Bahebera 11:1-40
11 Tumelo ke go tshepa o sa belaele gore se o se solofetseng se tla diragala,+ e bile ke bosupi jo bo tlhatswang pelo* jwa gore dilo tse di sa bonweng ruri di teng.
2 Gonne ka ntlha ya yone, Modimo o ne a naya batho ba bogologolo* bosupi jwa gore o a ba amogela.
3 Tumelo e dira gore re lemoge gore dilo tse di kwa legodimong le tse di mo lefatsheng* di ne tsa tlhomiwa ka lefoko la Modimo, mo e leng gore se se bonwang se nnile gone go tswa mo dilong tse di sa bonaleng.
4 E re ka Abele a ne a na le tumelo, o ne a isetsa Modimo setlhabelo se se botoka go gaisa sa ga Kaine,+ mme ka ntlha ya tumelo eo o ne a newa bosupi jwa gore o ne a siame, ka gonne Modimo o ne a amogela* dimpho tsa gagwe,+ mme le fa a sule, o sa ntse a bua+ ka ntlha ya tumelo ya gagwe.
5 E re ka Enoke+ a ne a na le tumelo, o ne a fudusiwa gore a se ka a boga fa a swa, mme o ne a se ka a fitlhelwa gope ka gonne Modimo o ne a mo fudusitse;+ gonne pele ga a fudusiwa o ne a newa bosupi jwa gore o ne a itumedisitse Modimo.
6 Mo godimo ga moo, fa motho a se na tumelo, ga a ka ke a kgona go itumedisa Modimo, ka gonne yo o atamelang Modimo o tshwanetse go dumela gore o gone le gore o duela ba ba batlang go dira thato ya gagwe ka tlhoafalo.+
7 E re ka Noa+ a ne a na le tumelo, o ne a bontsha gore o boifa Modimo fa a ne a bolelelwa dilo tse di diregang tse di iseng di ko di bonwe,+ mme o ne a aga araka+ gore ba lelapa la gagwe ba bolokwe; mme ka ntlha ya tumelo eno o ne a bontsha gore lefatshe le molato+ mme a bolelwa a siame ka gonne a ne a na le tumelo.
8 E re ka Aborahame+ a ne a na le tumelo, fa a ne a bidiwa o ne a ikoba mme a ya kwa lefelong le a neng a tla le newa e le boswa; o ne a tsamaya le fa gone a ne a sa itse kwa a yang teng.+
9 Tumelo e a neng a na le yone e ne ya dira gore a nne motswakwa mo lefatsheng le a neng a le solofeditswe,+ a nna mo ditenteng+ le Isake le Jakobe, ba le bone e neng e le baruaboswa ba ba solofeditsweng se se tshwanang.+
10 O ne a letetse motse o o nang le metheo ya mmatota, o Modimo a o tlhamileng a bo a o aga.+
11 E re ka Sara a ne a na le tumelo, o ne a ima* le fa gone a ne a fetile dingwaga tsa go tshola,+ ka gonne o ne a dumela gore yo o dirileng tsholofetso eno o a ikanyega.
12 Ka ntlha ya seno, monna yo go neng go tsewa gore a ka se kgone go nna le bana,*+ o ne a tsholelwa bana+ ba le bantsi jaaka dinaledi tsa legodimo e bile ba sa balege jaaka motlhaba* o o fa thoko ga lewatle.+
13 Batho bano botlhe ba ne ba swa ba na le tumelo, le fa gone ba ne ba sa bona ditsholofetso tseo di diragadiwa;+ mo go bone go ne go ntse jaaka e kete ba a di bona+ le fa gone di ne di sa ntse di tla diragadiwa mo nakong e e tlang. E bile ba ne ba bolela phatlalatsa gore e ne e le batswakwa le baagi ba nakwana mo lefatsheng le ba neng ba nna mo go lone.
14 Gonne ba ba buang jalo ba bontsha gore ba batla lefelo la bone ka tlhoafalo.
15 Le fa go ntse jalo, fa ba ka bo ba ile ba nna ba gakologelwa lefelo le ba duleng kwa go lone,+ ba ka bo ba ile ba boela kwa go lone.
16 Mme jaanong ba eletsa lefelo le le botoka, e leng lefelo le le tswang kwa legodimong. Ka jalo, Modimo ga a tlhabiwe ke ditlhong gore a bidiwe Modimo wa bone,+ ka gonne o ba baakanyeditse motse.+
17 E re ka Aborahame a ne a na le tumelo, fa a ne a lekwa,+ go ne ga nna jaaka e kete o ne a setse a ntshitse Isake setlhabelo. Tota monna yoo yo o neng a amogetse ditsholofetso ka boitumelo o ne a leka go ntsha morwawe yo o tsetsweng a le esi setlhabelo+
18 le fa gone a ne a boleletswe go twe: “Se se tla bidiwang losika lwa gago se tla nna gone ka Isake.”+
19 Mme o ne a dumela gore Modimo o ne a ka kgona go mo tsosa mo baswing, mme o ne a mo amogela go tswa mo losong ka tsela ya tshwantshetso.+
20 E re ka Isake le ene a ne a na le tumelo, o ne a segofatsa Jakobe+ le Esau+ a ba bolelela se se neng se tla direga mo nakong e e tlang.
