Petere wa Bobedi 3:1-18
3 Baratwa, jaanong leno ke lekwalo la bobedi le ke le lo kwalelang, le mo go lone jaaka mo lekwalong la ntlha, ke lo rotloetsang gore lo dirise bokgoni jwa lona jwa go akanya ka go lo gopotsa dilo tse lo setseng lo di itse,+
2 gore lo gakologelwe mafoko a a neng a buiwa pelenyana* ke baporofeti ba ba ikanyegang le dithuto tsa Morena le Mmoloki wa rona a dirisa baaposetoloi.*
3 Sa ntlha, itseng gore mo metlheng ya bofelo basotli ba tla tla ba sotla e bile ba dira dilo tse di bosula tse ba di eletsang.+
4 Mme ba tla re: “O solofeditse gore o tla tla, mme jaanong o kae?+ Aitsane, ga go na sepe se se fetogileng fa e sa le go tloga ka nako e borraaronamogolo ba neng ba swa ka yone, dilo tsotlhe di sa ntse di ntse fela jaaka di ne di ntse go tloga ka nako ya fa Modimo a ne a bopa batho.”+
5 Gonne ba itlhokomolosa ntlha eno ka boomo, gore magodimo a nnile teng go tswa bogologolong le gore lefatshe le ne la kgaoganngwa le metsi ka lefoko la Modimo e bile le mo gare ga metsi;+
6 le gore lefatshe la nako eo le ne la senngwa ka morwalela.+
7 Mme ka lone lefoko leo, magodimo le lefatshe tse di leng teng gone jaanong di boloketswe molelo, e bile di tla tswelela di le teng go fitlha ka letsatsi la katlholo le go tla senngwang batho ba ba bosula mo go lone.+
8 Le fa go ntse jalo baratwa, lo se ka lwa itlhokomolosa ntlha eno, gore letsatsi le le lengwe mo go Jehofa* le lekana le dingwaga di le sekete, le gore dingwaga di le sekete di lekana le letsatsi le le lengwe.+
9 Jehofa* ga a bonya ka tsholofetso ya gagwe+ jaaka batho bangwe ba akanya gore o bonya, mme o pelotelele le lona ka gonne ga a eletse gore motho ope a senngwe mme o eletsa gore botlhe ba ikwatlhaye.+
10 Le fa go ntse jalo, letsatsi la ga Jehofa*+ le tla tla jaaka legodu,+ mme mo letsatsing leo magodimo a tla nyelediwa+ ka modumo o mogolo,* mme e re ka dilo tse di kwa magodimong le tse di mo lefatsheng di tla bo di le mogote thata, di tla nyerologa e bile lefatshe le dilo tse di mo go lone tse di dirilweng ke motho di tla senolwa.+
11 E re ka dilo tseno tsotlhe di tshwanetse go nyerologa ka tsela eno, elang tlhoko gore lo tshwanetse go nna batho ba mofuta ofe! Lo tshwanetse go dira ditiro tse di boitshepo e bile tsela e lo itshwarang ka yone e tshwanetse go bontsha gore lo ineetse mo Modimong.
12 Nnang lo letetse letsatsi la ga Jehofa*+ e bile lo tswelele lo akantse thata ka lone.* Mo letsatsing leo magodimo a tla senngwa+ ka molelo le dilo tse di kwa magodimong le tse di mo lefatsheng di tla nyerologa mo mogoteng o mogolo!
13 Mme re letetse magodimo a masha le lefatshe le lesha tse a re di solofeditseng,+ mme botlhe ba ba mo go tsone ba tla dira se se siameng ka metlha.+
14 Ka jalo baratwa, e re ka lo letetse dilo tseno, dirang ka natla gore kwa bofelong Modimo a lo fitlhele lo le phepa, lo se na molato e bile lo le mo kagisong.+
15 Mo godimo ga moo, tsayang bopelotelele jwa Morena wa rona e le tshono ya go bona poloko, fela jaaka mokaulengwe wa rona yo o rategang Paulo a ile a lo kwalela a dirisa botlhale jo a bo filweng ke Modimo.+
16 Tota e bile, o kwadile ka dilo tseno mo makwalong otlhe a gagwe. Le fa go ntse jalo, go na le dilo dingwe tse go leng thata go di tlhaloganya mo makwalong ao, mme ba ba se nang kitso* le ba tumelo ya bone e koafetseng ba a di sokamisa, fela jaaka ba dira le ka Dikwalo tse dingwe tsotlhe, mme seo se tla felela ka gore ba senngwe.
17 Ka jalo baratwa, e re ka lona lo itse seno go sa le gale, nnang lo disitse gore batho bao ba ba tlhokomologang molao ba se ka ba lo faposa ka thuto ya bone ya maaka mme tumelo ya lona ya koafala.+
18 Ke a itse gore lo tla dira jalo, mme gone amogelang bopelonomi jo bogolo* le kitso ya Morena le Mmoloki wa rona e bong Jesu Keresete. A a galalediwe gone jaanong le go ya kwa letsatsing la bosakhutleng. Amen.
Dintlha Tse di Kwa Tlase
^ Kgotsa “dilo tse di neng tsa bolelelwa pele.”
^ Seger., “baaposetoloi ba lona.”
^ Bona Dintlha A5.
^ Bona Dintlha A5.
^ Kgotsa “modumo o o sumang.”
^ Bona Dintlha A5.
^ Bona Dintlha A5.
^ Kgotsa “lo eletsa ka tlhoafalo gore le tle.” Seger., “lo le potlakisa.”
^ Kgotsa “ba ba sa rutiwang.”
^ Bona Ditlhaloso Tsa Mafoko.
