Baefeso 2:1-22
2 Mo godimo ga moo, Modimo o ne a dira gore lo tshele, le fa lo ne lo sule ka ntlha ya melato ya lona le maleo a lona.+
2 Ka nako nngwe lo ne lo tshela jaaka batho ba lefatshe leno ba tshela*+ e bile lo dira dilo tse mmusi wa lefatshe leno+ a batlang gore lo di dire. Mmusi yono o laola moya+ o o tlhotlheletsang batho gore ba se ka ba ikobela Modimo.
3 Mo nakong e e fetileng, rotlhe re ne re tshela jaaka batho bao ka gonne re ne re dira dilo go dumalana le dikeletso tsa rona tse di sa siamang+ e bile re dira dilo tse di ratwang ke dikakanyo tsa rona.+ Re ne re tshwanelwa ke bogale jwa Modimo go tloga fela fa re tsholwa,+ jaaka batho ba bangwe botlhe.
4 Mme e re ka Modimo a le kutlwelobotlhoko+ e bile a re rata thata,+
5 o ne a dira gore re tshele mmogo le Keresete, le fa re ne re sule ka ntlha ya boleo,+ tota e bile, re bolokilwe ka ntlha ya bopelonomi jwa gagwe jo bogolo.*
6 Gape Modimo o ne a re tsosa mmogo le ene a bo a re baya mmogo le ene kwa legodimong re le barutwa ba ga Keresete Jesu,+
7 gore mo nakong e e tlang* a tle a re bontshe bopelonomi jwa gagwe jo bogolo fa a re direla dilo tse dintle. Modimo o tla nna pelontle mo go* rona ba re leng seoposengwe le Keresete Jesu.
8 Lona ba lo nang le tumelo, lo bolokilwe ka ntlha ya bopelonomi jono jo bogolo,+ mme seno ga se a direga ka ntlha ya matsapa a lo a tsereng; go na le moo, ke mpho ya Modimo.
9 Nnyaa, ga se ka ntlha ya dilo tse lo di dirileng,+ gore go se ka ga nna le motho ope yo o nnang le lebaka la go ikgantsha.
10 Gonne re tiro ya diatla tsa Modimo; Modimo o ne a re bopa+ ka go re dira barutwa ba ga Keresete Jesu+ gore re dire ditiro tse di molemo, tse a neng a ikaeletse gore re di dire go sa le gale.
11 Ka jalo, gopolang gore ga lo Bajuda, mme batho ba ba rupisitsweng ke batho, ba ne ba lo bitsa batho ba ba sa rupang.
12 Ka nako eo lo ne lo sa itse Keresete, lo se seoposengwe le batho ba Iseraele, e bile e re ka lo ne lo le batswakwa, dikgolagano tsa tsholofetso di ne di sa lo ame;+ lo ne lo tshela mo lefatsheng lo se na tsholofelo e bile lo sa itse Modimo.+
13 Mme jaanong e re ka lo le seoposengwe le Keresete Jesu, lona ba lo kileng lwa bo lo le kgakala thata le Modimo, lo simolotse go nna gaufi le ene ka ntlha ya madi a ga Keresete.
14 Gonne ene yo o neng a dira gore ditlhopha tse pedi di nne setlhopha se le sengwe+ a bo a thuba lobota lo lo fa gare lo lo neng lo di kgaoganya,+ o re tliseditse kagiso.+
15 Fa a ntsha mmele wa gagwe setlhabelo, o ne a fedisa melao le ditaelo tse di neng di le mo Molaong wa ga Moshe tse di neng di dira gore batho e nne baba, gore a tle a dire gore ditlhopha tse pedi tse di seoposengwe le ene di nne motho a le mongwe yo mosha+ le gore go nne le kagiso.
16 Gape, fa a ne a swela mo koteng ya tlhokofatso,* o ne a dira gore ditlhopha tseo tse pedi e nne ditsala tsa Modimo,+ e le gore a dire ditlhopha tseo tse pedi mmele o le mongwe+ ka mmele wa gagwe.
17 Mme o ne a tla, a bo a rerela lona ba ba kgakala thata le Modimo le ba ba gaufi le ene dikgang tse di molemo tsa kagiso,
18 ka gonne setlhabelo sa gagwe se dira gore rotlhe mo ditlhopheng tseno tse pedi, re kgone go rapela Rara yo o kwa legodimong ka gonne rotlhe re amogela moya o o boitshepo o o tshwanang.
19 Ka jalo, ga lo tlhole lo le batswakwa,+ mme lo baagimmogo+ le ba ba boitshepo e bile lo lelapa la Modimo,+
20 mme lo agilwe mo motheong wa baaposetoloi le baporofeti,+ mme Keresete Jesu ene ke leje la sekhutlo* la motheo.+
21 Mme kago yotlhe e e seoposengwe le ene, e e kopanngwang mmogo ka kutlwano,+ e gola gore e nne tempele e e boitshepo ya ga Jehofa.*+
22 E re ka lo le seoposengwe le Keresete, Modimo o dirile gore lona le ba bangwe lo nne ntlo e a nnang mo go yone, ka gonne moya wa gagwe o mo go yone.+
Dintlha Tse di Kwa Tlase
^ Seger., “lo tshwana le tsamaiso ya dilo ya lefatshe leno.” Bona Ditlhaloso Tsa Mafoko.
^ Bona Ditlhaloso Tsa Mafoko.
^ Seger., “mo ditsamaisong tse di tlang tsa dilo.” Bona Ditlhaloso Tsa Mafoko.
^ Kgotsa “o tla amogela.”
^ Bona Ditlhaloso Tsa Mafoko.
^ Bona Ditlhaloso Tsa Mafoko.
^ Bona Dintlha A5.
