Baroma 14:1-23
14 Amogelang motho yo tumelo ya gagwe e leng bokoa,+ mme lo se ka lwa atlhola ba ba lebang dilo ka tsela e e sa tshwaneng le ya lona.*
2 Motho yo o nang le tumelo o ja sengwe le sengwe, mme motho yo o bokoa ene o ja merogo fela.
3 A yo o jang a se ka a tseela yo o sa jeng kwa tlase, mme a yo o sa jeng a se ka a atlhola yo o jang,+ ka gonne Modimo o mo amogetse.
4 O mang gore o atlhole motlhanka wa motho yo mongwe?+ Mong wa gagwe ke ene a dirang tshwetso ya gore a o dira se se siameng kgotsa se se sa siamang.+ Eleruri, Jehofa* a ka mo thusa gore a atlege.
5 Motho yo mongwe o tsaya letsatsi le lengwe le le botlhokwa go gaisa malatsi a mangwe;+ mme yo mongwe ene o tsaya malatsi otlhe a tshwana.+ A mongwe le mongwe a tlhatswege pelo gore se a se dumelang se siame.
6 Yo o tsayang letsatsi lengwe le le botlhokwa go gaisa a mangwe, o dira jalo gore a tlotle Jehofa.* Mme yo o jang dijo tsa mefutafuta o jela gore a tlotle Jehofa,*+ le yo o sa jeng, o tlotla Jehofa* fa a sa je. Le fa go ntse jalo, o leboga Modimo.+
7 Ga go na ope wa rona, yo o itshelelang,+ e bile ga go na ope yo o itshwelang.
8 Gonne fa re tshela, re tshelela Jehofa,*+ mme fa re swa, re swela Jehofa.* Ka jalo, fa re tshela le fa re swa, re ba ga Jehofa.*+
9 Tota e bile, ke gone ka moo Keresete a neng a swa a bo a tshela gape, gore a tle a nne Morena wa baswi le batshedi.+
10 Mme ke ka ntlha yang fa o atlhola mokaulengwe wa gago?+ Kgotsa ke ka ntlha yang fa gape o tseela mokaulengwe wa gago kwa tlase? Gonne rotlhe re tla atlholwa ke Modimo.*+
11 Gonne go kwadilwe jaana: “ ‘Ke ikana ka nna,’+ go bua Jehofa,* ‘lengole lengwe le lengwe le tla nkhubamela, le loleme longwe le longwe lo tla bolela gore lo dumela mo Modimong.’ ”+
12 Ka jalo, mongwe le mongwe wa rona o tla ema fa pele ga Modimo gore a atlholwe go ya ka ditiro tsa gagwe.+
13 Ka jalo, a re se ka ra tlhola re atlholana,+ mme go na le moo a re direng tshwetso ya gore re se ka ra baya sengwe se se kgopang fa pele ga mokaulengwe kgotsa sengwe se se ka mo digang.+
14 Ke a itse e bile ke tlhatswegile pelo mo go Morena Jesu gore ga go na dijo dipe tse di itshekologileng ka botsone.+ Fa motho a tsaya sengwe e le se se itshekologileng, go se ja go phoso mo go ene.
15 Gonne fa mokaulengwe wa gago a kgopisega ka ntlha ya dijo, ga o tlhole o na le lorato.+ O se ka wa diga* motho yo Keresete a mo swetseng ka ntlha ya dijo.+
16 Ka jalo, lo se ka lwa dira gore dilo tse di molemo tse lo di dirang di buiwe bosula.
17 Gonne Bogosi Jwa Modimo ga bo a ikaega ka se re se jang le se re se nwang,+ mme selo sa botlhokwa ke tshiamo le kagiso le boitumelo ka gonne moya o o boitshepo o re thusa go nna le dilo tseno.
18 Gonne ope fela yo o nnang motlhanka wa ga Keresete ka tsela eno, o amogelwa ke Modimo e bile o amogelwa ke batho.
19 Ka jalo, a re direng dilo tse di dirang gore go nne le kagiso+ le tse di re thusang go agana.+
20 Tlogelang go senya tiro ya Modimo fela ka ntlha ya dijo.+ Ke boammaaruri gore motho a ka ja sengwe le sengwe, mme go phoso go ja sengwe se se tla kgopisang motho yo mongwe.+
21 Go molemo gore o se ka wa ja nama kgotsa wa nwa beine kgotsa wa dira sepe fela se se kgopisang mokaulengwe wa gago.+
22 Se o se dumelang ka dilo tseno ke kgang ya gago le Modimo. O tla itumela fa o sa ikutlwe molato ka go bo o dirile sengwe se o dumelang gore se siame.
23 Mme fa e le gore motho o na le dipelaelo, o setse a le molato fa a ja, ka gonne ga a je ka ntlha ya tumelo. Eleruri sengwe le sengwe se re se dirang e se ka ntlha ya tumelo ke boleo.
Dintlha Tse di Kwa Tlase
^ Kgotsa gongwe “ba ba ipotsang dipotso mo pelong.”
^ Bona Dintlha A5.
^ Bona Dintlha A5.
^ Bona Dintlha A5.
^ Bona Dintlha A5.
^ Bona Dintlha A5.
^ Bona Dintlha A5.
^ Bona Dintlha A5.
^ Kgotsa “re tla ema fa pele ga setulo sa katlholo sa Modimo.”
^ Bona Dintlha A5.
^ Kgotsa “senya.”
