Baatlhodi 11:1-40
11 Jaanong Jefetha+ wa Mogileade e ne e le motlhabani yo o maatla; mmaagwe e ne e le mogwebakammele, mme rraagwe Jefetha e ne e le Gileade.
2 Mme mosadi wa ga Gileade le ene o ne a mo tsholela bana ba basimane. E rile barwa ba mosadi yono ba gola, ba ne ba leleka Jefetha ba bo ba mo raya ba re: “Ga o kitla o nna le boswa bope jwa ga rraarona, ka gonne o morwa wa mosadi yo mongwe.”
3 Ka jalo, Jefetha o ne a tshaba mo go bomorwarraagwe mme a ya go nna kwa lefatsheng la Tobe. Mme banna ba ba se nang tiro ba ne ba ikopanya le Jefetha mme ba tsamaya le ene.
4 Morago ga lobakanyana, Baamone ba ne ba tlhabana le Baiseraele.+
5 Mme fa Baamone ba ne ba tlhabana le Baiseraele, bagolwane ba Gileade ba ne ba itlhaganela ba ya go tsaya Jefetha kwa lefatsheng la Tobe.
6 Ba ne ba raya Jefetha ba re: “Tlaa mme o nne molaodi wa rona, gore re tlhabane le Baamone.”
7 Mme Jefetha o ne a raya bagolwane ba Gileade a re: “A ga se lona ba lo neng lo ntlhoile thata mo lo neng lwa nteleka mo ntlong ya ga rre?+ Goreng jaanong lo tlile mo go nna fa lo le mo matshwenyegong?”
8 Fa Jefetha a rialo, bagolwane ba Gileade ba ne ba mo raya ba re: “Ke gone ka moo jaanong re boetseng mo go wena. Fa o tsamaya le rona re bo re ya go tlhabana le Baamone, o tla nna moeteledipele wa rona mo banning botlhe ba Gileade.”+
9 Ka jalo, Jefetha o ne a raya bagolwane ba Gileade a re: “Fa lo ntsaya gore ke ye go tlhabana le Baamone, mme Jehofa a bo a nthusa go ba fenya, foo ruri ke tla nna moeteledipele wa lona.”
10 Bagolwane ba Gileade ba ne ba raya Jefetha ba re: “Mma Jehofa a nne mosupi* fa gare ga rona fa e le gore ga re dire jaaka o bua.”
11 Ka jalo, Jefetha o ne a tsamaya le bagolwane ba Gileade mme batho ba ne ba mo dira moeteledipele le molaodi wa bone. Mme Jefetha o ne a boeletsa mafoko a gagwe otlhe fa pele ga ga Jehofa kwa Misepa.+
12 Go tswa foo, Jefetha o ne a romela barongwa kwa kgosing ya Baamone,+ a re: “Ke ka ntlha yang fa o tlile go ntlhasela mo lefatsheng la me?”
13 Ka jalo, kgosi ya Baamone e ne ya raya barongwa ba ga Jefetha ya re: “Ke ka gonne Baiseraele ba ne ba tsaya lefatshe la me fa ba ne ba tswa kwa Egepeto,+ go simologa kwa Arenone+ go ya kwa Jaboke le go ya go fitlha kwa Joredane.+ Jaanong le buse ka kagiso.”
14 Mme Jefetha o ne a romela barongwa gape kwa kgosing ya Baamone
15 gore ba mo reye ba re:
“Seno ke se Jefetha a se buang: ‘Baiseraele ga ba a ka ba tsaya lefatshe la Bamoabe+ le lefatshe la Baamone,+
16 ka gonne fa Baiseraele ba ne ba tswa kwa Egepeto, ba ne ba tsamaya mo nageng go ya go fitlha kwa Lewatleng le Lehibidu+ ba bo ba goroga kwa Kadeshe.+
17 Ka nako eo, Baiseraele ba ne ba romela barongwa kwa kgosing ya Edoma,+ ba re: “Tsweetswee mma re kgabaganye mo lefatsheng la gago,” mme kgosi ya Edoma e ne ya se ka ya reetsa. Gape ba ne ba romela lefoko kwa kgosing ya Moabe,+ mme e ne ya se ka ya dumela. Ka jalo, Baiseraele ba ne ba tswelela ba nna kwa Kadeshe.+
18 Fa ba ntse ba tsamaya mo nageng, ba ne ba dikologa lefatshe la Edoma+ le lefatshe la Moabe. Ba ne ba feta kwa botlhaba jwa lefatshe la Moabe+ ba bo ba nna mo kgaolong ya Arenone; ga ba a ka ba tsena mo molelwaneng wa Moabe,+ ka gonne Arenone e ne e le molelwane wa Moabe.
