Amose 7:1-17
7 Seno ke se Morena Molaodimogolo Jehofa a neng a se mpontsha mo ponatshegelong: Ke ne ka mmona a dira gore go nne le lesogodi la tsie fa dijalo tse di jadilweng morago* di ne di simolola go tlhoga. Tseno ke dijalo tse di jadilweng fa bojang jwa kgosi bo sena go segiwa.
2 Fa lesogodi leo le fetsa go ja dimela tsa naga, ke ne ka re: “Ao tlhe Morena Molaodimogolo Jehofa, tsweetswee itshwarele batho ba gago!+ Jakobe o tla falola* jang? Gonne o bokoa!”+
3 Ka jalo, Jehofa o ne a ikwatlhaela* seno.+ Jehofa o ne a re, “Seno ga se kitla se diragala.”
4 Seno ke se Morena Molaodimogolo Jehofa a neng a se mpontsha mo ponatshegelong: Ke ne ka bona Morena Mogodimodimo Jehofa a tlisa katlholo ya molelo. Molelo oo o ne wa tuka go fitlha lewatle le kgala e bile o ne wa laila karolo nngwe ya naga.
5 Foo ke ne ka re: “Ao tlhe Morena Molaodimogolo Jehofa, tsweetswee emisa seno.+ Jakobe o tla falola* jang? Gonne o bokoa!”+
6 Ka jalo, Jehofa o ne a ikwatlhaela* seno.+ Morena Molaodimogolo Jehofa o ne a re, “Seo le sone ga se kitla se diragala.”
7 Seno ke se a neng a se mpontsha mo ponatshegelong: Ke ne ka bona Jehofa a eme mo loboteng lo lo dirilweng ka mogala o o tlhamalatsang,* mme mo seatleng o ne a tshotse mogala o o tlhamalatsang.
8 Foo Jehofa o ne a nthaya a re: “O bona eng, Amose?” Ka jalo, ke ne ka re: “Mogala o o tlhamalatsang.” Mme Jehofa o ne a nthaya a re: “Jaanong ke lekanya batho ba me ba Iseraele ke dirisa mogala o o tlhamalatsang. Ga nkitla ke tlhola ke ba itshwarela.+
9 Mafelo a a kwa godimo a ga Isake+ a tla fetoga marope, le mafelo a a boitshepo a Iseraele a tla senngwa;+ mme ke tla tlhasela losika lwa ga Jeroboame ka tšhaka.”+
10 Amasia yo e leng moperesiti wa kwa Bethele+ o ne a romela molaetsa ono kwa go Kgosi Jeroboame+ wa Iseraele: “Amose o go logela leano la boferefere mo Iseraele.+ Lefatshe le ka se kgone go itshokela mafoko otlhe a gagwe.+
11 Gonne Amose a re, ‘Jeroboame o tla bolawa ka tšhaka, mme ruri Iseraele o tla isiwa botshwarwa a tswa mo nageng ya gagwe.’”+
12 Go tswa foo, Amasia o ne a raya Amose a re: “Wena mmoni wa diponatshegelo, tsamaya, tshabela kwa nageng ya Juda, o ipatlele senkgwe* teng, mme o ka nna wa porofeta teng.+
13 Le fa go ntse jalo, o se ka wa tlhola o porofeta kwa Bethele,+ ka gonne ke lefelo le le boitshepo la kgosi+ e bile ke ntlo ya bogosi.”
14 Foo Amose o ne a araba Amasia a re: “Ke ne ke se moporofeti kgotsa morwa moporofeti; mme ke ne ke le modisa,+ e bile ke ne ke tlhokomela ditlhare tsa difeige tsa mosikamore.*
15 Le fa go ntse jalo, Jehofa o ne a ntlogedisa tiro ya go sala letsomane morago, mme Jehofa o ne a nthaya a re, ‘Tsamaya, o ye go porofetela batho ba me ba Iseraele.’+
16 Jaanong utlwa lefoko la ga Jehofa: ‘Wena o a re, “O se ka wa bolelela Iseraele molaetsa wa katlholo+ e bile o se ka wa bolela+ gore ditlogolwana tsa ga Isake di tlile go atlholwa.”
17 Ka jalo, seno ke se Jehofa a se buang: “Mosadi wa gago o tla nna seaka mo motseng, mme bomorwao le bomorwadio ba tla bolawa ka tšhaka. Lefatshe la gago le tla kgaoganngwa ka mogala o o lekanyang, mme wena o tla swela kwa lefatsheng le le itshekologileng; mme ruri Iseraele o tla isiwa botshwarwa a tswa mo nageng ya gagwe.”’”+
Dintlha Tse di Kwa Tlase
^ Go tewa tse di jadilweng ka January le February.
^ Seheb., “ema.”
^ Seheb., “o ne a fetola mogopolo ka.”
^ Seheb., “ema.”
^ Seheb., “o ne a fetola mogopolo ka.”
^ Kgotsa “setlhamalatsalobota.”
^ Seheb., “o je senkgwe.”
^ Kgotsa “ke ne ke le mopomi wa difeige tsa mosikamore.”
