Ditiragalo wa Bobedi 28:1-27
28 Ahase+ o ne a na le dingwaga di le 20 fa a ne a nna kgosi, mme o ne a busa dingwaga di le 16 mo Jerusalema. Ga a ka a dira se se siameng mo matlhong a ga Jehofa jaaka Dafide rraagwemogolo a ne a dirile.+
2 Go na le moo, o ne a tsamaya mo ditseleng tsa dikgosi tsa Iseraele,+ e bile o ne a dira difikantswe tse di bopilweng+ tsa Bobaale.
3 Mo godimo ga moo, o ne a kuisa mosi wa setlhabelo mo Mokgatšheng wa ga Morwa Hinoma* a bo a fisa bomorwawe mo molelong,+ a dira ditiro tse di makgapha tsa ditšhaba+ tse Jehofa a neng a di lelekile fa pele ga Baiseraele.
4 Gape o ne a nna a ntsha ditlhabelo e bile a kuisa mosi wa ditlhabelo mo mafelong a a kwa godimo a a boitshepo,+ mo dithoteng le ka fa tlase ga setlhare sengwe le sengwe se segolo.+
5 Ka jalo, Jehofa, Modimo wa gagwe o ne a mo tsenya mo seatleng sa kgosi ya Siria,+ mme e ne ya mo fenya ya bo ya tsaya batho ba le bantsi thata ya ba isa botshwarwa kwa Damaseko.+ Gape o ne a tsenngwa mo seatleng sa kgosi ya Iseraele, e e neng ya bolaya batho ba gagwe ba le bantsi thata.
6 Gonne Peka+ morwa Remalia o ne a bolaya batho ba le 120 000 kwa Juda mo letsatsing le le lengwe, banna botlhe ba ba pelokgale, ka ntlha ya gore ba ne ba tlogetse Jehofa, Modimo wa borraabonemogolo.+
7 Mme Sikeri, motlhabani wa Moeferaime, o ne a bolaya morwa kgosi e bong Maaseia le Aserikame, yo o neng a okametse ntlo ya segosi,* le Elekana yo o neng a latela kgosi ka maemo.
8 Mo godimo ga moo, Baiseraele ba ne ba isa basadi, barwa le barwadi ba le 200 000 botshwarwa; gape ba ne ba gapa dithoto di le dintsi, mme ba ne ba tsamaya ka dithoto tseo kwa Samarea.+
9 Le fa go ntse jalo, moporofeti wa ga Jehofa yo o bidiwang Odede o ne a le koo. O ne a ya kwa masoleng a a neng a tla mo Samarea mme a a raya a re: “Jehofa, Modimo wa borraalonamogolo o ne a tsenya batho ba Juda mo seatleng+ sa lona ka gonne a ne a ba galefetse, mme lo ne lwa ba bolaya ka bogale jo bogolo jo bo neng jwa fitlha kwa magodimong.
10 Mme jaanong lo ikaeletse go dira batho ba Juda le ba Jerusalema batlhanka le malata a lona.+ Mme gone, a le lona ga lo molato fa pele ga ga Jehofa, Modimo wa lona?
11 Jaanong ntheetseng mme lo buse batshwarwa ba lo ba tsereng kwa go bomorwarraalona, ka gonne Jehofa o lo galefetse thata.”
12 Foo bangwe ba balaodi ba Baeferaime, e bong Asaria morwa Jehohanane, Berekia morwa Meshilemothe, Jehisikia morwa Shalume le Amasa morwa Hadelai, ba ne ba kgatlhantsha batho ba ba neng ba goroga ba tswa ntweng,
13 mme ba ne ba ba raya ba re: “Lo se ka lwa tlisa batshwarwa bao fano, ka gonne seno se tla dira gore re nne molato fa pele ga ga Jehofa. Se lo batlang go se dira se tlile go oketsa maleo a rona le molato wa rona, ka gonne molato wa rona o setse o le mogolo e bile Modimo o galefetse Baiseraele.”
14 Ka jalo, masole a a ipaakanyeditseng ntwa a ne a tlisa batshwarwa bao le dithoto tse a di gapileng+ kwa dikgosaneng le kwa phuthegong yotlhe.