19 “‘Morago ga moo, Baiseraele ba ne ba romela barongwa kwa go Sihone kgosi ya Baamore, kgosi ya kwa Heshebone, mme Baiseraele ba ne ba mo raya ba re: “Tsweetswee, mma re kgabaganye mo lefatsheng la gago re ye kwa lefelong la rona.”+
20 Le fa go ntse jalo, Sihone o ne a sa tshepe Baiseraele, ka jalo o ne a se ka a ba letla go kgabaganya mo nageng ya gagwe, mme Sihone o ne a phutha batho botlhe ba gagwe mme ba kampa mo Jahase ba bo ba tlhabana le Baiseraele.+
21 Foo Jehofa, Modimo wa Iseraele o ne a tsenya Sihone le batho botlhe ba gagwe mo seatleng sa Baiseraele, mo ba neng ba ba fenya mme Baiseraele ba gapa lefatshe lotlhe la Baamore, e leng baagi ba lefatshe leo.+
22 Ka jalo, ba ne ba gapa naga yotlhe ya Baamore go simologa kwa Arenone go ya kwa Jaboke le go simologa kwa nageng go ya kwa Joredane.+
23 “‘Jehofa, Modimo wa Iseraele ke ene yo o neng a leleka Baamore fa pele ga batho ba gagwe ba Iseraele,+ mme jaanong a wena o tla ba leleka?
24 A sengwe le sengwe se o nang le sone ga se se Kemoshe+ modimo wa gago a se go neileng? Ka jalo, mongwe le mongwe yo Jehofa, Modimo wa rona a mo lelekileng fa pele ga rona ke ene yo re tla mo lelekang.+
25 Jaanong a wena o botoka ka tsela epe go gaisa Balake+ morwa Sipore, kgosi ya Moabe? A o kile a ganetsana le Baiseraele, kgotsa a o kile a tlhabana le bone?
26 Fa Baiseraele ba ne ba sa ntse ba nna kwa Heshebone le metse e e e dikologileng le kwa Aroere le metse e e e dikologileng+ le mo metseng yotlhe e e fa dintshing tsa Arenone dingwaga di le 300, goreng lo ne lwa se ka lwa leka go e tsaya mo go bone ka nako eo?+
27 Ga ke a go leofela, mme o phoso ka go ntlhasela. Mma Jehofa yo e leng Moatlhodi+ a atlhole gompieno fa gare ga batho ba Iseraele le batho ba Amone.’”
28 Le fa go ntse jalo, kgosi ya Baamone e ne ya se ka ya reetsa molaetsa o Jefetha a neng a o rometse kwa go ene.
29 Moya wa ga Jehofa o ne wa tla mo go Jefetha,+ mme a ralala Gileade le Manase go ya kwa Misepe wa Gileade, mme go tswa kwa Misepe wa Gileade+ o ne a fetela kwa Baamoneng.
30 Go tswa foo, Jefetha o ne a ikanela+ Jehofa mme a re: “Fa o ka tsenya Baamone mo seatleng sa me,
31 foo ope fela yo o tswang ka kgoro ya ntlo ya me a tla go nkgatlhantsha fa ke boa ka kagiso kwa Baamoneng e tla nna wa ga Jehofa,+ mme ene yoo ke tla mo isa e le setlhabelo se se fisiwang.”+
32 Ka jalo, Jefetha o ne a ya go tlhabana le Baamone, mme Jehofa o ne a ba tsenya mo seatleng sa gagwe.
33 O ne a ba kgemetha ba le bantsi thata go tswa kwa Aroere go ya go fitlha kwa Minithe le go ya go fitlha kwa Abele-keramime. O ne a fenya metse e le 20. Ka jalo, Baiseraele ba ne ba fenya Baamone.
34 La bofelo Jefetha o ne a boela kwa legaeng la gagwe kwa Misepa,+ mme morwadie o ne a tswa a tla go mo kgatlhantsha, a letsa moropana e bile a bina! Jaanong e ne e le ene fela ngwana wa gagwe. Kwantle ga gagwe, o ne a se na ngwana wa mosimane kgotsa wa mosetsana.
35 E rile a mmona, a gagolaka diaparo tsa gagwe mme a re: “Ijoo, morwadiaka! O mphatlotse pelo,* ka gonne ke wena yo ke tla go tsamaisang. Jaanong ke ikanetse Jehofa, mme ga ke kgone go boela morago.”+
36 Mme ene o ne a raya rraagwe a re: “Rra, fa e le gore o ikanetse Jehofa, ntirela jaaka o solofeditse,+ ka gonne Jehofa o go thusitse gore o fenye baba ba gago, Baamone.”
37 Go tswa foo, o ne a raya rraagwe a re: “Mma ke direlwe seno: Mma ke nne ke le nosi dikgwedi di le pedi, mme mma ke ye kwa dithabeng, mme ke lelele bokgarebane jwa me ke na le balekane ba me ba basetsana.”*
38 Foo rraagwe o ne a re: “O ka tsamaya.” Ka jalo, o ne a mo letla gore a tsamaye dikgwedi di le pedi mme o ne a ya kwa dithabeng le balekane ba gagwe ba basetsana gore a lelele bokgarebane jwa gagwe.
39 Kwa bokhutlong jwa dikgwedi tse pedi, o ne a boela kwa go rraagwe, morago ga moo rraagwe o ne a diragatsa maikano a a neng a a dirile.+ Ga a ise a tsamaye a tlhakanele dikobo le monna. Mme seno e ne ya nna mokgwa* mo Iseraele:
40 Ngwaga le ngwaga, makgarebe a Iseraele a ne a tle a ye go akgola morwadia Jefetha wa Mogileade malatsi a le manê mo ngwageng.
Dintlha Tse di Kwa Tlase
^ Seheb., “a nne yo o utlwang.”
^ Seheb., “O nkokobeditse thata.”
^ Kgotsa “ke lele ke na le ditsala tsa me ka gonne ga nkitla ke nyalwa.”
^ Kgotsa “molao.”
