Baefeso 5:1-33
5 Ka jalo, etsang Modimo+ ka gonne lo bana ba gagwe ba ba rategang,
2 e bile tswelelang lo na le lorato+ fela jaaka Keresete le ene a ne a re* rata+ a bo a ineela ka ntlha ya rona* e le setlhabelo se se nkgang monate se se yang kwa Modimong.+
3 A boitsholo jo bo sa siamang jwa tlhakanelodikobo* le boitshekologo* kgotsa bogagaru jwa mofuta mongwe le mongwe di se ka tsa umakwa mo go lona,+ fela jaaka go tshwanela batlhanka ba Modimo.+
4 E bile ga lo a tshwanela go dira boitshwaro jo bo tlhabisang ditlhong kgotsa go bua dilo tsa boeleele kgotsa metlae e e ferosang sebete,+ go na le moo lo tshwanetse go leboga Modimo.+
5 Gonne lo itse seno e bile lo lemoga gore mo Bogosing Jwa ga Keresete le Jwa Modimo ga go na boswa bope jo bo tla newang motho ope yo o dirang boitsholo jo bo sa siamang jwa tlhakanelodikobo*+ kgotsa motho yo o seng phepa kgotsa motho yo o pelotshetlha,+ ka gonne go nna pelotshetlha ke go obamela medingwana.+
6 A motho ope a se ka a lo tsietsa ka mafoko a a se nang mosola, ka gonne Modimo o tla galefela batho ba ba sa utlweng ka ntlha ya dilo tse di ntseng jalo.
7 Ka jalo, lo se ka lwa amana le bone ka gope;
8 gonne lo kile lwa bo lo le lefifi, mme jaanong lo lesedi+ ka gonne lo ba Morena.+ Tswelelang lo tsamaya jaaka bana ba lesedi,
9 ka gonne lesedi leo le re thusa gore re nne le pelo e ntle mo dilong tsotlhe, re dire se se siameng e bile re tsamaye mo tseleng e e siameng.+
10 Nnang lo tlhomamise gore ke eng se Morena a se amogelang;+
11 mme tlogelang go dira ditiro tse di sa ungweng tsa lefifi;+ go na le moo, di senoleng.
12 Gonne go tlhabisa ditlhong go bolela dilo tse ba di dirang mo sephiring.
13 Jaanong lesedi le senola* dilo tsotlhe tse di sa siamang, mme seo se dira gore dilo tse di sa siamang di bonale.
14 Ka jalo, ga twe: “Tsoga, wena yo o robetseng, o bo o tsoge mo baswing,+ mme Keresete o tla go phatsimela.”+
15 Ka jalo, elang tlhoko thata tsela e lo itshwarang ka yone, gore lo se ka lwa itshwara jaaka batho ba ba seng botlhale mme lo itshware jaaka ba ba botlhale,
16 lo dirisa nako ya lona sentle,*+ ka gonne malatsi a re tshelang mo go one a bosula.
17 Ka ntlha ya seno, tlogelang go nna batho ba ba se nang tlhaloganyo, mme nnang lo tlhomamise gore ke eng se Jehofa* a batlang gore lo se dire.+
18 Gape, lo se ka lwa tagwa,+ ka gonne seno se ka dira gore lo se ka lwa laolesega,* mme tswelelang lo tladiwa ka moya wa Modimo.
19 Buang ka dipesalema, bakang Modimo lo bo lo opele dipina tsa kobamelo.+ Opelang lo bo lo leletse Jehofa* dipina+ go tswa mo dipelong tsa lona,+
20 ka metlha lo leboga+ Modimo wa rona le Rara ka dilo tsotlhe lo dirisa leina la Morena wa rona Jesu Keresete.+
21 Ikobelaneng+ ka gonne lo boifa Keresete.
22 A basadi ba ikobele banna ba bone+ jaaka ba ikobela Morena,
23 ka gonne monna ke tlhogo ya mosadi wa gagwe+ fela jaaka Keresete le ene e le tlhogo ya phuthego,+ ene yo e leng mmoloki wa mmele ono.
24 Tota e bile, e re ka phuthego e ikobela Keresete, basadi le bone ba tshwanetse go ikobela banna ba bone mo go sengwe le sengwe.
25 Banna, tswelelang lo rata basadi ba lona,+ fela jaaka Keresete le ene a ne a rata phuthego a bo a e swela,+
26 gore a tle a e dire boitshepo, a e dire phepa ka go e tlhatswa ka metsi, e leng lefoko la Modimo,+
27 gore phuthego e tle e nne ntle mo matlhong a gagwe, e se ka ya nna le patso kgotsa letsutsuba kgotsa sepe sa dilo tse di ntseng jalo,+ go na le moo e nne boitshepo e bile e se ka ya nna le molato.+
28 Ka tsela e e tshwanang, banna ba tshwanetse go rata basadi ba bone jaaka ba rata mebele ya bone. Monna yo o ratang mosadi wa gagwe o a ithata,
29 ka gonne ga go motho ope yo o kileng a tlhoa mmele* wa gagwe, mme o a o fepa a bo a o tlhokomela, fela jaaka Keresete a dira ka phuthego,
30 ka gonne re dikarolo tsa mmele wa gagwe.+
31 “Ka lebaka leno, monna o tla tlogela rraagwe le mmaagwe mme o tla ngaparela* mosadi wa gagwe, mme batho bano ba babedi ba tla nna nama e le nngwe.”+
32 Sephiri seno se se boitshepo+ se segolo. Se bua ka ga Keresete le phuthego.+
33 Le fa go ntse jalo, mongwe le mongwe wa lona o tshwanetse go rata mosadi wa gagwe+ jaaka a ithata; ka fa letlhakoreng le lengwe, mosadi o tshwanetse go tlotla monna wa gagwe thata.+
Dintlha Tse di Kwa Tlase
^ Kgotsa gongwe “lo.”
^ Kgotsa gongwe “lona.”
^ Ka Segerika, por·nei′a. Bona Ditlhaloso Tsa Mafoko.
^ Bona Ditlhaloso Tsa Mafoko.
^ Bona Ditlhaloso Tsa Mafoko.
^ Kgotsa “kgala.”
^ Seger., “lo ithekela nako e e lo siametseng.”
^ Bona Dintlha A5.
^ Seger., “lo tshele botshelo jo bo maswe.”
^ Bona Dintlha A5.
^ Seger., “nama.”
^ Kgotsa “o tla tswelela a nna le.”