15 Foo banna ba ba neng ba tlhophilwe ka maina ba ne ba tsaya batshwarwa bao, mme ba ne ba ntsha diaparo mo dilong tse di gapilweng ba bo ba di naya botlhe ba ba neng ba sa apara. Ka jalo, ba ne ba ba apesa ba bo ba ba naya ditlhako,* dijo le dinô le leokwane la go itshasa. Mo godimo ga moo, ba ne ba pega ba ba bokoa mo ditonking ba bo ba ba isa kwa go bomorwarraabone kwa Jeriko, motse wa ditlhare tsa mokolane. Morago ga moo, ba ne ba boela kwa Samarea.
16 Ka nako eo, Kgosi Ahase o ne a kopa thuso kwa dikgosing tsa Asiria.+
17 Mme Baedoma ba ne ba tla gape ba bo ba tlhasela Juda mme ba ne ba ba isa botshwarwa.
18 Bafilisitia+ le bone ba ne ba tlhasela mo metseng e e mo Shefela+ le e e mo Negebe wa Juda ba bo ba gapa Bethe-shemeshe,+ Aijalona,+ Gederothe, Soko le metse e e e dikologileng, Timena+ le metse e e e dikologileng le Gimeso le metse e e e dikologileng; mme ba ne ba nna mo go yone.
19 Jehofa o ne a kokobetsa Juda ka ntlha ya ga Kgosi Ahase wa Iseraele, ka gonne o ne a letlile gore batho ba Juda ba se ka ba laolesega, mme seo sa dira gore ba se ka ba ikanyega gotlhelele mo go Jehofa.
20 La bofelo Kgosi Tilegathe-pilenesere+ wa Asiria o ne a tla go mo tlhasela mme a mmakela matshwenyego+ go na le go mo nonotsha.
21 Gonne Ahase o ne a tsere dilwana tsotlhe tsa ntlo ya ga Jehofa le tsa ntlo ya kgosi*+ le tsa matlo a dikgosana a bo a di naya kgosi ya Asiria e le mpho; le fa go ntse jalo, seo ga se a ka sa mo thusa ka sepe.
22 Mme le mo nakong ya fa Kgosi Ahase a ne a le mo matshwenyegong, o ne a direla Jehofa ka go tlhoka boikanyegi le go feta.
23 O ne a simolola go ntsha ditlhabelo a di ntshetsa medimo ya Damaseko+ e e neng e mo fentse,+ mme o ne a re: “E re ka medimo ya dikgosi tsa Siria e ba thusa, ke tla e ntshetsa ditlhabelo gore le nna e tle e nthuse.”+ Le fa go ntse jalo, e ne ya dira gore ene le batho botlhe ba Iseraele ba kgopiwe.
24 Mo godimo ga moo, Ahase o ne a phutha dilwana tsa ntlo ya Modimo wa boammaaruri;+ go tswa foo o ne a thubaganya dilwana tseo tsa ntlo ya Modimo wa boammaaruri, a tswala dikgoro tsa ntlo ya ga Jehofa+ a bo a itirela dibeso mo khoneng nngwe le nngwe ya Jerusalema.
25 Mme mo metseng yotlhe ya Juda, o ne a dira mafelo a a kwa godimo a a boitshepo gore a ntshetse medimo e mengwe ditlhabelo,+ mme o ne a kgopisa Jehofa, Modimo wa borraagwemogolo.
26 Mme fa e le pego yotlhe ya botshelo jwa gagwe, dilo tsotlhe tse a neng a di dira go tswa kwa tshimologong go ya kwa bokhutlong, e kwadilwe mo Bukeng ya Dikgosi Tsa Juda le Tsa Iseraele.+
27 Go tswa foo, Ahase o ne a swa jaaka borraagwemogolo, mme ba ne ba mo fitlha mo motseng, mo Jerusalema, mme gone ga ba a ka ba mo fitlha mo mabitleng a dikgosi tsa Iseraele.+ Mme morwawe e bong Hesekia o ne a nna kgosi mo boemong jwa gagwe.
Dintlha Tse di Kwa Tlase
^ Bona “Gehena” mo Ditlhaloso Tsa Mafoko.
^ Seheb., “ntlo.”
^ Seheb., “bompaatšhane.”
^ Kgotsa “ntlo ya segosi.”
