solomone a re: “E re ka pelo ya gago e eleditse seno e bile o sa kopa dikhumo, dithoto le tlotlo kgotsa gore ba ba go tlhoileng ba swe e bile o sa kopa go tshela lobaka lo loleele,* mme o kopile botlhale le kitso gore o atlhole batho ba me ba ke go tlhomileng kgosi ya bone,+
12 ke tla go naya botlhale le kitso; gape ke tla go naya dikhumo le dithoto le tlotlo tse dikgosi tse di neng di le teng pele ga gago di iseng di ke di nne le tsone e bile go se ope morago ga gago yo o tla nnang le tsone.”+
13 Ka jalo, Solomone o ne a tswa kwa lefelong le le kwa godimo le le boitshepo kwa Gibeone+ fa pele ga tente ya bokopanelo, a tla mo Jerusalema; mme o ne a busa Iseraele.
14 Solomone o ne a nna a kokoanya dikara le dipitse;* o ne a na le dikara di le 1 400 le dipitse* di le 12 000,+ mme o ne a di baya mo metseng ya dikara+ le mo Jerusalema gaufi le kgosi.+
15 Mme kgosi eno e ne ya dira gore selefera le gauta di nne dintsi mo Jerusalema jaaka maje,+ ya bo ya dira gore dikgong tsa mosedara di nne dintsi thata jaaka ditlhare tsa mosikamore tse di kwa Shefela.+
16 Dipitse tsa ga Solomone di ne di rekilwe kwa Egepeto,+ mme setlhopha sa bagwebi ba kgosi se ne se tle se reke dipitse di le dintsi* ka tlhwatlhwa e le nngwe.+
17 Kara nngwe le nngwe e e neng e tswa kwa Egepeto e ne e rekwa ka dishekele tsa selefera di le 600, mme pitse e ne e rekwa ka di le 150; morago ga moo ba ne ba tle ba di rekisetse dikgosi tsotlhe tsa Bahite le dikgosi tsa Siria.
Dintlha Tse di Kwa Tlase
^ Kgotsa “ba ne ba tle ba botse Modimo teng.”
^ Seheb., “gore ke kgone go tswa le go tsena fa pele ga setšhaba seno.”
^ Seheb., “malatsi a mantsi.”
^ Kgotsa “bapalami ba dipitse.”
^ Kgotsa “bapalami ba dipitse.”
^ Kgotsa gongwe “kwa Egepeto le kwa Kue; bagwebi ba kgosi ba ne ba tle ba di reke go tswa kwa Kue,” gongwe go tewa Kilikia.