21 E re ka Jakobe a ne a na le tumelo, fa a tloga a swa,+ o ne a segofatsa barwa ba babedi ba ga Josefa+ a bo a obamela Modimo a itshegeditse ka tlhogo ya thobane ya gagwe.+
22 E re ka Josefa a ne a na le tumelo, fa a tloga a swa, o ne a bua gore Baiseraele ba ne ba tla tswa kwa Egepeto, mme o ne a ba laela gore ba tsamaye ka marapo a gagwe.*+
23 E re ka batsadi ba ga Moshe ba ne ba na le tumelo, fa a sena go tsholwa ba ne ba mo fitlha dikgwedi di le tharo,+ ka gonne ba ne ba bona gore ngwana yono o montle+ mme ga ba a ka ba boifa taelo ya kgosi.+
24 E re ka Moshe a ne a na le tumelo, fa a setse a godile,+ o ne a gana go bidiwa morwa wa ga morwadia Faro,+
25 mme o ne a tlhopha go bogisiwa le batho ba Modimo go na le go ja monate wa boleo ka nakwana,
26 ka gonne o ne a tsaya go kgobiwa ka ntlha ya ga Keresete go le botlhokwa thata go feta matlotlo a Egepeto, gape o ne a letile ka tlhoafalo gore a newe maduo.
27 E re ka a ne a na le tumelo, o ne a tswa kwa Egepeto,+ e se ka gonne a boifa bogale jwa kgosi,+ ka gonne o ne a tswelela a itshokile ka bopelotelele jaaka e kete o bona Modimo yo go se nang motho ope yo o ka mmonang.+
28 E re ka a ne a na le tumelo, o ne a laela gore go ketekwe Tlolaganyo a bo a laela gore go kgatšhiwe madi mo dikgorong, gore moengele wa Modimo a se ka a bolaya maitibolo a bone.+
29 E re ka ba ne ba na le tumelo, ba ne ba feta ba raletse Lewatle le Lehibidu jaaka e kete ba tsamaya mo lefatsheng le le omileng,+ mme fa Baegepeto bone ba ne ba leka go feta mo go lone, metsi a ne a ba khurumetsa.+
30 E re ka Baiseraele ba ne ba na le tumelo, fa ba sena go gwanta go dikologa dipota tsa Jeriko malatsi a le supa, di ne tsa wela fa fatshe.+
31 E re ka Rahabe yo o neng a gweba ka mmele a ne a na le tumelo, ga a ka a nyelediwa mmogo le ba ba neng ba sa reetse, ka gonne o ne a amogela ditlhola ka lorato.+
32 Mme ke eng gape se nka se buang? Gonne nako ga e ntetle go bua ka Gidione,+ Barake,+ Samesone,+ Jefetha,+ Dafide+ mmogo le Samuele+ le baporofeti ba bangwe.
33 E re ka ba ne ba na le tumelo, ba ne ba fenya magosi,+ ba dira gore go nne le tshiamo, ba amogela ditsholofetso,+ ba thiba melomo ya ditau,+
34 ba tima molelo o o maatla,+ ba falola bogale jwa tšhaka,+ fa ba le bokoa ba ne ba nonotshiwa,+ ba nna diganka mo ntweng,+ ba leleka masole a a neng a ba tlhasela.+
35 Basadi ba ne ba amogela ba masika a bone ba ba neng ba sule,+ mme le fa banna ba bangwe ba ne ba bogisiwa ka gonne ba ikanyega, ga ba a ka ba tlogela go ikanyega mo Modimong e le fela gore ba gololwe. Ba ne ba dira jalo gore ba tle ba bone tsogo e e botoka.
36 Ba bangwe ba ne ba lekwa ka go sotliwa le go kgwathisiwa, mo godimo ga moo, ba ne ba golegiwa ka dikeetane+ ba bo ba tsenngwa mo dikgolegelong.+
37 Ba ne ba kgobotlediwa ka maje,+ ba lekwa, ba segakwa, ba bolawa ka tšhaka,+ ba apara matlalo a dinku le a dipodi,+ ba le mo letlhokong, mo pitlaganong,+ ba tshwerwe makgwakgwa;+
38 mme lefatshe le ne le sa ba tshwanela ka gonne ba ne ba le molemo. Ba ne ba tshela mo dikakeng le mo dithabeng le mo dikgageng+ le mo dikhuting.
39 Le fa go ntse jalo, batho bano botlhe, le fa Modimo a ne a ba naya bosupi jwa gore o a ba amogela ka ntlha ya tumelo ya bone, ga ba a ka ba bona se a neng a se ba solofeditse,
40 ka gonne Modimo o ne a akantse go re naya sengwe se se botoka,+ gore ba se ka ba itekanedisiwa pele ga rona.
Dintlha Tse di Kwa Tlase
^ Kgotsa “bosupi jo bo bonalang sentle.”
^ Kgotsa “borraaronamogolo.”
^ Seger., “mo ditsamaisong tsa dilo.” Bona Ditlhaloso Tsa Mafoko.
^ Kgotsa “a neela bosupi jwa gore o lemoga.”
^ Kgotsa “o ne a amogela maatla a go ithwala peo.”
^ Seger., “go tsewa gore o sule.”
^ Kgotsa “moshawa.”
^ Kgotsa “o ne a ba naya ditaelo ka phitlho ya gagwe.”
