Baroma 5:1-21
5 Ka jalo, e re ka jaanong re boletswe re le ba ba siameng ka ntlha ya tumelo,+ a re itumeleleng kagiso e re nang le yone* le Modimo ka Morena wa rona Jesu Keresete.+
2 Tumelo e re nang le yone mo go Jesu e re letla go atamela Modimo le go amogela bopelonomi jwa gagwe jo bogolo.*+ A re itumeleng* ka gonne re na le tsholofetso ya go amogela kgalalelo ya Modimo.
3 Mme e seng seo fela, mme a re itumeleng* fa re le mo dipitlaganong,+ ka gonne re a itse gore pitlagano e re thusa go itshoka;+
4 boitshoko jone, bo dira gore Modimo a re amogele;+ mme fa Modimo a re amogela re nna le tsholofelo,+
5 mme tsholofelo ga e swabise;+ ka gonne Modimo o dirisa moya wa gagwe o o boitshepo o a re nayang one go bontsha gore o a re rata.+
6 Gonne fa re ne re sa ntse re le baleofi,*+ Keresete o ne a swela batho ba ba bosula ka nako e e tlhomilweng.
7 Gonne ke ka sewelo gore motho a ka swela motho yo o dirang se se siameng; le fa go ntse jalo gongwe mongwe a ka swela motho yo o molemo.
8 Mme Modimo o ne a bontsha gore o a re rata ka gonne fa re ne re sa ntse re le baleofi, Keresete o ne a re swela.+
9 E re ka jaanong re boletswe re le ba ba siameng ka madi a gagwe,+ re ka tlhatswega pelo le go feta gore re tla falola bogale jwa Modimo.+
10 Le fa re ne re le baba ba Modimo, re ne ra nna ditsala tsa* Modimo ka loso lwa Morwawe.+ E re ka jaanong re le ditsala tsa* Modimo, re tlhatswegile pelo le go feta gore re tla bolokwa ka botshelo jwa ga Jesu.
11 Mme e seng seo fela, gape re itumela ka ntlha ya se Modimo a re diretseng sone a dirisa Morena wa rona Jesu Keresete, yo jaanong re leng ditsala tsa Modimo ka ntlha ya gagwe.+
12 Boleo bo ne jwa tsena mo lefatsheng ka motho a le mongwe, mme boleo bo ne jwa tlisa loso.+ Ka jalo, loso lo ne lwa anamela kwa bathong botlhe ka gonne ba leofile botlhe.+
13 Gonne boleo bo ne bo le gone mo lefatsheng pele ga molao wa ga Moshe, le fa go ntse jalo batho ga ba bonwe molato fa go se na molao.+
14 Mme loso lo ne lwa busa e le kgosi go tswa kwa go Adame go tla go fitlha mo go Moshe. Lo ne lwa busa le mo bathong ba ba neng ba sa leofa ka tsela e Adame a leofileng ka yone. Adame o ne a tshwana le yo o neng a tla tla.+
15 Le fa go ntse jalo, mpho ya Modimo ga e tshwane le boleo jwa ga Adame. Batho ba le bantsi ba ne ba swa ka ntlha ya boleo jwa motho a le mongwe. Mme bopelonomi jwa Modimo jo bogolo le mpho* e a re e nayang ka bopelonomi jo bogolo jwa motho a le mongwe+ e bong Jesu Keresete, di solegetse batho ba le bantsi molemo thata.+ Modimo o naya batho ba le bantsi masego a a seng kana ka sepe* ka ntlha ya mpho eo!
16 Gape mpho eo le boleo jo motho a le mongwe a neng a bo dira, di na le diphelelo tse di sa tshwaneng.+ Boleo bo le bongwe bo ne jwa dira gore batho botlhe ba bonwe molato,+ mme mpho ya Modimo e e neng ya ntshiwa ka ntlha ya maleo a mantsi e ne ya dira gore batho ba bolelwe ba siame.+
17 Loso lo ne lwa busa e le kgosi ka ntlha ya boleo jwa motho a le mongwe.+ Le fa go ntse jalo, re tlhatswegile pelo le go feta gore ba ba amogetseng bopelonomi jo bogolo jwa Modimo le mpho ya tshiamo+ ba tla busa e le dikgosi+ ka ntlha ya motho a le mongwe, e bong Jesu Keresete!+
18 Jaanong, fela jaaka boleo bo le bongwe bo ne jwa dira gore batho ba mefuta yotlhe ba bonwe molato,+ ka tsela e e tshwanang, tiro e le nngwe ya tshiamiso e ne ya dira gore batho ba mefuta yotlhe+ ba bolelwe ba siame gore ba bone botshelo.+
19 Fela jaaka go tlhoka kutlo ga motho a le mongwe go ne ga dira gore batho ba le bantsi e nne baleofi,+ ka tsela e e tshwanang go nna kutlo ga motho a le mongwe go tla dira gore batho ba le bantsi ba bolelwe ba siame.+
20 Modimo o ne a naya batho molao wa ga Moshe go ba bontsha gore ke baleofi.+ Le fa go ntse jalo, fa batho ba dira maleo a mantsi, Modimo o ne a ba bontsha bopelonomi jo bogolo le go feta.
21 Ka jalo, fela jaaka boleo bo ne jwa busa e le kgosi mme go felela ka loso,+ ka tsela e e tshwanang bopelonomi jo bogolo bo busa e le kgosi ka tshiamo. Mme seno se felela ka botshelo jo bo sa khutleng ka Jesu Keresete, Morena wa rona.+
Dintlha Tse di Kwa Tlase
^ Kgotsa gongwe “re na le kagiso.”
^ Bona Ditlhaloso Tsa Mafoko.
^ Kgotsa gongwe “Re a itumela.”
^ Kgotsa gongwe “re a itumela.”
^ Seger., “re le bokoa.”
^ Seger., “ra letlana le.”
^ Seger., “re letlane le.”
^ Seger., “mpho ya mahala.”
^ Kgotsa “a mantsi thata.”
