Ditiragalo wa Bobedi 13:1-22
13 Mo ngwageng wa bo18 wa ga Kgosi Jeroboame, Abija o ne a nna kgosi mo Juda.+
2 O ne a busa dingwaga di le tharo mo Jerusalema. Leina la ga mmaagwe e ne e le Mikaia+ morwadia Uriele wa Gibea.+ Mme go ne go na le ntwa fa gare ga ga Abija le Jeroboame.+
3 Ka jalo, Abija o ne a ya go lwa le mophato wa batlhabani ba ba maatla ba ba katisitsweng* ba le 400 000.+ Mme Jeroboame o ne a tsamaya go ya ka thulaganyo ya tlhabano a ya go tlhabana le ene a na le banna ba ba katisitsweng* ba le 800 000, e leng batlhabani ba ba maatla.
4 Jaanong Abija o ne a ema mo Thabeng ya Semaraime, e e mo kgaolong e e dithaba ya Eferaime, mme o ne a goa a re: “Ntheetse, wena Jeroboame le Iseraele yotlhe.
5 A ga lo itse gore Jehofa, Modimo wa Iseraele o neile Dafide bogosi mo Iseraele ka bosakhutleng,+ ene le bomorwawe,+ ka kgolagano e e nnelang ruri?*+
6 Le fa go ntse jalo, Jeroboame+ morwa Nebate, motlhanka wa ga morwa Dafide e bong Solomone, o ne a tlhanogela morena wa gagwe.+
7 Mme banna ba ba sa direng sepe, ba ba se nang mosola, ba ne ba nna ba phuthegela fa go ene. Ba ne ba tlhanogela Rehoboame morwa Solomone, yo a neng a le monnye e bile a le boboi, mme o ne a ka se kgone go emelelana le bone.
8 “Mme jaanong lo akanya gore lo ka emelelana le bogosi jwa ga Jehofa jo bo mo seatleng sa bomorwa Dafide, ka gonne lo le bantsi thata e bile lo na le dinamane tsa gauta tse Jeroboame a neng a di lo direla gore e nne medimo ya lona.+
9 A ga lo a leleka baperesiti ba ga Jehofa,+ ditlogolwana tsa ga Arone le Balefi, e bile a ga lo a itlhomela baperesiti fela jaaka ditšhaba tsa mafatshe a mangwe?+ Ope fela yo o neng a tla a tshotse* powana le diphelefu di le supa, o ne a kgona go nna moperesiti wa dilo tse e seng medimo.
10 Mme rona, Jehofa ke Modimo wa rona,+ mme ga re a mo tlogela; baperesiti ba rona, e leng ditlogolwana tsa ga Arone, ba direla Jehofa, mme Balefi ba a ba thusa mo tirong eo.
11 Ba ntsha ditlhabelo tse di fisiwang gore di kuisetse Jehofa mosi moso mongwe le mongwe le maitseboa mangwe le mangwe+ mmogo le maswalo a a nkgang monate,+ mme senkgwe se se tlhatlagantsweng*+ se mo godimo ga tafole ya gauta e e sa tswakanngwang, e bile ba tshuba setlhomo sa dipone sa gauta+ le dipone tsa sone maitseboa mangwe le mangwe,+ ka gonne re diragatsa maikarabelo a Jehofa, Modimo wa rona, a re a neileng; mme lona lo mo tlogetse.
12 Jaanong itseng gore Modimo wa boammaaruri o na le rona, o re etelela pele ka baperesiti ba gagwe. Ba na le diterompeta tsa go naya sesupo tse ba di dirisang go tlhaba mokgosi wa tlhabano. Lona banna ba Iseraele, lo se ka lwa tlhabana le Jehofa, Modimo wa borraalonamogolo, ka gonne ga lo kitla lo atlega.”+
13 Le fa go ntse jalo, Jeroboame o ne a romela balaledi gore ba tle ba tswa kwa morago ga banna ba Juda, mme ba ne ba felela ba le fa pele ga Juda mme balaledi ba le kwa morago ga bone.
14 E rile banna ba Juda ba retologa, ba ne ba lemoga gore ba tshwanetse go lwa le batlhasedi ba bone ba ba kwa pele le ba ba kwa morago ga bone. Ka jalo, ba ne ba simolola go goela kwa go Jehofa,+ fa baperesiti bone ba ntse ba leletsa diterompeta kwa godimo.
15 Banna ba Juda ba ne ba tlhaba mokgosi wa ntwa mme e rile banna ba Juda ba tlhaba mokgosi oo, Modimo wa boammaaruri o ne a fenya Jeroboame le Iseraele yotlhe fa pele ga ga Abija le Juda.
16 Baiseraele ba ne ba tshaba fa pele ga Juda, mme Modimo o ne a ba tsenya mo seatleng sa bone.
17 Abija le batlhabani ba gagwe ba ne ba bolaya batho ba le bantsi, mme Baiseraele ba ba bolailweng e ne e le banna ba ba katisitsweng* ba le 500 000.
18 Ka jalo, banna ba Iseraele ba ne ba kokobediwa ka nako eo, mme banna ba Juda ba ne ba itshupa gore ba ba feta ka maatla ka gonne ba ne ba ikantse* Jehofa, Modimo wa borraabonemogolo.+
19 Abija o ne a nna a lelekisa Jeroboame mme a gapa metse mo go ene, Bethele+ le metse e e e dikologileng, Jeshana le metse e e e dikologileng, le Eferaine+ le metse e e e dikologileng.
20 Mo motlheng wa ga Abija, Jeroboame ga a ka a tlhola a nna le taolo jaaka pele; mme Jehofa o ne a mo itaya a bo a swa.+
21 Le fa go ntse jalo, Abija o ne a tswelela a nonofa mo bogosing jwa gagwe. Fa nako e ntse e tsamaya, o ne a nyala basadi ba le 14,+ mme o ne a tsholelwa bana ba basimane ba le 22 le bana ba basetsana ba le 16.
22 Mme pego yotlhe ya ga Abija, ditiro tsa gagwe le mafoko a gagwe, di kwadilwe mo mekwalong* ya ga moporofeti Ido.+
Dintlha Tse di Kwa Tlase
^ Seheb., “tlhophilweng.”
^ Seheb., “tlhophilweng.”
^ Seheb., “kgolagano ya letswai.”
^ Seheb., “a tla go tlatsa seatla sa gagwe ka.”
^ Go tewa senkgwe se se bewang fa pele ga Modimo.
^ Seheb., “tlhophilweng.”
^ Seheb., “ikaegile ka.”
^ Kgotsa “mo pegong.”
