Baroma 6:1-23
6 A re tshwanetse go tswelela re dira boleo, gore bopelonomi jo bogolo* jo Modimo a re bontshang jone bo oketsege?
2 Le e seng! E re ka re sa tlhole re laolwa ke boleo,+ goreng re ka tswelela re dira maleo?+
3 Kgotsa a ga lo itse gore rotlhe ba re neng ra kolobediwa mo go Keresete Jesu,+ re ne ra kolobediwa mo losong lwa gagwe?+
4 Ka jalo, re ne ra fitlhwa le ene ka go kolobediwa mo losong lwa gagwe,+ gore fela jaaka Keresete a ne a tsosiwa mo baswing ka maatla a a galalelang a ga Rara, le rona ka tsela e e tshwanang re tle re tshele botshelo jo bosha.+
5 E re ka re kopanngwa le ene ka gonne re swa ka tsela e a neng a swa ka yone,+ gape re tla kopanngwa le ene ka go tsosiwa ka tsela e a neng a tsosiwa ka yone.+
6 Gonne re a itse gore botho jwa rona jwa bogologolo bo ne jwa kokotelwa mo koteng le ene+ e le gore dikeletso tse di bosula di se ka tsa tlhola di laola mebele ya rona,+ gore re se ka ra tlhola re nna batlhanka ba boleo.+
7 Gonne yo o suleng o itshwaretswe* boleo jwa gagwe.
8 Mo godimo ga moo, fa e le gore re ne ra swa le Keresete, re dumela gore gape re tla tshela le ene.
9 Gonne, e re ka jaanong re itse gore Keresete o tsositswe mo baswing,+ ga a tlhole a swa;+ loso ga lo tlhole lo na le maatla mo go ene.
10 O ne a swa gangwe fela gore boleo bo se ka jwa tlhola bo nna teng,+ mme gone jaanong o tshelela go dira thato ya Modimo.
11 Ka tsela e e tshwanang, le lona lo itseye lo sule mo tseleng e lo neng lo tshela ka yone ya boleo mme lo itseye lo tshela gore lo tle lo dire thato ya Modimo ka gonne lo balatedi ba ga Keresete Jesu.+
12 Ka jalo, lo se ka lwa letlelela boleo gore bo lo laole. Lo se ka lwa ineelela dikeletso tsa lona.+
13 Gape lo se ka lwa neela mebele* ya lona mo boleong gore lo dire se se bosula. Go na le moo, ipeyeng mo diatleng tsa Modimo jaaka e kete lo tsositswe mo baswing gore lo tshele. Bayang mebele* ya lona mo diatleng tsa Modimo gore lo dire se se molemo.+
14 Gonne boleo ga bo a tshwanela go lo laola, ka gonne ga lo latele molao+ mme Modimo o lo naya bopelonomi jo bogolo.+
15 A seno se raya gore re tshwanetse go leofa ka gonne re sa latele molao mme re amogela bopelonomi jo bogolo?+ Le e seng!
16 A ga lo itse gore fa lo ikobela motho yo mongwe, lo nna batlhanka ba motho yoo?+ Ka jalo, fa lo nna batlhanka ba boleo+ lo tla swa,+ mme fa lo nna batlhanka ba ba kutlo lo tla bolelwa lo siame.
17 Mme re leboga Modimo gore le fa lo kile lwa bo lo le batlhanka ba boleo, lo ne lwa nna kutlo ka pelo yotlhe mo go se lo se rutilweng.
18 Fa lo sena go gololwa mo boleong,+ lo ne lwa nna batlhanka ba tshiamo.+
19 E re ka lo le bokoa ka ntlha ya boleo, ke bua le lona ke dirisa mafoko a batho ba a tlhaloganyang. Lo kile lwa bo lo letla gore dikeletso tsa lona di lo dire batlhanka ba dilo tse di itshekologileng* le tse di bosula. Jaanong lwelang go nna le dikeletso tse di tla dirang gore lo nne batlhanka ba se se siameng le se se boitshepo.+
20 Fa lo ne lo le batlhanka ba boleo, lo ne lo sa tlhoke go dira se se siameng.
21 Jaanong, ditiro tsa lona di ne tsa nna le diphelelo dife ka nako eo? Lo ne lwa dira dilo tse gone jaanong di lo tlhabisang ditlhong, mme dilo tseo di dira gore batho ba swe.+
22 Le fa go ntse jalo, e re ka jaanong lo golotswe mo boleong e bile lo le batlhanka ba Modimo, diphelelo tsa ditiro tsa lona di boitshepo+ e bile di felela ka botshelo jo bo sa khutleng.+
23 Gonne dituelo tsa boleo ke loso,+ mme mpho e Modimo a re nayang yone ke botshelo jo bo sa khutleng+ a dirisa Keresete Jesu, Morena wa rona.+
Dintlha Tse di Kwa Tlase
^ Bona Ditlhaloso Tsa Mafoko.
^ Kgotsa “o golotswe mo.”
^ Seger., “ditokololo.”
^ Seger., “ditokololo.”
^ Bona Ditlhaloso Tsa Mafoko.
