Lekwalo la Bakolosa 3:1-25
3 Le fa go ntse jalo, fa e le gore lo ne lwa tsosiwa le Keresete,+ tswelelang lo batla dilo tse di kwa godimo, kwa Keresete a ntseng gone ka fa seatleng sa moja sa Modimo.+
2 Nnang lo tlhomile megopolo ya lona mo dilong tse di kwa godimo,+ e seng mo dilong tse di mo lefatsheng.+
3 Gonne lo ne lwa swa, mme botshelo jwa lona bo mo diatleng tsa ga Keresete go dumalana le thato ya Modimo.
4 Fa Keresete, yo o nayang botshelo+ a bontsha maatla a gagwe, le lona lo tla bo lo na le ene mo kgalalelong ya gagwe.+
5 Ka jalo, bolayang dikeletso tsa lona tse di sa siamang,+ keletso ya boitsholo jo bo sa siamang jwa tlhakanelodikobo,* keletso ya boitshekologo,* keletso e e sa laolesegeng ya tlhakanelodikobo,+ keletso ya go dira se se utlwisang botlhoko le bopelotshetlha, se e leng kobamelo ya medingwana.
6 Modimo o tla galefela batho ba ba dirang dilo tseo.
7 Le lona lo kile lwa bo lo dira* dilo tse di ntseng jalo.+
8 Mme jaanong lo tshwanetse go tlogela dilo tseno tsotlhe: tšhakgalo, bogale, bosula,+ mafoko a a kgobang+ le puo e e ferosang sebete.+
9 Lo se ka lwa aketsana.+ Apolang botho jo* bogologolo+ le mekgwa ya jone,
10 mme lo apare botho jo bosha,+ jo Modimo a re thusang go nna le jone fa re ntse re ithuta ka ene. Seno se tla dira gore botho jwa rona bo ntšhafadiwe gore bo tshwane le jwa Modimo.+
11 Fa motho a na le botho jo bosha, mo go ene ga go na pharologano fa gare ga Mogerika kgotsa Mojuda, go rupa kgotsa go sa rupa, motswakwa, Mosethia,* motlhanka kgotsa motho yo o gololesegileng; mme Keresete ke dilo tsotlhe e bile o mo go botlhe.+
12 Ka jalo, e re ka lo le ba ba tlhophilweng ba Modimo,+ ba ba boitshepo le ba ba ratwang, nnang le lorato* le bopelotlhomogi,+ bopelonomi, boikokobetso,*+ bonolo+ le bopelotelele.+
13 Tswelelang lo itshokelana e bile lo itshwarelana ka pelo yotlhe+ le fa mongwe a na le lebaka la go ngongorega ka yo mongwe.+ Lo tshwanetse go itshwarelana fela jaaka Jehofa* a ne a lo itshwarela.+
14 Mme mo godimo ga dilo tseno tsotlhe, nnang le lorato*+ ka gonne lo dira gore batho ba utlwane.+
15 Gape, letlang kagiso ya ga Keresete gore e laole mo dipelong tsa lona,+ ka gonne Modimo o lo biditse gore lo nne mmele o le mongwe le gore lo nne le kagiso. Mme ka metlha lo leboge.
16 Letlang lefoko la ga Keresete gore le dire mo go lona ka botlalo le gore le dire gore lo nne botlhale. Nnang lo rute ba bangwe, lo ba kgothatse* ka dipesalema,+ ka dipako tse di yang kwa Modimong, ka dipina tsa kobamelo le tse di opelwang go lebogiwa,* lo opelela Jehofa* mo dipelong tsa lona.+
17 Mme sepe fela se lo se buang kgotsa se lo se dirang, se direng ka leina la Morena Jesu, lo leboga Modimo Rara ka ene.+
18 Lona basadi ba ba nyetsweng, nnang mo taolong ya banna ba lona,+ e leng se Morena a batlang gore lo se dire.
19 Lona banna ba ba nyetseng, nnang lo rate basadi ba lona+ mme lo se ka lwa ba galefela mo go botlhoko.*+
20 Lona bana, utlwang batsadi ba lona mo go sengwe le sengwe+ ka gonne Morena o itumelela seno thata.
21 Lona borre, lo se ka lwa galefisa* bana ba lona,+ gore ba se ka ba hutsafala.*
22 Lona batlhanka, utlwang beng ba lona ba ba mo lefatsheng* mo go sengwe le sengwe,+ e seng fela fa lo lebilwe ke batho gore lo ba kgatlhe, mme lo dire jalo ka pelo yotlhe lo boifa Jehofa.*
23 Sepe fela se lo se dirang, se direng ka moya otlhe jaaka e kete lo se direla Jehofa,*+ e seng batho,
24 ka gonne lo a itse gore Jehofa* o tla lo duela ka go lo naya boswa.+ Direlang Mong wa rona, e bong Keresete.
25 Eleruri motho yo o dirang se se sa siamang o tla otlhaelwa dilo tse di sa siamang tse a di dirileng.+ Modimo o tla atlhola batho a sa tseye letlhakore lepe.+
Dintlha Tse di Kwa Tlase
^ Ka Segerika, por·nei′a. Bona Ditlhaloso Tsa Mafoko.
^ Bona Ditlhaloso Tsa Mafoko.
^ Kgotsa “tsamaya mo.”
^ Seger., “motho wa.”
^ “Mosethia” go tewa motho yo o sa tlhalobologang.
^ Kgotsa “aparang lorato.”
^ Kgotsa “mogopolo o o ikokobeditseng.”
^ Bona Dintlha A5.
^ Kgotsa “aparang lorato.”
^ Kgotsa “lo tlhagisane.”
^ Kgotsa “opelwang ka bopelontle.”
^ Bona Dintlha A5.
^ Kgotsa “lwa nna makgwakgwa.”
^ Kgotsa “tshwenya; rumola.”
^ Kgotsa “kgobega marapo.”
^ Seger., “ba senama.”
^ Bona Dintlha A5.
^ Bona Dintlha A5.
^ Bona Dintlha A5.
