Baroma 3:1-31
3 Ka jalo, go nna Mojuda go tswela mosola ka eng, kgotsa go rupa go thusa ka eng?
2 Go mosola ka ditsela tse di farologaneng. Sa ntlha, ka gore Bajuda ba ne ba neilwe ditaelo tsa Modimo tse di boitshepo.+
3 Jaanong re ka reng ka Bajuda ba bangwe ba ba neng ba se na tumelo? A go tlhoka tumelo ga bone go raya gore Modimo ga a ikanyege?
4 Le e seng! Tota le fa mongwe le mongwe a ka fitlhelwa e le moaki,+ Modimo ene o tla fitlhelwa a le boammaaruri,+ fela jaaka go kwadilwe go twe: “Gore se o se buang se tle se bontshe gore o siame le gore o se ka wa bonwa molato fa o atlholwa.”+
5 Le fa go ntse jalo, fa re dira dilo tse di bosula, batho ba a lemoga gore Modimo o siame. Jaanong a seno se raya gore Modimo ga a siama fa a re otlhaya? (Ke bua ka tsela e batho ba bangwe ba akanyang ka yone.)
6 Le e seng! Modimo o siame. Fa a ka bo a sa siama, o ne a tla atlhola lefatshe jang?+
7 Le fa go ntse jalo, fa e le gore ke bua maaka, mme maaka ao a bontsha gore se Modimo a se buang ke boammaaruri e bile a dira gore batho ba mo galaletse, goreng Modimo a mpitsa moleofi?
8 Mme ke ka ntlha yang fa ke sa bue jaaka banna bangwe ba ba re latofatsang ka maaka ba re ra re, “A re direng dilo tse di bosula gore dilo tse di molemo di tle”? Banna bao ba tla atlholwa ka tsela e e ba tshwanetseng.+
9 Jaanong go ka tweng? A re botoka go feta batho ba bangwe? Le e seng! Jaaka re setse re buile, Bajuda le Bagerika botlhe ke baleofi;+
10 fela jaaka go kwadilwe go twe: “Ga go na motho yo o siameng, tota le fa a le mongwe ga a yo;+
11 ga go na ope yo o nang le temogo; ga go na ope yo o batlang Modimo.
12 Batho botlhe ba fapogile, botlhe fela ga ba tlhole ba na le mosola; ga go na ope yo o pelonomi, le fa a le mongwe fela.”+
13 “Mometso wa bone o tshwana le lebitla le le bulegileng; ba tsietsa ka loleme.”+ “Se ba se buang se utlwisa botlhoko fela jaaka botlhole jwa noga ya lebolobolo.”+
14 “Mme molomo wa bone o tletse ditlhapa le mafoko a a utlwisang botlhoko.”+
15 “Dinao tsa bone di itlhaganelela go ya go bolaya.”+
16 “Ba nna ba utlwisa batho botlhoko e bile ba ba bogisa,
17 mme ga ba ise ba itse go dira kagiso le batho ba bangwe.”+
18 “Ga ba boife Modimo.”+
19 Jaanong re a itse gore dilo tsotlhe tse di mo molaong wa ga Moshe di lebisitswe mo bathong ba ba ikobelang molao wa ga Moshe. Boikaelelo jwa one ke go thibela batho gore ba se ka ba re ga ba na molato le go bontsha gore lefatshe lotlhe le molato fa pele ga Modimo e bile le tlhoka go otlhaiwa.+
20 Ka jalo, ga go na motho* ope yo o tla bolelwang a siame fa pele ga gagwe ka ntlha ya go latela molao,+ ka gonne molao o dira gore re lemoge gore re baleofi.+
21 Mme jaanong, go bonala sentle gore motho ga a tlhoke go ikobela molao wa ga Moshe gore Modimo a mo tseye e le motho yo o siameng.+ Ntlha eno e ne ya tlhalosiwa mo molaong wa ga Moshe le mo mafokong a baporofeti.+
22 Modimo o tsaya batho ba siame ka gonne ba dumela mo go Jesu Keresete, mme seno se thusa botlhe ba ba nang le tumelo. Botlhe ba a lekana* mo Modimong.+
23 Gonne batho botlhe ba leofile e bile ba paletswe ke go bontsha dinonofo tse dintle tsa Modimo.+
24 Modimo o ba tsaya ba siame ka ntlha ya thekololo e e neng ya duelwa ke Keresete Jesu gore ba bolokwe.+ Eno ke mpho+ e Modimo a ba neileng yone ka ntlha ya bopelonomi jwa gagwe jo bogolo.*+
25 Modimo o ne a ntsha Jesu e le setlhabelo gore batho ba boelane*+ le Modimo ka tumelo e ba nang le yone mo mading a ga Keresete.+ O ne a dira jalo go bontsha gore o tshiamo. Modimo o ne a bontsha gore o pelotelele fa a ne a itshwarela maleo a a dirilweng mo nakong e e fetileng.
26 Le gone jaanong Modimo o re bontsha gore o tshiamo,+ ka go bolela gore motho o siame fa a dumela mo go Jesu.+
27 Jaanong, a motho o tshwanetse go ipelafatsa? Ga go tlhokege. Ke molao ofe o o mo thibelang gore a se ka a ipelafatsa? A ke molao o o reng se a se dirang se botlhokwa?+ Nnyaa, ke molao o o reng o tshwanetse go nna le tumelo.
28 Gonne re a lemoga gore motho o bolelwa a siame ka tumelo, e seng ka gonne a dira dilo tse di mo molaong wa ga Moshe.+
29 Kgotsa a Modimo ke wa Bajuda fela?+ A gape ga se Modimo wa batho ba ditšhaba tse dingwe?+ Ee, ke Modimo wa batho ba ditšhaba tsotlhe.+
30 E re ka Modimo a le mongwe fela,+ o tla bolela batho ba ba rupileng e le ba ba siameng+ ka gonne ba na le tumelo e bile o tla bolela batho ba ba sa rupang e le ba ba siameng+ ka gonne ba na le tumelo.
31 Jaanong, a re fedisa molao ka tumelo ya rona? Le e seng! Go na le moo, re bontsha gore molao o siame.+
Dintlha Tse di Kwa Tlase
^ Seger., “nama.”
^ Seger., “Ga go na pharologano.”
^ Bona Ditlhaloso Tsa Mafoko.
^ Seger., “ba letlane.”
