Timotheo wa Bobedi 3:1-17
3 Mme itse gore mo malatsing a bofelo,+ go tla nna le dinako tse di thata e bile di le kotsi.
2 Gonne batho ba tla ikakanyetsa ba le bosi, ba rata madi, ba ikgantsha, ba le mabela, ba tlhapatsa, ba sa utlwe batsadi, ba sa leboge, ba sa ikanyege,
3 ba sa rate ba bangwe, ba sa batle go dumalana le ba bangwe ka sepe, ba senya batho maina, ba sa ithibe mo go sepe, ba le bogale jo bo tshabegang, ba sa rate se se molemo,
4 ba tsietsa ba bangwe, ba le tlhogoethata, ba ikgogomosa, ba rata menate go na le go rata Modimo,
5 ba itira e kete ba boifa Modimo mme tsela e ba tshelang ka yone e sa bontshe seo;+ mme bano o ikgaoganye le bone.
6 Gonne mo go bone, go na le banna ba ba batlang tsela ya go tsena mo malapeng ka boferefere gore ba tsietse basadi ba ba dirilweng bokoa ke maleo a bone, basadi bano ba laolwa ke dikeletso tse di farologaneng,
7 ba nna ba ithuta mme le ka motlha ga ba kgone go nna le kitso ya boammaaruri.
8 Jaanong le bone ba ganetsana le boammaaruri fela jaaka Janese le Jamberese ba ne ba ganetsana le Moshe. Banna bano ba senyegile megopolo, mme ga ba amogelwe ka gonne ga ba dumele dithuto tse di re thusang gore re nne le tumelo mo Modimong.
9 Le fa go ntse jalo, ga ba kitla ba gatela pele ka gonne boeleele jwa bone bo tla bonala sentle mo go botlhe, fela jaaka boeleele jwa banna ba babedi bao bo ne jwa bonala.+
10 Mme wena o reeditse ka kelotlhoko dilo tse ke neng ke di ruta,+ o latetse tsela e ke tshelang ka yone le boikaelelo jwa me, gape o itse ka tumelo ya me, bopelotelele jwa me, lorato lwa me, boitshoko jwa me
11 le ka tsela e ke neng ka boga ka yone kwa Antioka,+ kwa Ikonio+ le kwa Lisetera.+ Le fa go ntse jalo, ke ne ka itshokela dipogiso tseno mme Morena o ne a nkgolola mo go tsone tsotlhe.+
12 Tota e bile, botlhe ba ba eletsang go obamela Modimo e le balatedi ba ga Keresete Jesu le bone ba tla bogisiwa.+
13 Mme batho ba ba bosula le maferefere ba tla tswelela ba sulafalela pele, ba tsietsa e bile ba tsiediwa.+
14 Le fa go ntse jalo, wena tswelela o dirisa dilo tse o di ithutileng wa bo wa thusiwa go di dumela,+ ka o itse gore o di ithutile mo go bomang
15 e bile o itsile dikwalo tse di boitshepo+ go tloga fa o ne o le losea,+ tse di kgonang go go tlhalefisa gore o bolokwe ka go nna le tumelo mo go Keresete Jesu.+
16 Dilo tsotlhe tse di kwadilweng mo Dikwalong Tse di Boitshepo di tswa kwa Modimong.+ Di re tswela mosola ka gonne di a re ruta,+ di a re kgalemela, di tlhamalatsa* dilo, e bile di re otlhaya go ya ka se se siameng,+
17 gore motho wa Modimo a tshwanelege ka botlalo, a ipaakanyeditse go dira tiro nngwe le nngwe e e molemo.
Dintlha Tse di Kwa Tlase
^ Kgotsa “baakanya.”
